Si-phian 65 - 現代台語譯本羅馬字版(TTVR)-闽南语

Tāi-pi̍t ê si, kau hō͘ sèng-ga̍k-tiúⁿ.Chheng-chàn Siōng-tè ê Kiù-un

1Siōng-tè ah, lâng eng-kai tī Sek-an chheng-chàn lí,

tùi lí siā só͘ hē ê goān.

2Thiaⁿ kî-tó ê Chú ah,

choân jîn-lūi lóng beh chiū-kūn lí.

3Chōe ap-tó góa;

m̄-kú goán ê kè-sit lí lóng beh sià-bián.

4Lí só͘ kéng-soán, hō͘ in chhin-kūn lí, tòa tī lí tiān ê tiâⁿ ê lâng chin ū hok-khì!

Goán beh in-ūi lí ê chhù, lí ê sèng-tiān ê hok-khì sim-móa-ì-chiok!

5Chín-kiù goán ê Siōng-tè ah,

lí ēng thang kiaⁿ-ùi ê chok-ûi, si-hêng kong-gī lâi ìn-tap goán;

tōe-ke̍k kap hái-bīn hn̄g-hn̄g ê lâng lóng beh óa-khò lí.

6Lí chiong-hián lí ê koân-lêng,

ēng khùi-la̍t hō͘ soaⁿ-niá an-ún khiā-chāi.

7Hái iô-choah, hái-éng hōa-hōa-háu, bān-bîn háng-hoah,

lí hō͘ in lóng pêng-chēng.

8Khiā-khí tī tōe chīn-thâu ê lâng ōe in-ūi lí ê sîn-jiah kiaⁿ-ùi;

ji̍t chhut ji̍t lo̍h ê só͘-chāi, lí hō͘ in hoan-ho͘.

9Lí koàn-kò͘ thó͘-tōe, lo̍h-hō͘ koàn-ak, hō͘ thó͘-tōe chin pûi.

Siōng-tè ê hô, chúi móa-móa;

lí án-ni chún-pī thó͘-tōe, kiong-kip ngó͘-kok.

10Lí koàn-ak chhân-hn̂g,

hō͘ chúi móa kau móa lêng,

hō͘ thô͘-bah nńg-nńg.

Lí sù-hok hō͘ só͘ chai-chèng--ê lóng tōa-châng.

11Lí ēng hong-siu chòe nî-tang ê ông-koan;

lí keng-kè ê lō͘ ū iû teh tih,

12liân khòng-iá ê chháu-po͘ to ū iû teh tih.

Soaⁿ-thâu ēng hoaⁿ-hí chòe tòa hâ,

13chháu-po͘ ū iûⁿ-kûn chòe saⁿ chhēng,

soaⁿ-kok ū ngó͘-kok chòe gōa-thò moa;

in lóng hoaⁿ-hí chhut-siaⁿ gîm-si.

Learn More About Us