Thoân-tō-su 9

Thoân-tō-su 9 - 現代台語譯本羅馬字版(TTVR)-闽南语

1Góa chiong che it-chhè ê tāi-chì khǹg tī sim-lāi siông-sè siūⁿ, chiū chai gī ê lâng kap tì-hūi ê lâng, í-ki̍p in ê it-kú-it-tōng, liân thiàⁿ kap hūn, lóng tī Siōng-tè ê chhiú-lāi, lâng bōe-tàng tāi-seng chai.

2Chèng-lâng ê miā-ūn lóng kâng-khoán: gī-lâng kap siâ-ok ê lâng, hó-lâng kap pháiⁿ-lâng, chheng-khì ê lâng kap bô chheng-khì ê lâng, hiàn-chè ê lâng kap bô hiàn-chè ê lâng, lóng siâng-khoán; hó-lâng án-chóaⁿ, chōe-jîn mā án-ni; chiù-chōa ê lâng án-chóaⁿ, m̄-káⁿ chiù-chōa ê lâng mā án-ni.

3Tī ji̍t-kng ê ē-bīn só͘ hoat-seng it-chhè ê tāi-chì, ū chi̍t hāng put-hēng, chiū-sī chèng-lâng ê cho-gū lóng kâng-khoán; sè-kan-lâng ê sim chhiong-móa siâ-ok, oa̍h ê sî sim-lāi tian-kông, chòe-āu lóng tio̍h sí.

4Lâng iáu-teh oa̍h chiū ū ǹg-bāng, in-ūi oa̍h ê káu pí sí ê sai khah hó.

5Oa̍h--teh ê lâng chai in ōe sí; sí ê lâng sím-mi̍h to m̄ chai, mā bōe koh tit-tio̍h pò-siúⁿ; in ê miâ bô lâng ōe-kì--tit.

6In ê thiàⁿ, in ê hūn, in ê oàn-tò͘, lóng í-keng siau-sit. Tī ji̍t-kng ê ē-bīn só͘ hoat-seng it-chhè ê tāi-chì, éng-oán bô in ê hūn.

7Chòe lí khì, hoaⁿ-hí chia̍h lí ê pn̄g, khoài-lo̍k lim lí ê chiú, in-ūi Siōng-tè í-keng chiap-la̍p lí ê só͘-chòe.

8Lí tio̍h put-sî chhēng súi ê saⁿ; thâu-khak tio̍h siông-siông boah-iû.

9Tī lí it-seng khang-hu ê ji̍t-chí, chiū-sī Siōng-tè sù lí tī ji̍t-kng ê ē-bīn khang-hu ê ji̍t-chí, tio̍h kap lí só͘ thiàⁿ ê bó͘ khoài-lo̍k kè-ji̍t; in-ūi he sī lí chāi-siⁿ, tī ji̍t-kng ê ē-bīn phah-piàⁿ só͘ tit--tio̍h ê hok-hūn.

10Lí ê chhiú eng-kai chòe ê tāi-chì tio̍h chīn-la̍t khì chòe, in-ūi tī lí beh khì ê Im-kan bô kang-chok, bô kè-ōe, bô ha̍k-sek, mā bô tì-hūi.

11Góa koh khòaⁿ-tio̍h tī ji̍t-kng ê ē-bīn, gâu-cháu--ê bô it-tēng ōe seng kàu, ū-la̍t--ê bô it-tēng ōe khah iâⁿ, chhong-bêng--ê bô it-tēng ōe tit-tio̍h bí-niû, bêng-lí--ê bô it-tēng ōe hó-gia̍h, ū ha̍k-sek--ê bô it-tēng siū khòaⁿ-tāng; in só͘ tú--tio̍h-ê lóng chāi-tī sî kap ki-hōe.

12Lâng ê sî ka-kī m̄ chai, chhin-chhiūⁿ hî put-hēng hō͘ bāng bāng--tio̍h, chiáu hō͘ lô-bāng tng--tio̍h, chai-hō hut-jiân kàu ê sî, sè-kan-lâng hām-lo̍h hit lāi-bīn mā-sī án-ni.

Tì-hūi Iâⁿ-kè Gû-gōng

13Góa khòaⁿ-tio̍h ji̍t-kng ê ē-bīn ū chi̍t hāng tì-hūi, chiàu góa koan-chhat chin te̍k-pia̍t.

14Ū chi̍t ê chin sòe ê siâⁿ, hit lāi-bīn lâng chin chió; ū chi̍t ê kiông ê ông lâi kong-kek, ûi-khùn, koh khí koân ê thô͘-tui kā i kong-kek.

15Siâⁿ-lāi ū chi̍t ê sàn-chhiah khiok ū tì-hūi ê lâng, ū ēng i ê tì-hūi kiù hit-ê siâⁿ; āu-lâi bô lâng kì-tit i.

16Góa kóng, “Tì-hūi iâⁿ-kè khùi-la̍t.” Chóng-sī sàn-chhiah-lâng ê tì-hūi soah hō͘ lâng khòaⁿ-khin, i ê ōe bô siū tiōng-sī.

17Tì-hūi ê lâng khin-khin-á kóng ê ōe, pí gōng-lâng ê thâu-ba̍k tōa-siaⁿ jióng khah ū lâng thiaⁿ.

18Tì-hūi iâⁿ-kè kau-chiàn ê bú-khì; chóng-sī chi̍t piàn sit-chhò ōe phò-hoāi chin chōe hó-sū.

Thoân-tō-su 9 - 現代台語譯本羅馬字版(TTVR)-闽南语

Learn More About Us