Bîn-sò͘-kì 32

Bîn-sò͘-kì 32 - 現代台語譯本羅馬字版(TTVR)-闽南语

Iok-tàn-hô Tang-pêng ê Chi-cho̍k(Sin 3.12-22)

1 Lū-piān kap Ka-tek nn̄g chi-cho̍k ê cheng-siⁿ hui-siông chōe. In khòaⁿ-tio̍h Ngá-siā kap Ki-lia̍t nn̄g ê tōe-khu sek-ha̍p chhī in ê cheng-siⁿ,

2chiū khì kìⁿ Mô͘-se, chè-si Í-lī-a-sat, kap hōe-chiòng ê siú-léng, kóng,

3-4“Siōng Chú hō͘ Í-sek-lia̍t-lâng kong-chiàm ê A-tha-lio̍k, Tí-pún, Ngá-siā, Lêng-la, Hi-si̍t-pún, Í-lī-a-lī, Sī-pan, Nî-pho, kap Pí-ún, sī chin sek-ha̍p chhī cheng-siⁿ ê só͘-chāi. Lí ê po̍k-jîn tú-tú ū chin chōe cheng-siⁿ.”

5In koh kóng, “Goán nā tit-tio̍h lí ê un-hūi, chhiáⁿ lí chiong chit-ê tōe-khu hō͘ lí ê po̍k-jîn chòe sán-gia̍p, hō͘ goán m̄-bián kè Iok-tàn-hô.”

6 Mô͘-se ìn Ka-tek kap Lū-piān ê kiáⁿ-sun kóng, “Lín kiám beh pàng lín ê hiaⁿ-tī kè-khì kau-chiàn, ka-kī lâu tiàm chia?

7Lín sī-án-chóaⁿ beh hō͘ Í-sek-lia̍t-lâng hoe-sim sit-chì, m̄-káⁿ kè Iok-tàn-hô, ji̍p-khì Siōng Chú sù hō͘ in ê tōe?

8Tī Ka-te-su Pa-nî-a ê sî, góa phài lín lāu-pē hit-tāi ê lâng khì thàm-cha hit-ê tōe, in mā-sī án-ni.

9In khì kàu Í-si̍t-kok Soaⁿ-kok, thàm-cha chit-ê tōe liáu-āu tńg--lâi, chiū hō͘ Í-sek-lia̍t-lâng hoe-sim sit-chì, hāi in bô beh ji̍p-khì Siōng Chú sù hō͘ in ê tōe.

10Hit-sî, Siōng Chú hoat tōa siū-khì, li̍p-sè kóng,

11‘Só͘-ū tùi Ai-ki̍p chhut--lâi, jī-cha̍p hè í-siōng ê lâng, it-tēng bōe-tàng khòaⁿ-tio̍h góa tùi A-pek-la-hán, Í-sat, Ngá-kok li̍p-sè beh sù hō͘ in ê tōe; in-ūi in bô it-sim-it-ì kun-tè góa;

12chí-ū Ki-nî-sé chong-cho̍k Iâ-hu-nî ê kiáⁿ Ka-le̍k kap Lūn ê kiáⁿ Iok-su-a ōe-tàng ji̍p--khì, in-ūi in it-sim-it-ì kun-tè góa.’

13Siōng Chú tùi Í-sek-lia̍t-lâng hoat siū-khì, hō͘ in tī khòng-iá liû-lōng sì-cha̍p nî, thèng-hāu kàu ûi-pōe Siōng Chú hit-tāi lóng sí-liáu.

14Taⁿ, lín chit-tīn chōe-jîn kèng-jiân beh sòa-chiap lín lāu-pē hit-tāi, ke-thiⁿ Siōng Chú tùi Í-sek-lia̍t-lâng ê siū-khì.

15Lín nā oa̍t-cháu bô beh sūn-thàn Siōng Chú, I chiū ōe kā Í-sek-lia̍t-lâng pàng tī khòng-iá, án-ni, lín ōe hō͘ chit-ê bîn-cho̍k lóng bia̍t-bông.”

16Chit nn̄g ê chi-cho̍k ê lâng kiâⁿ-óa Mô͘-se, tùi i kóng, “Goán tī chia sī kan-ta beh ūi cheng-siⁿ tah iûⁿ-tiâu, ūi goán ê bó͘-kiáⁿ khí siâⁿ,

17goán ōe gia̍h kun-khì, chòe Í-sek-lia̍t-lâng ê sian-hong, chhōa in khì kàu pun hō͘ in ê tōe. Put-kò, goán ê bó͘-kiáⁿ tio̍h tòa tī kian-kò͘ ê siâⁿ, chiah bián siū chit só͘-chāi ê lâng chhim-hoān.

18Tī só͘-ū ê Í-sek-lia̍t-lâng lóng tit-tio̍h in ê sán-gia̍p í-chêng, goán bōe tńg-lâi goán ê chhù.

19Koh goán kap in kè Iok-tàn-hô, bōe khì pun sán-gia̍p, in-ūi goán ê sán-gia̍p chiū-sī tī Iok-tàn-hô tang-pêng.”

