Si-phian 139

Si-phian 139 - 現代台語譯本羅馬字版(TTVR)-闽南语

Tāi-pi̍t ê si, kau hō͘ sèng-ga̍k-tiúⁿ.Bû-só͘-put-ti, Bû-só͘-put-chāi ê Siōng Chú

1Siōng Chú ah, lí ū kàm-chhat góa, bat góa.

2Góa ê it-kú-it-tōng lí lóng chai;

tùi chin hn̄g lí mā khòaⁿ ōe chhut góa ê sim-su.

3Góa kiâⁿ-lō͘, góa hioh-khùn, lí lóng teh khòaⁿ;

góa ê só͘-kiâⁿ-só͘-chòe, lí mā lóng chai.

4Siōng Chú ah, góa iáu-bē khui-chhùi,

lí í-keng chai góa beh kóng sím-mi̍h.

5Lí tī góa ê chêng-āu chiàu-kò͘ góa;

lí chhin-chhiú pó-hō͘ góa.

6Lí ê chai-bat hiah-ni̍h kî-biāu,

hiah-ni̍h ko-chhim, chhiau-kè góa ê liáu-kái.

7Khì tó-ūi, góa chiah ōe-tàng tô-pī lí?

Cháu kàu tó-ūi, góa chiah ōe-tàng tô-siám lí?

8Góa nā peh-chiūⁿ thiⁿ, lí tī hia;

Góa nā lo̍h Im-hú, lí mā tī hia.

9Góa nā thí-si̍t pe-khì ji̍t chhut hit-pêng,

á-sī hioh tī ji̍t lo̍h chit-pêng,

10chiū nā tī hia, lí ê chhiú mā ōe ín-chhōa góa,

lí ê chiàⁿ-chhiú mā ōe hû-chhî góa.

11Góa nā kiû o͘-àm kā góa khàm--khí-lâi,

kiò àm-mî kā góa jia-cha̍h,

12tùi lí lâi kóng, o͘-àm bô sǹg sī àm,

àm-sî chhin-chhiūⁿ ji̍t--sî hiah-ni̍h kng;

tùi lí lâi kóng, o͘-àm kap kng-bêng lóng kâng-khoán.

13Lí chō góa ê chōng-hú;

góa tī lāu-bú ê pak-tó͘ lāi, lí kā góa sok-chō.

14Góa kám-siā lí, in-ūi góa ê siū-chō kî-biāu thang kiaⁿ-ùi.

Lí ê chok-ûi kî-biāu;

góa ê it-chhè lí oân-choân chai.

15Góa tī lâng khòaⁿ bōe tio̍h ê só͘-chāi siū-chō,

tī lāu-bú ê pak-tó͘ lāi, lí kā góa sok-chō;

góa hêng-sêng ê kè-thêng lí lóng chheng-chhó.

16Góa bē chiâⁿ-hêng ê seng-khu,

lí í-keng khòaⁿ--tio̍h.

Lí ūi-tio̍h góa an-pâi ê ji̍t-chí,

lóng í-keng kì tī lí ê chheh.

17Siōng-tè ah, lí ê ì-liām si̍t-chāi chin oh liáu-kái!

Lí ê sim-su si̍t-chāi bōe-sǹg--tit!

18Góa nā beh sǹg, pí hái-soa khah chōe;

nā sǹg ōe liáu, mā bōe-tàng thàu-thiat lí ê ò-biāu.

19Siōng-tè ah, góa jōa-á-ni̍h ài lí siau-bia̍t pháiⁿ-lâng;

góa jōa-á-ni̍h ǹg-bāng kiông-pō ê lâng lī-khui góa.

20In kóng pháiⁿ-ōe siat-to̍k lí;

lí ê tùi-te̍k ēng siâ-ok ê ōe bú-jio̍k lí.

21Siōng Chú ah, oàn-hūn lí ê lâng góa kiám bô oàn-hūn in?

Khí-lâi hoán-poān lí ê lâng góa kiám bô iàm-ò͘ⁿ in?

22Góa chhim-chhim oàn-hūn in,

khòaⁿ in chòe góa ê tùi-te̍k.

23Siōng-tè ah, kiû lí kàm-chhat góa, chai góa ê sim-su,

khó-giām góa, chai góa ê ì-liām.

24Kiû lí chí-tiám góa, hō͘ góa bô pháiⁿ hêng-ûi,

chhōa góa kiâⁿ éng-oán ê tō-lō͘.

Si-phian 139 - 現代台語譯本羅馬字版(TTVR)-闽南语

Learn More About Us