Thoân-tō-su 10

Thoân-tō-su 10 - 現代台語譯本羅馬字版(TTVR)-闽南语

1Sí--khì ê hô͘-sîn hō͘ kui-koàn phang-iû hoat-chhut chhàu-bī; sió-khóa ê gû-gōng pí tì-hūi kap chun-kùi khah ū-la̍t.

2Tì-hūi ê lâng ê sim ǹg chiàⁿ-lō͘; gû-gōng ê lâng ê sim ǹg phian-lō͘.

3Gû-gōng ê lâng khiàm-kheh tì-hūi, liân chhut-mn̂g mā iân-lō͘ hián-chhut ka-kī sī gōng-lâng.

4Chiáng-koân-chiá nā tùi lí hoat siū-khì, m̄-thang lī-khui lí ê chit-ūi, in-ūi léng-chēng ōe-tàng hō͘ lí pī-bián tōa kè-sit.

5Góa khòaⁿ-tio̍h ji̍t-kng ê ē-bīn ū chi̍t hāng put-hēng, sī chiáng-koân-chiá chō-sêng ê chhò-gō͘,

6chiū-sī an-pâi gōng-lâng chē koân-ūi, hó-gia̍h-lâng chē kē-ūi.

7Góa khòaⁿ-kìⁿ lô͘-po̍k khiâ-bé, kùi-cho̍k chhin-chhiūⁿ lô͘-po̍k kiâⁿ-lō͘.

8Ku̍t hām-khiⁿ ê lâng ōe ka-kī poa̍h-lo̍h hit lāi-bīn; thiah-chhiûⁿ ê lâng ōe hō͘ chôa kā--tio̍h.

9Phah-chio̍h ê lâng ōe hō͘ chio̍h siong--tio̍h; phòa-chhâ ê lâng ōe hō͘ chhâ kòng--tio̍h.

10Pó͘-thâu tun, nā bô bôa hō͘ lāi, chiū tio̍h ke chhut chin chōe la̍t; oa̍h-iōng tì-hūi, ōe chān lâng sêng-kong.

11Lāng-chôa--ê iáu-bē lāng, chiū hō͘ chôa kā--tio̍h, i chiū bián koh lāng.

12Tì-hūi ê lâng kóng-ōe lâng-lâng kah-ì; gû-gōng ê lâng khui-chhùi ka-kī jiá chai-hō.

13Gōng-lâng khui-chhùi kóng gōng-ōe, kàu-bé pìⁿ siáu-ōe.

14Gōng-lâng kāu-ōe, ōe kóng bōe soah.

Lâng m̄ chai chiong-lâi ōe án-chóaⁿ; i sí-āu hoat-seng ê tāi-chì, siáⁿ-lâng ōe-tàng kā i kóng?

15Gōng-lâng chhut gōng-la̍t piàⁿ kah siān-tauh-tauh, liân ji̍p-siâⁿ ê lō͘ to chhē bô.

16Nā gín-á choh-ông, koaⁿ-tiúⁿ thàu-chá chiū teh iàn-lo̍k, hit-ê kok-ka ū chai-hō ah.

17Nā chun-kùi ê lâng choh-ông, koaⁿ-tiúⁿ chiàu-sî lim-chia̍h, m̄-sī in-ūi hò͘ⁿ-chiú, sī ūi-tio̍h beh tit-tio̍h khùi-la̍t, hit-ê kok-ka chin ū hok-khì.

18Pîn-tōaⁿ, chhù-kòa ōe lap--lo̍h-khì; chhiú bô ài tín-tāng, chhù ōe lāu.

19Iàn-se̍k hō͘ lâng hoaⁿ-hí, chiú hō͘ lâng khoài-lo̍k, chîⁿ-gûn kái-koat bān-sū.

20M̄-thang chiù-chó͘ kun-ông, liân siūⁿ mā m̄-thang; tī pâng-keng lāi m̄-thang chiù-chó͘ hó-gia̍h-lâng, in-ūi khong-tiong ê chiáu-á ōe thoân-pò͘ chit-ê siau-sit, ū-si̍t--ê ōe thoân-ōe.

Thoân-tō-su 10 - 現代台語譯本羅馬字版(TTVR)-闽南语

Learn More About Us