Si-phian 148 - 現代台語譯本羅馬字版(TTVR)-闽南语

Ú-tiū Lóng Tio̍h Chheng-chàn Siōng Chú

1Ha-lé-lú-iah, chheng-chàn Siōng Chú!

Lín tio̍h tùi thiⁿ-téng chheng-chàn Siōng Chú,

tī koân ê só͘-chāi o-ló I.

2I ê chèng sù-chiá ah, lín tio̍h chheng-chàn I.

I ê chèng thian-kun ah, lín tio̍h o-ló I.

3Ji̍t kap ge̍h ah, lín tio̍h chheng-chàn I;

hoat-kng ê chhiⁿ-sîn ah, lín lóng tio̍h o-ló I.

4Thiⁿ-téng ê thiⁿ, kap thiⁿ téng-bīn ê chúi ah,

lín tio̍h o-ló I.

5Chiah-ê lóng tio̍h chheng-chàn Siōng Chú ê miâ,

in-ūi I chi̍t-ē bēng-lēng, it-chhè chiū chō-sêng.

6I chiong chiah-ê an-tì hó-sè, éng-oán bōe piàn-chhian;

I tēng kui-lē, éng-oán bōe hòe-bô.

7Lín tio̍h tùi tōe-chiūⁿ chheng-chàn Siōng Chú;

tōa-hî kap só͘-ū ê chhim-hái,

8sih-nà kap peng-pha̍uh, seh kap hûn-bū,

thiaⁿ I ê ōe ê kông-hong,

lín lóng tio̍h chheng-chàn Siōng Chú!

9Só͘-ū ê tōa-soaⁿ kap sió-soaⁿ,

ké-chí-chhiū kap pek-hiuⁿ-chhiū,

10só͘-ū ê iá-siù kap cheng-siⁿ,

thâng-thōa kap pe-chiáu,

lín lóng tio̍h chheng-chàn Siōng Chú!

11Tōe-chiūⁿ só͘-ū ê kun-ông kap jîn-bîn,

kùi-cho̍k kap thóng-tī-chiá,

12siàu-liân-lâng kap chāi-sek-lú,

lāu-lâng kap gín-á,

lín lóng tio̍h chheng-chàn Siōng Chú!

13Lín chiah-ê lóng tio̍h chheng-chàn Siōng Chú ê miâ,

in-ūi chí-ū I ê miâ siū chun-chông,

I ê êng-kng pôaⁿ-kè thiⁿ kap tōe.

14I hō͘ I ê chú-bîn kiông-sēng,

hō͘ I sèng ê chú-bîn lóng chheng-chàn I,

chiū-sī hiah-ê chhin-kūn Chú ê Í-sek-lia̍t chú-bîn.

Ha-lé-lú-iah, chheng-chàn Siōng Chú!

Learn More About Us