Lī-bī-kì 20

Lī-bī-kì 20 - 現代台語譯本羅馬字版(TTVR)-闽南语

Sí-hêng ê Tiâu-lē

1Siōng Chú koh bēng-lēng Mô͘-se

2tio̍h tùi Í-sek-lia̍t-lâng soan-pò͘:

Bô-lūn sī Í-sek-lia̍t-lâng, á-sī kià-ku tī lín tiong-kan ê gōa-cho̍k-lâng, nā ū lâng chiong ka-kī ê kiáⁿ cha-bó͘-kiáⁿ hiàn hō͘ Mô͘-lo̍k, it-tēng tio̍h kā i chhú-sí; hit só͘-chāi ê lâng tio̍h ēng chio̍h-thâu kā i tìm-sí.

3Góa mā beh tùi hit-ê lâng pìⁿ-bīn, kā i tùi jîn-bîn ê tiong-kan kek-chhut, in-ūi i chiong kiáⁿ cha-bó͘-kiáⁿ hiàn hō͘ Mô͘-lo̍k, phah lâ-sâm góa ê sèng-só͘, siat-to̍k góa ê sèng-miâ.

4Hit só͘-chāi ê lâng nā khòaⁿ-tio̍h hit-ê lâng hiàn kiáⁿ cha-bó͘-kiáⁿ hō͘ Mô͘-lo̍k, m̄-kú tìⁿ m̄ chai, bô kā i chhú-sí,

5góa beh tùi hit-ê lâng kap i ê ka-cho̍k pìⁿ-bīn, chiong i kap tè i khì pài Mô͘-lo̍k kiâⁿ siâ-îm ê lâng, lóng tùi jîn-bîn ê tiong-kan kek-chhut.

6Nā ū lâng khì chhē khan-bông--ê á-sī tâng-ki toh-thâu, tè in khì pài ngó͘-siōng kiâⁿ siâ-îm, góa beh tùi hit-ê lâng pìⁿ-bīn, kā i tùi jîn-bîn ê tiong-kan kek-chhut.

7Só͘-í lín tio̍h hun-pia̍t-choh-sèng, chiâⁿ-chòe sèng-kiat, in-ūi góa sī Siōng Chú — lín ê Siōng-tè.

8Lín tio̍h chhiat-si̍t chun-hêng góa ê kui-lē. Góa sī kā lín hun-pia̍t-choh-sèng ê Siōng Chú.

9Nā ū lâng chiù-chó͘ pē-bú, it-tēng tio̍h kā i chhú-sí; i tio̍h tùi ka-kī ê chōe hū chek-jīm.

10Nā ū lâng kap pa̍t-lâng ê bó͘ su-thong, it-tēng tio̍h kā hit nn̄g ê lâng chhú-sí.

11Kap lāu-pē ê bó͘ su-thong, chiū-sī bú-jio̍k ka-kī ê lāu-pē, it-tēng tio̍h kā hit nn̄g ê lâng chhú-sí; in tio̍h tùi ka-kī ê chōe hū chek-jīm.

12Nā ū lâng kap sin-pū su-thong, it-tēng tio̍h kā in chhú-sí; in chòe loān-lûn ê tāi-chì, tio̍h tùi ka-kī ê chōe hū chek-jīm.

13Nā ū ta-po͘-lâng kap ta-po͘-lâng ū sèng-koan-hē, chhin-chhiūⁿ kap hū-jîn-lâng kâng-khoán, chòe thang iàm-ò͘ⁿ ê sū, it-tēng tio̍h kā in chhú-sí; in tio̍h tùi ka-kī ê chōe hū chek-jīm.

14Nā ū lâng chhōa-bó͘, koh chhōa i ê tiūⁿ-ḿ, che sī loān-lûn kiàn-siàu ê sū; chit saⁿ ê lâng, tio̍h kā in sio-sí, chiah bián lín tiong-kan ū chit-khoán loān-lûn kiàn-siàu ê sū.

