Í-se-kiat-su 48

Í-se-kiat-su 48 - 現代台語譯本羅馬字版(TTVR)-闽南语

Ta̍k Chi-cho̍k Hun-phòe ê Thó͘-tōe

1Ē-bīn sī ta̍k chi-cho̍k chiàu miâ-toaⁿ pun--tio̍h ê thó͘-tōe: Tùi siōng pak-pêng, iân Hi-te̍k-lûn beh khì Hap-má ài-kháu ê lō͘, kàu Tāi-má-sū-kek ông-kok pian-kài ê Hap-sat Í-lân-siâⁿ. Pak-pêng kàu Hap-má ông-kok, tùi tang-pêng ê pian-kài kàu sai-pêng ê Tōe-tiong-hái sī Tān ê hūn-gia̍h.

2-7Kî-tha chi-cho̍k ê thó͘-tōe, tùi pak kàu lâm chiàu sūn-sū sī Tān, A-siat, Ná-hut-tha-lī, Má-ná-se, Í-hoat-liân, Lū-piān, kap Iû-tāi, ta̍k chi-cho̍k lóng tit-tio̍h in èng-tit ê hūn-gia̍h.

Tiong-pō͘ Tōe-khu

8Pak-pêng kap Iû-tāi ê tōe-kài sio-chiap, tùi tang-pêng ê pian-kài kàu sai-pêng ê Tōe-tiong-hái, khoah cha̍p-jī kong-lí-pòaⁿ, tōa-sòe kap ta̍k chi-cho̍k kâng-khoán; tio̍h hōng-hiàn chit-tè tōe chòe sèng-tōe, tī hit tiong-kan khí sèng-tiān.

9Lín tio̍h hōng-hiàn tn̂g cha̍p-jī kong-lí-pòaⁿ, khoah cha̍p kong-lí ê tōe hō͘ Siōng Chú.

10Chè-si beh tit-tio̍h chit-tè sèng-tōe ê chi̍t pō͘-hūn. In pun--tio̍h ê tōe, tùi tang kàu sai cha̍p-jī kong-lí-pòaⁿ, tùi pak kàu lâm gō͘ kong-lí. Siōng Chú ê sèng-tiān beh khí tī chit-tè sèng-tōe ê tiong-kan.

11Chit-tè sèng-tōe beh hō͘ Sat-tok hō͘-tāi hun-pia̍t-choh-sèng ê chè-si. In tiong-si̍t chun-siú góa só͘ hoan-hù ê chit-hūn; Í-sek-lia̍t-lâng kiâⁿ bê-lō͘ lī-khui góa ê sî, in bô chhin-chhiūⁿ Lī-bī-lâng mā kiâⁿ bê-lō͘.

12Só͘-í, chit-tè tōe beh pó-liû chi̍t pō͘-hūn hō͘ in, chòe chì-sèng ê thó͘-tōe, kap Lī-bī chi-cho̍k ê tōe-kài sio-chiap.

13Lī-bī chi-cho̍k beh tī chè-si ê thó͘-tōe lâm-pêng pun-tio̍h chi̍t tè tōe, kap chè-si ê tōe pîⁿ tōa; tùi tang kàu sai cha̍p-jī kong-lí-pòaⁿ, tùi pak kàu lâm gō͘ kong-lí.

14Hiàn hō͘ Siōng Chú ê chit-tè tōe sī siōng-hó ê thó͘-tōe, bōe-ēng-tit bōe á-sī kau-ōaⁿ, mā bōe-ēng-tit jiōng-tō͘ hō͘ pa̍t-lâng. Chit-tè thó͘-tōe sī sèng--ê, kui-sio̍k Siōng Chú.

15Sèng-tōe iáu ū chhun chi̍t tè tn̂g cha̍p-jī kong-lí-pòaⁿ, khoah nn̄g kong-lí-pòaⁿ ê thó͘-tōe; chit-tè tōe beh chòe it-poaⁿ ê kong-iōng-tōe, thang khí siâⁿ, khí chhù, chòe chháu-tiûⁿ. Siâⁿ tio̍h khí tī chit-tè tōe ê tiong-ng.

16Siâⁿ ê tōa-sòe, tang, sai, lâm, pak sì pêng lóng sī nn̄g-chheng nn̄g-pah gō͘-cha̍p kong-chhioh.

17Siâⁿ ê sì-chiu-ûi tio̍h ū chháu-tiûⁿ, tang, sai, lâm, pak sì-bīn, khoah lóng sī chi̍t-pah jī-cha̍p-gō͘ kong-chhioh.

