Si-phian 44

Si-phian 44 - 現代台語譯本羅馬字版(TTVR)-闽南语

Khó-la hō͘-tāi kà-sī ê si, kau hō͘ sèng-ga̍k-tiúⁿ.Kî-kiû Pó-hō͘

1Siōng-tè ah, lí tī kó͘-chá, goán ê chó͘-sian ê sî só͘ chòe ê tāi-chì,

goán ū chhin-hī thiaⁿ--kìⁿ;

goán ê lia̍t-chó͘ ū tùi goán kóng-khí:

2Lí ū ēng lí ê chhiú kóaⁿ-cháu lia̍t-pang lâi chai-pôe goán ê chó͘-sian,

ū kàng chai-hō hō͘ hiah-ê bîn-cho̍k lâi hō͘ goán ê lia̍t-chó͘ hoat-tián.

3In m̄-sī khò ka-kī ê to-kiàm tit-tio̍h thó͘-tōe,

mā m̄-sī ēng chhiú-kut kiù ka-kī;

sī lí ê chiàⁿ-chhiú, lí ê chhiú-kut, lí ê bīn ê kng kiù in;

in-ūi lí ì-ài in.

4Siōng-tè ah, lí sī góa ê Ông;

kiû lí chhut bēng-lēng chín-kiù Ngá-kok.

5Goán khò lí chhia-tó goán ê tùi-te̍k,

khò lí ê miâ thún-ta̍h kong-kek goán ê lâng.

6Góa bô óa-khò góa ê keng;

góa ê to mā bōe kiù góa.

7Lí ū kiù goán thoat-lī tùi-te̍k,

hō͘ oàn-hūn goán ê lâng sit-pāi kiàn-siàu.

8Goán beh kui-ji̍t khoa-kháu Siōng-tè,

beh éng-oán chheng-chàn lí ê miâ.

9M̄-kú hiān-chāi lí pàng-sak goán, hō͘ goán siū lêng-jio̍k;

lí bô kap goán ê kun-peng tàu-tīn chhut-chiàn.

10Lí hō͘ goán tī tùi-te̍k ê bīn-chêng oa̍t-thâu tô-cháu,

chhut-chāi oàn-hūn goán ê lâng chhiúⁿ-toa̍t.

11Lí hō͘ goán chhin-chhiūⁿ iûⁿ hō͘ lâng thun-chia̍h;

lí kā goán kóaⁿ-sòaⁿ khì lia̍t-pang.

12Lí kā lí ê chú-bîn sio̍k-sio̍k-á bōe,

lí kiám ū tit-tio̍h sím-mi̍h lī-ek?

13Lí hō͘ goán siū keh-piah kok lêng-jio̍k,

hō͘ sì-ûi ê lâng thí-chhiò ki-chhì.

14Lí hō͘ goán tī lia̍t-pang tiong chòe chhiò-khe,

hō͘ in tùi goán hàiⁿ-thâu.

15-16In-ūi lóe-mē, húi-pòng ê lâng ê siaⁿ,

in-ūi tùi-te̍k kap pò-oan ê lâng ê iân-kò͘,

goán kui-ji̍t siū lêng-jio̍k,

móa-bīn kiàn-siàu.

17Chiah-ê lóng lîm-kàu goán, goán iáu bô bōe-kì-tit lí,

mā bô ûi-hoán lí ê iok.

18Goán ê sim bô ûi-pōe lí;

goán ê kha-pō͘ bô phian-lī lí ê lō͘.

19Lí kèng-jiân kā goán phah-tó tī chhâi-lông chhut-ji̍p ê só͘-chāi,

ēng sí ê ìm-ńg tà goán.

20Goán nā bōe-kì-tit goán ê Siōng-tè ê miâ,

chhun-chhiú hoan-gêng pa̍t-ê sîn-bêng,

21Siōng-tè kiám khòaⁿ bōe chhut?

I it-tēng chai lâng sim-lāi ê pì-bi̍t.

22Goán in-ūi lí ê iân-kò͘ kui-ji̍t siū sat-hāi;

lâng khòaⁿ goán chhin-chhiūⁿ beh hō͘ lâng thâi ê iûⁿ.

23Chú ah, lí tio̍h cheng-sîn, ná iáu-teh khùn?

Kiû lí khí--lâi, m̄-thang éng-oán pàng-sak goán.

24Lí sī-án-chóaⁿ oa̍t-thâu m̄ chhap goán?

Sī-án-chóaⁿ bōe-kì-tit goán só͘ siū ê ap-chè kap khó͘-lān?

25Goán í-keng phak tī thô͘-hún,

pak-tó͘ tah tī thô͘-kha.

26Kiû lí khí-lâi pang-chān goán,

in-ūi lí ê chû-ài, kiû lí kiù-sio̍k goán.

Si-phian 44 - 現代台語譯本羅馬字版(TTVR)-闽南语

Learn More About Us