15Nā ū lâng kap cheng-siⁿ kau-ha̍p, it-tēng tio̍h kā i chhú-sí, mā tio̍h kā hit-chiah cheng-siⁿ thâi-sí.

16Nā ū hū-jîn-lâng kap cheng-siⁿ kau-ha̍p, it-tēng tio̍h kā i kap hit-chiah cheng-siⁿ chhú-sí; in tio̍h tùi ka-kī ê chōe hū chek-jīm.

17Lâng nā chhōa ka-kī ê chí-bē, bô-lūn kâng-pē--ê á-sī kâng-bú--ê, che sī kiàn-siàu ê tāi-chì; tio̍h chiong in tùi jîn-bîn ê tiong-kan kek-chhut. I kap ka-kī ê chí-bē ū loān-lûn ê koan-hē, tio̍h tùi ka-kī ê chōe hū chek-jīm.

18Nā ū lâng kap keng-kî tiong ê hū-jîn-lâng ū sèng-koan-hē, tio̍h chiong in tùi jîn-bîn ê tiong-kan kek-chhut, in-ūi in ûi-hoān kiat-chēng ê tiâu-lē.

19M̄-thang kap a-î á-sī a-ko͘ ū sèng-koan-hē, che sī bú-jio̍k kut-jio̍k chì-chhin; in tio̍h tùi ka-kī ê chōe hū chek-jīm.

20Nā ū lâng kap i ê a-chím á-sī a-ḿ ū sèng-koan-hē, chiū-sī bú-jio̍k i ê a-chek á-sī a-peh; in tio̍h tùi ka-kī ê chōe hū chek-jīm, chi̍t-sì-lâng bô hō͘-sû.

21Nā ū lâng chhōa ka-kī hiaⁿ-tī ê bó͘, che sī bú-jio̍k i ê hiaⁿ-tī, sī thang iàm-ò͘ⁿ ê sū; in it-tēng bô hō͘-sû.

22Lín tio̍h chhiat-si̍t chun-hêng góa só͘-ū ê kui-lē kap bēng-lēng, chiah bián góa chhōa lín ji̍p-khì khiā-khí ê tōe kā lín thò͘--chhut-lâi.

23Góa tī lín ê bīn-chêng kóaⁿ--chhut-khì ê jîn-bîn, lín m̄-thang o̍h in ê hong-sio̍k; in-ūi in ū chòe chiah-ê sū, só͘-í góa iàm-ò͘ⁿ in.

24Góa bat kā lín kóng, góa beh chiong chit-tè lâu lin kap bi̍t ê tōe sù hō͘ lín, hō͘ lín sêng-chiap chòe sán-gia̍p. Góa sī Siōng Chú — lín ê Siōng-tè, tùi bān-cho̍k ê tiong-kan kā lín hun-pia̍t--chhut-lâi.

25Só͘-í, lín tio̍h hun-pia̍t chheng-khì kap bô chheng-khì ê cháu-siù kap chiáu-lūi. Góa tēng-chòe bô chheng-khì--ê, bô-lūn sī cháu-siù, chiáu-lūi, á-sī tī thô͘-kha teh pê ê tōng-bu̍t, lín m̄-thang in-ūi in hō͘ ka-kī chiâⁿ-chòe thang iàm-ò͘ⁿ--ê.

26Lín tio̍h kui-sio̍k góa chiâⁿ-chòe sèng, in-ūi góa Siōng Chú sī sèng, ū chiong lín tùi bān-cho̍k ê tiong-kan hun-pia̍t--chhut-lâi, chòe góa ê chú-bîn.

27Khan-bông--ê, á-sī tâng-ki toh-thâu, bô-lūn sī lâm sī lú, it-tēng tio̍h kā in chhú-sí, ēng chio̍h-thâu kā in tìm-sí; in tio̍h tùi ka-kī ê chōe hū chek-jīm.

Lī-bī-kì 20 - 現代台語譯本羅馬字版(TTVR)-闽南语

Learn More About Us