20 Mô͘-se chiū tùi in kóng, “Lín nā beh án-ni chòe, beh tī Siōng Chú bīn-chêng tòa kun-khì khì kau-chiàn,

21lín só͘-ū tòa kun-khì ê lâng tio̍h tī Siōng Chú bīn-chêng kè Iok-tàn-hô, ti̍t-kàu Siōng Chú chiong I ê tùi-te̍k kóaⁿ--chhut-khì,

22kàu I cheng-ho̍k hit-ê tōe, lín chiah thang tò--lâi. Án-ni, lín tùi Siōng Chú, tùi Í-sek-lia̍t-lâng ê chek-jīm chiū sǹg oân-sêng, chit-tè tōe tī Siōng Chú bīn-chêng chiah hō͘ lín chòe sán-gia̍p.

23Lín nā bô án-ni chòe, chiū-sī tek-chōe Siōng Chú; lín tio̍h chai, lín ōe in-ūi lín ê chōe siū hêng-hoa̍t.

24Taⁿ, lín thang ūi-tio̍h lín ê bó͘-kiáⁿ khí siâⁿ, ūi-tio̍h iûⁿ-kûn tah iûⁿ-tiâu, m̄-kú lín tio̍h chiàu lín só͘ kóng--ê khì chòe.”

25 Ka-tek kap Lū-piān nn̄g chi-cho̍k ê lâng tùi Mô͘-se kóng, “Lí ê po̍k-jîn beh chiàu goán ê chú ê bēng-lēng khì chòe.

26Goán ê bó͘, kiáⁿ, iûⁿ-kûn, cheng-siⁿ, lóng beh lâu tī Ki-lia̍t chiah-ê siâⁿ.

27Lí ê po̍k-jîn, só͘-ū ōe tòa kun-khì khì sio-thâi--ê, lóng beh chiàu goán ê chú só͘ kóng ê ōe, tī Siōng Chú ê bīn-chêng kè-hô khì kau-chiàn.”

28 Mô͘-se chiū ūi-tio̍h in hoan-hù chè-si Í-lī-a-sat, Lūn ê kiáⁿ Iok-su-a, í-ki̍p Í-sek-lia̍t ta̍k chi-cho̍k ê cho̍k-tiúⁿ,

29kóng, “Ka-tek kap Lū-piān nn̄g chi-cho̍k só͘-ū tòa kun-khì--ê, nā kap lín chòe-hé tī Siōng Chú ê bīn-chêng kè Iok-tàn-hô khì kau-chiàn, lín cheng-ho̍k hit-ê tōe liáu-āu, tio̍h chiong Ki-lia̍t tōe-khu hō͘ in chòe sán-gia̍p.

30M̄-kú, in nā bô beh tòa kun-khì kap lín chòe-hé kè-hô, in kan-ta ōe-tàng tī Ka-lâm-tōe kap tāi-ke chòe-hé pun sán-gia̍p.”

31 Ka-tek kap Lū-piān nn̄g chi-cho̍k ê lâng ìn kóng, “Siōng Chú án-chóaⁿ bēng-lēng goán chiah-ê po̍k-jîn, goán chiū chiàu án-ni chòe.

32Goán beh tòa kun-khì tī Siōng Chú ê bīn-chêng kè-hô ji̍p-khì Ka-lâm-tōe, m̄-kú Iok-tàn-hô chit-pêng ê tōe tio̍h hō͘ goán chòe sán-gia̍p.”

33 Mô͘-se chiong A-mô͘-lī-ông Se-hông kap Pa-san-ông Go̍k ê kok, chiū-sī in ê kok-thó͘ kap kéng-lāi ê siâⁿ, pun hō͘ Ka-tek kap Lū-piān nn̄g ê chi-cho̍k, í-ki̍p Iok-sek ê hō͘-tāi Má-ná-se pòaⁿ chi-cho̍k.

34Ka-tek ê hō͘-tāi tiông-kiàn Tí-pún, A-tha-lio̍k, A-lô-ní,

35A-tha-lio̍k Sok-hoán, Ngá-siā, Iok-pí-hap,

36Pek Lêng-la, Pek Hap-lân chiah-ê kian-kò͘ ê siâⁿ, koh khí iûⁿ-tiâu.

37Lū-piān ê hō͘-tāi tiông-kiàn Hi-si̍t-pún, Í-lī-a-lī, Ki-lia̍t-têng,

38Nî-pho, Pa-le̍k Bián (chit nn̄g ê siâⁿ ê miâ ū kái--kè), kap Se-pí-má. In kā chiah-ê tiông-kiàn ê siâⁿ hō sin ê miâ.

39 Má-ná-se ê kiáⁿ Má-kiat ê hō͘-tāi khì Ki-lia̍t, chiàm-léng hit-ê tōe-khu, chiong goân-lâi tòa tī hia ê A-mô͘-lī-lâng kóaⁿ--chhut-khì.

40Mô͘-se chiū chiong Ki-lia̍t hō͘ Má-ná-se ê hō͘-tāi Má-kiat chong-cho̍k; in chiū tī hia khiā-khí.

41Má-ná-se ê hō͘-tāi Gâi-ní khì kong-chhú Ki-lia̍t tōe-khu ê chng-siā, kā hiah-ê chng-siā hō-chòe Hap-o-te̍k Gâi-ní

42Ná-pa kong-chiàm Ki-la̍p kap hù-kūn ê chng-siā; ēng ka-kī ê miâ kā hit-ê só͘-chāi hō-chòe Ná-pa.

Bîn-sò͘-kì 32 - 現代台語譯本羅馬字版(TTVR)-闽南语

Learn More About Us