18Kong-iōng-tōe nn̄g pêng iáu ū chhun thó͘-tōe, kap sèng-tōe saⁿ-liân, tang-pêng kap sai-pêng kok tn̂g gō͘ kong-lí; chiah-ê tōe thang chèng-choh, chhut-sán--ê tio̍h chòe tī siâⁿ-lāi kang-chok ê lâng ê chia̍h-mi̍h.

19Só͘-ū tī siâⁿ-lāi kang-chok ê lâng, bô-lūn sio̍k Í-sek-lia̍t tó chi̍t chi-cho̍k, lóng thang tī chit-tè tōe chèng-choh.

20Lín tio̍h chiong chit-tè cha̍p-jī kong-lí-pòaⁿ sù-hong ê sèng-tōe, kap siâⁿ ê iōng-tōe, lóng hōng-hiàn chòe sèng-tōe.

21Sèng-tōe kap siâⁿ ê iōng-tōe nn̄g pêng chhun ê thó͘-tōe, tio̍h kui-sio̍k ông. Sèng-tōe ê tang-pêng kàu tang-pêng pian-kài ê tōe, lâm pak khoah cha̍p-jī kong-lí-pòaⁿ; sai-pêng kàu sai-pêng ê Tōe-tiong-hái, khoah mā-sī cha̍p-jī kong-lí-pòaⁿ. Chit nn̄g pêng kap kî-tha chi-cho̍k tit--tio̍h ê hūn-gia̍h pêng-hêng ê thó͘-tōe, lóng kui-sio̍k ông. Án-ni, só͘ hiàn ê sèng-tōe kap beh khí sèng-tiān ê tōe, sī tī ông nn̄g tè tōe ê tiong-kan.

22Lī-bī-lâng ê tōe kap khí-siâⁿ ê iōng-tōe, mā tī ông nn̄g tè tōe ê tiong-kan; kui-sio̍k ông ê tōe sī tī Iû-tāi ê tōe-kài kap Piān-ngá-bín ê tōe-kài tiong-kan.

Kî-tha Chi-cho̍k ê Thó͘-tōe

23-27Kî-tha chi-cho̍k ê thó͘-tōe, tùi tang-pêng ê pian-kài kàu sai-pêng ê Tōe-tiong-hái, tùi pak kàu lâm chiàu sūn-sū sī Piān-ngá-bín, Se-biān, Í-sat-ka, Se-pò͘-lûn, kap Ka-tek, ta̍k chi-cho̍k lóng tit-tio̍h in èng-tit ê hūn-gia̍h.

28 Ka-tek chi-cho̍k lâm-pêng ê pian-kài, sī tùi Tha-má ǹg sai-lâm kàu Bí-lī-pa Ka-te-su le̍k-chiu, koh oat tùi sai-pak, iân Ai-ki̍p pian-kài ê khoe-kok kàu Tōe-tiong-hái.

29Chì-koân ê Siōng Chú án-ni kóng, “Chiah-ê sī lín beh thiu-chhiam pun hō͘ Í-sek-lia̍t ta̍k chi-cho̍k, chòe in sán-gia̍p ê thó͘-tōe.”

Iâ-lō͘-sat-léng ê Siâⁿ-mn̂g

30-34 Iâ-lō͘-sat-léng-siâⁿ lóng-chóng ū cha̍p-jī ê siâⁿ-mn̂g. Sì pêng ê siâⁿ-chhiûⁿ tn̂g lóng sī nn̄g-chheng nn̄g-pah gō͘-cha̍p kong-chhioh, kok ū saⁿ ê siâⁿ-mn̂g; ta̍k-ê mn̂g chiàu Í-sek-lia̍t chi-cho̍k ê miâ hō-miâ. Pak-pêng saⁿ ê sī Lū-piān-mn̂g, Iû-tāi-mn̂g, Lī-bī-mn̂g; tang-pêng saⁿ ê sī Iok-sek-mn̂g, Piān-ngá-bín-mn̂g, Tān-mn̂g; lâm-pêng saⁿ ê sī Se-biān-mn̂g, Í-sat-ka-mn̂g, Se-pò͘-lûn-mn̂g; sai-pêng saⁿ ê sī Ka-tek-mn̂g, A-siat-mn̂g, Ná-hut-tha-lī-mn̂g.

35Siâⁿ-chhiûⁿ sì-chiu-ûi kiōng káu chheng kong-chhioh. Tùi taⁿ í-āu, chit-ê siâⁿ beh kiò-chòe “Siōng Chú tī chia”.

Í-se-kiat-su 48 - 現代台語譯本羅馬字版(TTVR)-闽南语

Learn More About Us