Pí-tek Chiân-su 4

Pí-tek Chiân-su 4 - 現代台語譯本羅馬字版(TTVR)-闽南语

Kái-piàn ê Seng-oa̍h

1Ki-tok kì-jiân tī jio̍k-thé siū-khó͘, lín mā tio̍h ēng kâng-khoán ê sim-chì lâi chong-pī ka-kī, in-ūi tī jio̍k-thé siū-khó͘ sī kap chōe-ok toān-choa̍t koan-hē.

2Án-ni, lín tī sè-kan só͘ chhun ê ji̍t-chí chiū bô koh chiàu lâng ê chêng-io̍k, sī chiàu Siōng-tè ê chí-ì lâi oa̍h.

3Lín ū lōng-hùi kong-im chòe bī-sìn-chiá só͘ ài chòe ê sū, îm-loān, sek-io̍k, chiú-chùi, iàn-lo̍k, tōa-chia̍h tōa-lim, kap khó-ò͘ⁿ ê ngó͘-siōng chông-pài téng, í-keng kàu-gia̍h lah.

4In khòaⁿ-kìⁿ lín bô koh kap in kè hòng-tōng bô chiat-chè ê seng-oa̍h, chiū kî-koài soah kā lín húi-pòng.

5In tio̍h tùi teh-beh sím-phòaⁿ oa̍h-lâng kap sí-lâng ê Siōng-tè kau-siàu.

6Ūi-tio̍h chit-ê iân-kò͘, hok-im sīm-chì mā ū thoân hō͘ sí--khì ê lâng, hō͘ in ê jio̍k-thé sui-jiân tio̍h chiàu it-poaⁿ-lâng ê khoán siū sím-phòaⁿ, m̄-kú in ê lêng ōe-tàng chiàu Siōng-tè ê khoán lâi oa̍h.

Choh Siōng-tè Un-sù ê Hó Koán-ke

7Bān-iú ê chiong-kio̍k kūn lah! Só͘-í, tio̍h kín-sīn siú-kí, thang kéng-séng kî-tó.

8Siōng iàu-kín--ê, sī tio̍h jia̍t-chhiat saⁿ-thiàⁿ, in-ūi thiàⁿ ōe jia-khàm chin chōe chōe-kò.

9Tio̍h hō͘-siōng hó khoán-thāi, m̄-thang bâi-oàn.

10Choh Siōng-tè só͘ sù ta̍k-hāng un-sù ê hó koán-ke, tio̍h chiàu ta̍k-ê lâng só͘ tit--tio̍h ê un-sù hō͘-siōng ho̍k-bū.

11Kóng tō-lí--ê, tio̍h kóng Siōng-tè ê sìn-sit; sū-hōng--ê, tio̍h chiàu Siōng-tè só͘ sù un-sù ê le̍k-liōng lâi sū-hōng, hō͘ Siōng-tè thong-kè Iâ-so͘ Ki-tok tī bān-sū tit-tio̍h êng-iāu. Goān êng-kng koân-pèng lóng kui I, ti̍t-kàu éng-éng-oán-oán. Amen!

Ūi-tio̍h Choh Ki-tok-tô͘ Jím-siū Khó͘-lān

12Chhin-ài ê hiaⁿ-tī chí-bē, lín tú-tio̍h chhin-chhiūⁿ hé ê chhì-liān, m̄-thang ná-chún tú-tio̍h kî-koài ê sū;

13hoán-tńg tio̍h in-ūi ū hun-tam Ki-tok ê khó͘-lān lâi hoaⁿ-hí, hō͘ lín tī I êng-iāu hián-hiān ê sî mā thang hoaⁿ-hí khoài-lo̍k.

14Lín nā ūi-tio̍h Ki-tok ê miâ siū lêng-jio̍k, lín chin ū hok-khì, in-ūi ū Siōng-tè êng-kng ê Sîn tiàm tī lín sin-chiūⁿ.

15Lín tiong-kan m̄-thang ū lâng in-ūi thâi-lâng, choh-chha̍t, choh-pháiⁿ, á-sī ài koán pa̍t-lâng ê tāi-chì lâi siū-khó͘.

16Nā in-ūi choh Ki-tok-tô͘ lâi siū-khó͘, m̄-bián kiàn-siàu, hoán-tńg tio̍h in-ūi ū chit-ê miâ kui êng-kng hō͘ Siōng-tè.

17Sím-phòaⁿ ê sî kàu lah! Siōng-tè ê ke tio̍h tāi-seng siū sím-phòaⁿ; nā tùi lán khai-sí, hiah-ê m̄ sìn-thàn Siōng-tè hok-im ê lâng ê kiat-kio̍k kiám bōe koh-khah giâm-tiōng?

18Sèng-keng ū kóng:

Gī-lâng tit-kiù to chin oh,

bô kèng-khiân ê lâng kap chōe-jîn kiám bōe koh-khah khùn-lân?

19Só͘-í, hiah-ê chiàu Siōng-tè ê chí-ì siū-khó͘ ê lâng, tio̍h chiong ka-kī kau-thok hō͘ hit-ūi thang sìn-khò ê Chō-bu̍t-chú, kè-sio̍k chòe hó-sū.

Pí-tek Chiân-su 4 - 現代台語譯本羅馬字版(TTVR)-闽南语

Learn More About Us