Si-phian 79 - 現代台語譯本羅馬字版(TTVR)-闽南语

A-sat ê si.Kiû Chú Kái-kiù Goán ê Kok-ka

1Siōng-tè ah, gōa-pang-lâng chhim-chiàm lí ê léng-thó͘,

phah lâ-sâm lí ê sèng-tiān,

hō͘ Iâ-lō͘-sat-léng pìⁿ-chòe hong-hòe ê só͘-chāi.

2In chiong lí po̍k-jîn ê sin-si kau hō͘ khong-tiong ê pe-chiáu chòe chia̍h-mi̍h,

chiong lí sèng ê chú-bîn ê bah hō͘ tōe-chiūⁿ ê iá-siù thun-chia̍h.

3In tī Iâ-lō͘-sat-léng chiu-ûi lâu lí chú-bîn ê huih chhin-chhiūⁿ teh piàⁿ-chúi,

mā bô lâng kā in bâi-chòng.

4Goán siū-tio̍h keh-piah-kok lêng-jio̍k,

hō͘ sì-ûi ê lâng léng-chhiò ki-chhì.

5Siōng Chú ah, lí beh siū-khì jōa kú, kiám beh kàu éng-oán?

Lí ê tōa siū-khì chhin-chhiūⁿ hé beh to̍h jōa kú?

6Kiû lí chiong lí ê siū-khì piàⁿ-lo̍h tī hiah-ê m̄ bat lí ê gōa-pang,

í-ki̍p hiah-ê bô kiû-kiò lí ê miâ ê lia̍t-kok.

7In-ūi in thun-chia̍h Ngá-kok,

hō͘ i khiā-khí ê só͘-chāi pha-hng.

8Kiû lí m̄-thang in-ūi goán chó͘-sian hoān ê chōe hêng-hoa̍t goán;

kiû lí chiong lí ê chû-pi kín-kín si-lo̍h hō͘ goán,

in-ūi goán hām-lo̍h choa̍t-bāng ê tōe-pō͘.

9Kiù goán ê Siōng-tè ah, kiû lí in-ūi lí ê miâ ê êng-kng pang-chān goán;

in-ūi lí ê miâ ê iân-kò͘ kiù goán, sià-bián goán ê chōe.

10Ná beh hō͘ lia̍t-kok kóng, “In ê Siōng-tè tī tó-ūi?”

Kiû lí ūi-tio̍h lí po̍k-jîn lâu ê huih sin-oan,

hō͘ gōa-pang-lâng chai, koh hō͘ goán chhin-ba̍k khòaⁿ--kìⁿ.

11Kiû lí hō͘ siû-hoān ê thó͘-khùi thàu kàu lí ê bīn-chêng,

chiàu lí ê tōa koân-lêng, pó-chûn siū phòaⁿ sí-hêng ê lâng ê sìⁿ-miā.

12Chú ah, goán keh-piah-kok tùi lí ê lêng-jio̍k,

kiû lí ke-thiⁿ chhit pē hêng hō͘ in.

13Án-ni, goán chòe lí ê chú-bîn, lí chháu-po͘ ê iûⁿ ê lâng,

ōe kám-siā lí kàu éng-oán,

chheng-chàn lí ê miâ kàu bān sè-tāi.

Learn More About Us