Se-hoan-ngá-su 2

Se-hoan-ngá-su 2 - 現代台語譯本羅馬字版(TTVR)-闽南语

Ho͘-io̍k Hóe-kái

1-2M̄-chai kiàn-siàu ê kok-ka,

tio̍h chū-chi̍p!

Tī bēng-lēng iáu-bē hoat-chhut,

ji̍t-chí iáu-bē chhin-chhiūⁿ chho͘-khng pe--khì,

Siōng Chú tōa siū-khì iáu-bē kàu,

I siū-khì ê ji̍t iáu-bē lîm-kàu lín í-chêng,

tio̍h kóaⁿ-kín chū-chi̍p!

3Tōe-chiūⁿ só͘-ū pi-bî, chun-thàn Siōng Chú bēng-lēng ê lâng,

tio̍h chhē-kiû Siōng Chú,

chhē kong-gī, kiû khiam-pi;

án-ni tī Siōng Chú siū-khì ê ji̍t, lín chiah thang tô-pī chai-lān.

Í-sek-lia̍t Chiu-ûi ê Kok-ka Siū Sím-phòaⁿ

4 Ka-sat ōe siū khì-sak,

A-si̍t-ki-lûn ōe hong-hòe,

A-si̍t-tu̍t ōe tī thàu-tiong-tàu siū kóaⁿ-chhut,

Í-kek-lûn ōe hō͘ lâng liân kun khau--khí-lâi.

5Tòa tī iân-hái ê Ki-lī-thê-lâng chhám ah!

Hui-lī-sū-lâng teh tòa ê Ka-lâm-tōe ah,

Siōng Chú tùi lín soan-phòaⁿ kóng,

“Góa beh thiat-tóe kā lí châu-bia̍t, bô lâng lâu tī chia.”

6Iân-hái ê tōe ōe pìⁿ-chòe chháu-tiûⁿ,

pìⁿ-chòe ū bo̍k-chiá ê chháu-liâu-á, ū iûⁿ-tiâu.

7Chit-ê tōe ōe kui hō͘ Iû-tāi só͘ chhun ê chú-bîn,

in ōe tī hia chhī iûⁿ;

ē-hng-sî in ōe tī A-si̍t-ki-lûn ê chhù hioh-khùn;

in-ūi Siōng Chú — in ê Siōng-tè ōe chiàu-kò͘ in,

hō͘ siū-lia̍h ê lâng tò-tńg--lâi.

8Góa ū thiaⁿ-tio̍h Mô͘-ap ê bú-jio̍k,

A-bûn-lâng ê thí-chhiò;

in bú-jio̍k góa ê chú-bîn,

khióng-hat beh chhim-chiàm in ê kok-thó͘.

9In-ūi án-ni, Siōng Chú — Bān-kun ê Thóng-sòe, Í-sek-lia̍t ê Siōng-tè án-ni soan-kò,

“Góa kí góa ê sìⁿ-miā li̍p-sè,

Mô͘-ap ōe chhin-chhiūⁿ Só͘-to-má,

A-bûn-lâng ōe chhin-chhiūⁿ Gô-mô͘-la,

chhì-phè móa-sì-kòe, piàn-tōe ū iâm-khiⁿ,

éng-oán hong-hòe.

Góa só͘ chhun ê chú-bîn ōe kā in chhiúⁿ-toa̍t;

góa kok-lāi lâu--lo̍h-lâi ê jîn-bîn ōe chhim-chiàm in ê thó͘-tōe.”

10In siū-tio̍h chit-ê pò-èng, sī in-ūi in kiau-ngō͘;

in bú-jio̍k, khióng-hat Siōng Chú — Bān-kun ê Thóng-sòe ê chú-bîn.

11Siōng Chú beh tùi in hián-chhut ui-giâm,

hō͘ sè-chiūⁿ ê sîn-bêng soe-bî;

lia̍t-kok kap chèng hái-tó ê chū-bîn

lóng ōe tī ka-kī tòa ê só͘-chāi kèng-pài Siōng Chú.

12 Kó͘-si̍t-lâng ah, lín mā ōe hō͘ góa ê to thâi--sí.

13Siōng Chú beh chhun-chhiú kong-kek pak-hng, châu-bia̍t A-su̍t;

hō͘ Nî-nî-bî hong-hòe, chhin-chhiūⁿ ta-sò ê khòng-iá.

14Ta̍k-chióng ê iá-siù ōe kui-kûn hioh tī hia;

thê-ô͘ kap hô-ti hioh tī thiāu-chō téng-bīn;

thang-á lāi ū háu ê siaⁿ, hō͘-tēng húi-hoāi,

pek-hiuⁿ-chhâ-pán lō͘-chhut.

15Chit-ê iàn-lo̍k an-jiân khiā-khí ê siâⁿ,

bat sim-lāi kóng, “Góa sī choân sè-kài siōng úi-tāi ê siâⁿ!”

Taⁿ kèng-jiân chiah-ni̍h hong-hòe,

chiâⁿ-chòe iá-siù hioh-khùn ê só͘-chāi!

Tùi hia keng-kè ê lâng, lóng ōe hàiⁿ-thâu thí-chhiò.

Se-hoan-ngá-su 2 - 現代台語譯本羅馬字版(TTVR)-闽南语

Learn More About Us