Si-phian 47 - 現代台語譯本羅馬字版(TTVR)-闽南语

Khó-la hō͘-tāi ê si, kau hō͘ sèng-ga̍k-tiúⁿ.Chheng-chàn Chì-koân ê Siōng Chú

1Bān-bîn ah, lín lóng tio̍h phah-pho̍k-á;

tio̍h ēng hoaⁿ-hí ê siaⁿ tōa-siaⁿ tùi Siōng-tè hoan-ho͘.

2Siōng Chú — Chì-koân ê Siōng-tè eng-kai siū kèng-ùi;

I sī tōa Kun-ông, thóng-tī choân-tōe.

3I hō͘ bān-bîn hâng-ho̍k goán,

hō͘ lia̍t-pang khut-ho̍k tī goán kha-ē.

4I ūi-tio̍h goán kéng èng-ún ê thó͘-tōe,

chòe I só͘ thiàⁿ ê chú-bîn khoa-iāu ê sán-gia̍p.

5Siōng-tè chiūⁿ-khì chē pó-chō, bān-bîn tōa-siaⁿ hoan-ho͘;

Siōng Chú chiūⁿ-khì chē ông-ūi, sàu-kak lóng tōa tân.

6Lín tio̍h chhiùⁿ-koa chheng-chàn Siōng-tè, chhiùⁿ-koa chheng-chàn;

tio̍h chhiùⁿ-koa o-ló lán ê Ông, chhiùⁿ-koa o-ló.

7Siōng-tè sī choân-tōe ê Ông,

tio̍h ēng si-koa chheng-chàn I.

8Siōng-tè chē tī sèng ê pó-chō;

Siōng-tè choh-ông thóng-tī bān-kok.

9Lia̍t-pang ê kùi-cho̍k chū-chi̍p,

beh chòe A-pek-la-hán ê Siōng-tè ê chú-bîn;

in-ūi tōe-chiūⁿ ê kun-ông lóng kui-sio̍k I.

Siōng-tè tōa-tōa siū chun-chông!

Learn More About Us