Si-phian 21 - 現代台語譯本羅馬字版(TTVR)-闽南语

Tāi-pi̍t ê si, kau hō͘ sèng-ga̍k-tiúⁿ.Chhut-cheng ê Kî-tó

1Siōng Chú ah, ông ōe in-ūi lí hō͘ i ê khùi-la̍t hoaⁿ-hí,

ōe in-ūi lí hō͘ i ê sèng-lī hui-siông khoài-lo̍k!

2I ê sim ì-ài--ê, lí í-keng ū hō͘ i;

i ê chhùi só͘ kiû--ê, lí lóng ū tah-èng.

3In-ūi lí ēng tōa hok-khì teh gêng-chiap i,

ēng sûn-kim ê ông-koan tì tī i ê thâu-khak.

4I tùi lí kiû oa̍h-miā, lí ū hō͘ i,

hō͘ i ê hè-siū kú-kú-tn̂g-tn̂g.

5I in-ūi lí hō͘ i ê sèng-lī tit-tio̍h tōa êng-kng;

lí chiong chun-kùi ui-giâm sù hō͘ i.

6Lí hō͘ i ū tōa hok-khì kàu éng-oán,

hō͘ i tī lí ê bīn-chêng hoaⁿ-hí khoài-lo̍k.

7In-ūi ông óa-khò Siōng Chú,

koh in-ūi Chì-koân Siōng-tè ê chû-ài, i ê ông-ūi éng-oán ún-kò͘.

8Ông ê chhiú ōe lia̍h-tio̍h it-chhè ê tùi-te̍k;

i ê chiàⁿ-chhiú ōe lia̍h-tio̍h só͘-ū oàn-hūn i ê lâng.

9I chi̍t-ē chhut-hiān, ōe chhin-chhiūⁿ iām-jia̍t ê hé-lô͘ kā in sio-bia̍t.

Siōng Chú ah, lí chi̍t-ē chhut-hiān, beh tī tōa siū-khì tiong kā in thun--lo̍h-khì,

beh ēng hé kā in sio-bia̍t.

10In ê kiáⁿ-sun ōe tùi tōe-chiūⁿ siū châu-bia̍t;

in ê hō͘-tāi ōe tùi lâng ê tiong-kan siau-sit.

11In beh ēng im-bô͘ hām-hāi ông,

m̄-kú in ê kè-bô͘ bōe sêng-kong.

12Lí beh hō͘ in oa̍t-tńg-sin tô-cháu,

beh khui keng siā in.

13Siōng Chú ah, khí--lâi, hián-sī lí ê khùi-la̍t;

goán beh gîm-si chheng-chàn lí ê tōa koân-lêng.

Learn More About Us