Sū-su-kì 18

Sū-su-kì 18 - 現代台語譯本羅馬字版(TTVR)-闽南语

Bí-ka kap Tān Chi-cho̍k

1Hit-sî, Í-sek-lia̍t-lâng bô ông; Tān chi-cho̍k teh chhē thó͘-tōe chòe khiā-khí ê só͘-chāi, in-ūi kàu hit-ji̍t, in tī Í-sek-lia̍t-lâng ê tiong-kan, iáu-bē tit-tio̍h pun hō͘ in chòe sán-gia̍p ê thó͘-tōe.

2Tān ê lâng tùi Só-la kap Í-si̍t-tô, chhe in pún-cho̍k gō͘ ê ióng-sū khì siông-sè cheng-thàm hit-ê tōe-khu, hoan-hù in, kóng, “Lín khì cheng-thàm hit-ê tōe-khu.” In lâi kàu Í-hoat-liân soaⁿ-khu, ji̍p Bí-ka ê chhù, chiū tī hia hioh-mî.

3In tī Bí-ka ê chhù hù-kūn jīn-tio̍h hit-ê siàu-liân Lī-bī-lâng ê kháu-im, chiū ji̍p-khì mn̄g i, “Siáⁿ-lâng chhōa lí lâi chia? Lí tī chia teh chòe sím-mi̍h? Lí tī chia ū tit-tio̍h sím-mi̍h hó-chhù?”

4I kóng, “Bí-ka khoán-thāi góa án-ni, án-ni; i koh chhiàⁿ góa chòe i ê chè-si.”

5In kā i kóng, “Chhiáⁿ lí mn̄g Siōng-tè, hō͘ goán chai, goán ê jīm-bū ōe sūn-lī ta̍t-sêng bōe?”

6Chè-si kā in kóng, “Lín thang pêng-an khì; Siōng Chú ōe pang-chān lín oân-sêng jīm-bū.”

7Hit gō͘ ê lâng chiū chhut-hoat, lâi kàu La-ek, khòaⁿ-tio̍h hia ê chū-bîn pêng-an khiā-khí, chhin-chhiūⁿ Se-tùn-lâng bô khiàm-kheh, bô siū lâng kiáu-jiáu; in lī-khui Se-tùn-lâng chin hn̄g, bô kap jīm-hô-lâng lâi-óng.

8In tò-lâi kàu tī Só-la kap Í-si̍t-tô tiong-kan kâng chi-cho̍k ê lâng hia; hiah-ê lâng mn̄g in kóng, “Lín khòaⁿ-liáu án-chóaⁿ?”

9In ìn kóng, “Lâi, lán kóaⁿ-kín lâi kong-kek in. Goán í-keng thàm-cha--kè; hit-ê só͘-chāi si̍t-chāi chin hó. Lín m̄-thang tiàm chia thèng-hāu, tio̍h sûi-sî lâi kong-chiàm hit-ê thó͘-tōe chòe lán ê sán-gia̍p.

10Lín kàu hia, chiū ōe khòaⁿ-tio̍h an-jiân khiā-khí ê jîn-bîn, thó͘-tōe khui-khoah, bu̍t-sán koh hong-hù; Siōng-tè í-keng chiong hit-ê só͘-chāi kau tī lán ê chhiú.”

11Tùi án-ni, Tān chi-cho̍k la̍k-pah ê lâng tòa kun-khì, tùi Só-la kap Í-si̍t-tô chhut-hoat.

12In tī Iû-tāi ê Ki-lia̍t Iâ-lîm sai-pêng chat-iâⁿ; só͘-í hit-ê só͘-chāi kàu kin-á-ji̍t iáu kiò-chòe Má-hap-nî Tān.

13In tùi hia keng-kè Í-hoat-liân soaⁿ-khu lâi kàu Bí-ka in tau.

14Hit gō͘ ê khì cheng-thàm La-ek tōe-khu ê lâng, kā in kâng chi-cho̍k ê lâng kóng, “Lín kiám chai chiah-ê chhù lāi-bīn ū í-hut-tek, ka-cho̍k sîn-siōng, tiau-khek ê sîn-siōng, kap chù ê sîn-siōng? Taⁿ lín tio̍h phah-sǹg, khòaⁿ beh án-chóaⁿ chòe.”

15In chiū oat-khì Bí-ka ê chhù, ji̍p-khì hit-ê siàu-liân ê Lī-bī-lâng ê chhù-lāi, kā i chhéng-an.

