Le̍k-tāi-chì Hā-koàn 2

Le̍k-tāi-chì Hā-koàn 2 - 現代台語譯本羅馬字版(TTVR)-闽南语

Só͘-lô-bûn Chún-pī Khí-chō Sèng-tiān(1 Ông 5.1-18)

1 Só͘-lô-bûn koat-tēng beh ūi-tio̍h Siōng Chú ê miâ khí sèng-tiān, koh ūi ka-kī ê ông-kok khí kiong-tiān.

2Só͘-lô-bûn chiū tiàu-chi̍p ūn-poaⁿ ê kang-lâng chhit-bān, tī soaⁿ--ni̍h phah-chio̍h--ê poeh-bān, tok-kang--ê saⁿ-chheng la̍k-pah.

3 Só͘-lô-bûn phài lâng khì kìⁿ Thài-ní-ông Hi-lân, kóng, “Lí bat ūn pek-hiuⁿ-chhâ hō͘ góa ê lāu-pē Tāi-pi̍t khí kiong-tiān khiā-khí, chhiáⁿ lí mā án-ni tùi-thāi góa.

4Hiān-chāi, góa beh ūi-tio̍h Siōng Chú — góa ê Siōng-tè ê miâ khí sèng-tiān, hun-pia̍t-choh-sèng hiàn hō͘ I, thang chiàu Í-sek-lia̍t-lâng éng-oán ê kui-lē, tī I ê bīn-chêng sio-hiuⁿ, siông-siông pâi hiàn-chè ê piáⁿ, ta̍k chá-àm, An-hioh-ji̍t, chhoe-it, kap Siōng Chú — goán ê Siōng-tè só͘ tēng ê choeh-kî, hiàn sio-hòa-chè.

5Góa só͘ beh khí ê sèng-tiān chin tōa, in-ūi goán ê Siōng-tè chin úi-tāi, iâⁿ-kè só͘-ū ê sîn-bêng.

6Thiⁿ kap thiⁿ-téng ê thiⁿ to bô-kàu thang hō͘ I khiā-khí, siáⁿ-lâng ōe-tàng ūi-tio̍h I khí sèng-tiān? Góa sǹg sím-mi̍h thang ūi-tio̍h I khí sèng-tiān? Góa put-kò sī khí chi̍t keng ōe-tàng tī I bīn-chêng sio-hiuⁿ hiàn-chè ê tiān nā-tiāⁿ.

7Taⁿ chhiáⁿ lí phài chi̍t ê chin gâu ēng kim, gûn, tâng, thih, kap chí-sek, chu-âng-sek, nâ-sek ê se chòe kang-gē, koh chin gâu tiau-khek ê sai-hū lâi góa chia, thang kap góa ê lāu-pē Tāi-pi̍t só͘ chún-pī tī Iû-tāi í-ki̍p Iâ-lō͘-sat-léng hiah-ê gâu ê sai-hū chòe-hé chòe kang.

8Koh chhiáⁿ lí tùi Lê-pa-lūn ūn pek-hiuⁿ-chhiū, siông-chhiū, tôaⁿ-hiuⁿ-chhiū ê chhâ-liāu lâi hō͘ góa; góa chai lí ê kang-lâng gâu chhò Lê-pa-lūn ê chhiū. Góa ōe phài lâng khì hia̍p-chō͘ lí ê kang-lâng.

9Chhiáⁿ ūi-tio̍h góa chún-pī khah chōe bo̍k-châi, in-ūi góa beh khí ê sèng-tiān chin tōa koh tông-hông.

10Lí ê kang-lâng chhò-chhiū, góa ōe hō͘ in sió-be̍h nn̄g-chheng kong-tùn, tōa-be̍h nn̄g-chheng kong-tùn, chiú sì-cha̍p-bān kong-seng, iû sì-cha̍p-bān kong-seng.”

11 Thài-ní-ông Hi-lân kā Só͘-lô-bûn hôe-phoe, kóng, “In-ūi Siōng Chú thiàⁿ I ê chú-bîn, só͘-í siat-li̍p lí chòe in ê ông.”

12Hi-lân koh kóng, “Chhòng-chō thiⁿ tōe ê Siōng Chú — Í-sek-lia̍t ê Siōng-tè eng-kai siū chheng-chàn! I siúⁿ-sù Tāi-pi̍t-ông chi̍t ê ū tì-hūi ê kiáⁿ, hō͘ i ū kiàn-sek chhong-bêng, thang ūi-tio̍h Siōng Chú khí sèng-tiān, koh ūi ka-kī khí kiong-tiān.

13Taⁿ góa phài chi̍t ê gâu koh chhong-bêng ê lâng khì, i sī góa ê sai-hū Hō͘-lân.

14I sī Tān chi-cho̍k chi̍t ê hū-jîn-lâng ê kiáⁿ, lāu-pē sī Thài-ní-lâng; i chin gâu ēng kim, gûn, tâng, thih, chio̍h, chhâ, kap chí-sek, nâ-sek, iù-môa, chu-âng-sek ê se chòe kang-gē, mā chin gâu tiau-khek, koh ōe-hiáu siat-kè lâng kau hō͘ i ê ta̍k-khoán tô͘-àn; lí thang hō͘ i kap lí gâu ê sai-hū, í-ki̍p lí ê lāu-pē, góa ê chú Tāi-pi̍t, gâu ê sai-hū chòe-hé chòe kang.

15Taⁿ góa ê chú só͘ kóng ê sió-be̍h, tōa-be̍h, iû, chiú, chhiáⁿ ūn-lâi hō͘ chiah-ê kang-lâng.

16Goán ōe chiàu lí só͘ su-iàu--ê, tùi Lê-pa-lūn chhò-chhiū, pa̍k chòe kui-pâi phû tī hái--ni̍h, ūn kàu Iok-phà; lí chiū thang tùi hia ūn-khì Iâ-lō͘-sat-léng.”

17 Só͘-lô-bûn chiàu i ê lāu-pē Tāi-pi̍t só͘-chòe ê hō͘-kháu-phó͘-cha, koh tiám-sǹg tòa tī Í-sek-lia̍t-tōe só͘-ū ê gōa-cho̍k-lâng, lóng-chóng ū cha̍p-gō͘-bān saⁿ-chheng la̍k-pah lâng.

18I hō͘ chhit-bān lâng chòe ūn-poaⁿ ê kang-lâng, poeh-bān lâng tī soaⁿ--ni̍h phah-chio̍h, saⁿ-chheng la̍k-pah lâng kàm-tok in chòe kang.

Le̍k-tāi-chì Hā-koàn 2 - 現代台語譯本羅馬字版(TTVR)-闽南语

Learn More About Us