16Tān chi-cho̍k hit la̍k-pah ê tòa kun-khì ê lâng lóng khiā tī mn̂g-kháu.

17Cheng-thàm hit-ê tōe ê gō͘ ê lâng ji̍p--khì, chiong tiau-khek ê sîn-siōng, í-hut-tek, ka-cho̍k sîn-siōng, kap chù ê sîn-siōng lóng the̍h--khì; chè-si kap tòa kun-khì hit la̍k-pah ê lâng chòe-hé khiā tī mn̂g-kháu.

18Hit gō͘ ê lâng ji̍p-khì Bí-ka ê chhù, the̍h tiau-khek ê sîn-siōng, í-hut-tek, ka-cho̍k sîn-siōng, kap chù ê sîn-siōng ê sî, chè-si mn̄g in kóng, “Lín teh chhòng siáⁿ?”

19In kā i kóng, “Tiām-tiām, m̄-thang kóng-ōe, tè goán lâi-khì, chòe goán ê su-hū, goán ê chè-si. Lí chòe chi̍t ê ka-cho̍k ê chè-si khah hó, á-sī chòe Í-sek-lia̍t chi̍t ê chi-cho̍k chi̍t ê chong-cho̍k ê chè-si khah hó?”

20Chè-si chin hoaⁿ-hí, chiū the̍h í-hut-tek, ka-cho̍k sîn-siōng, kap tiau-khek ê sîn-siōng, kap hiah-ê lâng chòe-hé khì.

21In chiū chhut-hoat lī-khui hia, hō͘ gín-á, cheng-siⁿ, châi-bu̍t chòe thâu-chêng.

22Lī-khui Bí-ka ê chhù í-keng chin hn̄g, Bí-ka chū-chi̍p i ê chhù-piⁿ, tui-jip Tān ê lâng.

23In tōa-siaⁿ hoah Tān ê lâng. Tān ê lâng oa̍t-thâu, mn̄g Bí-ka kóng, “Lí chū-chi̍p chiah-ê lâng beh chhòng sím-mi̍h?”

24I kóng, “Góa chō ê sîn-bêng, chhiàⁿ ê chè-si, lín lóng kā góa tòa-tòa--khì, góa iáu chhun sím-mi̍h? Lín ná iáu-teh mn̄g góa kóng ‘Lí beh chhòng sím-mi̍h’?”

25 Tān ê lâng kā Bí-ka kóng, “Lí kā góa tiām--khì, chiah bián pháiⁿ sèng-tē ê lâng kā lí kong-kek, lí kap lín choân-ke lóng ōe bô-miā.”

26Tān ê lâng chiū chòe in khì. Bí-ka khòaⁿ-tio̍h in pí i khah kiông, chiū oa̍t-tńg-sin tò-khì in tau.

27 Tān ê lâng tòa Bí-ka chō ê sîn-siōng kap i ê chè-si lâi kàu La-ek, ēng to thâi-sí hiah-ê pêng-an khiā-khí ê chū-bîn, koh pàng-hé sio chit-ê siâⁿ.

28Chit-ê siâⁿ tī Pek Lī-ha̍p Soaⁿ-kok hù-kūn, lī Se-tùn chin hn̄g, koh bô kap jīm-hô-lâng lâi-óng, só͘-í bô lâng lâi kā in kái-kiù.

29Tān ê lâng chiū tiông-kiàn chit-ê siâⁿ, tī hia khiā-khí. In kā chit-ê siâⁿ hō-miâ kiò-chòe Tān, sī ēng in ê chó͘-sian Í-sek-lia̍t ê kiáⁿ Tān ê miâ hō--ê; chit-ê siâⁿ khah-chá ê miâ sī La-ek.

30Tān ê lâng chiū tī hia ūi ka-kī chhāi hit-ê tiau-khek ê sîn-siōng. Mô͘-se ê sun, Kek-sūn ê kiáⁿ Iok-ná-tan, kap i ê hō͘-tāi, chòe Tān chi-cho̍k ê chè-si, it-ti̍t kàu Í-sek-lia̍t-lâng siū-lia̍h hit-ji̍t.

31Siōng-tè ê hōe-bō͘ tī Sī-lô hit-tōaⁿ kî-kan, Tān ê lâng mā ūi ka-kī chhāi Bí-ka tiau-khek ê sîn-siōng.

Sū-su-kì 18 - 現代台語譯本羅馬字版(TTVR)-闽南语

Learn More About Us