Í-se-kiat-su 7

Í-se-kiat-su 7 - 現代台語譯本羅馬字版(TTVR)-闽南语

Í-sek-lia̍t ê Chiong-kio̍k Kūn Lah

1Siōng Chú tùi góa kóng,

2“Jîn-chú ah, che chiū-sī góa — Chì-koân ê Siōng Chú beh tùi Í-sek-lia̍t jîn-bîn soan-pò͘ ê ōe: Chiong-kio̍k kàu lah, Í-sek-lia̍t-kok sù-kéng ê chiong-kio̍k kūn lah!

3“Í-sek-lia̍t ah! Lí ê chiong-kio̍k kàu lah. Góa beh tùi lí hoat tōa siū-khì. Góa beh chiàu lí ê hêng-ûi sím-phòaⁿ lí, beh in-ūi lí só͘ chòe thang iàm-ò͘ⁿ ê sū hêng-hoa̍t lí.

4Góa bô beh lîn-bín lí, bô beh tông-chêng lí. Góa beh chiàu lí ê hêng-ûi pò-èng lí, chiàu lí só͘ chòe thang iàm-ò͘ⁿ ê sū hêng-hoa̍t lí. Án-ni, lí chiū chai góa sī Siōng Chú.”

5Chì-koân ê Siōng Chú koh kóng, “Khòaⁿ leh, chai-lān ōe chi̍t-ê chiap chi̍t-ê lîm-kàu.

6Lí ê chiong-kio̍k kūn lah! Lí ê chiong-kio̍k kàu lah! Khòaⁿ leh, lí bōe cháu-siám--tit lah!

7Kok-lāi ê chū-bîn, chai-lān lîm-kàu lah. Sî kàu lah, ji̍t-chí pek-kūn lah! Soaⁿ-téng ê chè-tôaⁿ beh ū hūn-loān, bô koh ū hoaⁿ-hí khoài-lo̍k ê siaⁿ.

8“Góa chin kín chiū beh chiong góa ê tōa siū-khì piàⁿ tī lí sin-chiūⁿ, chiong góa ê siū-khì lóng piàⁿ hō͘ lí. Góa beh chiàu lí ê hêng-ûi sím-phòaⁿ lí, beh in-ūi lí só͘ chòe thang iàm-ò͘ⁿ ê sū hêng-hoa̍t lí.

9Góa bô beh lîn-bín lí, bô beh tông-chêng lí. Góa beh chiàu lí ê hêng-ûi pò-èng lí, chiàu lí só͘ chòe thang iàm-ò͘ⁿ ê sū hêng-hoa̍t lí. Án-ni, lí chiū chai kā lí hêng-hoa̍t--ê sī góa Siōng Chú.

10“Khòaⁿ leh, hit-ji̍t lâi lah, chai-lān í-keng kàu lah; kiau-ngō͘ í-keng puh-gê, koáiⁿ-á í-keng khui-hoe.

11Kiông-pō heng-khí, pìⁿ-chòe hêng-hoa̍t pháiⁿ-lâng ê koáiⁿ-á. In só͘-ū--ê lóng beh bô--khì, châi-hù, chun-kùi lóng beh sit--khì.

12“Sî kàu lah, hit-ji̍t kūn lah, bóe ê lâng m̄-bián hoaⁿ-hí, bōe ê lâng m̄-bián siong-sim, in-ūi Siōng Chú ê tōa siū-khì beh kàng-lo̍h tī in chèng-lâng sin-chiūⁿ.

13Bô chi̍t ê bōe-chú ōe-tàng oa̍h kàu kā i bōe--chhut-khì--ê bóe--tńg-lâi, in-ūi Siōng Chú koan-hē chit-ê jîn-bîn ê īⁿ-siōng it-tēng bōe hòe-chí. Bô lâng ōe-tàng tī ka-kī ê chōe-ok tiong pó-choân sìⁿ-miā.

14In pûn sàu-kak, kun-khì chún-pī hó-sè, m̄-kú bô lâng chiūⁿ chiàn-tiûⁿ kau-chiàn, in-ūi góa ê tōa siū-khì beh kàng-lo̍h tī chèng-lâng ê sin-chiūⁿ.”

Hêng-hoa̍t Í-sek-lia̍t ê Chōe-ok

15Siōng Chú kóng, “Siâⁿ-gōa ū chiàn-cheng, siâⁿ-lāi ū un-e̍k, ki-hng. Tī chhân-iá ê lâng lóng beh sí tī to-ē; siâⁿ-lāi ê lâng lóng beh pīⁿ-sí, gō-sí.

16In tiong-kan nā ū lâng tô-thoat, ōe tī soaⁿ-téng ūi ka-kī ê chōe, chhin-chhiūⁿ soaⁿ-kok tiong ê hún-chiáu ai-oàn thó͘-khùi.

17In ta̍k-ê lâng ê chhiú lóng bô-la̍t, kiaⁿ kah kha-sng-chhiú-nńg.

18In beh chhēng môa-saⁿ, kui-ê lâng kiaⁿ-hiâⁿ ngia̍uh-ngia̍uh-chhoah; ta̍k-ê lâng lóng thì kng-thâu, kiàn-siàu bô bīn-chú.

19In beh chiong kim gûn hiat tī koe-lō͘, chhin-chhiūⁿ tàn pùn-sò kâng-khoán. Tī Siōng Chú hoat tōa siū-khì ê ji̍t, kim-gûn bô hoat-tō͘ kái-kiù in, in-ūi kim-gûn bōe-tàng boán-chiok in ê io̍k-bōng, bōe-tàng hō͘ pak-tó͘ chia̍h-pá, tian-tò hō͘ in poa̍h-tó hoān-chōe.

20In bat khoa-kháu in súi ê chu-pó, koh ēng hiah-ê chu-pó chù-chō thang iàm-ò͘ⁿ ê ngó͘-siōng. Só͘-í, Siōng Chú beh hō͘ in khòaⁿ ka-kī ê chu-pó chòe ù-òe ê mi̍h-kiāⁿ.

21“Góa beh hō͘ gōa-cho̍k-lâng kā i chhiúⁿ-toa̍t, kiò húi-tô͘ kā i chhiúⁿ-kiap; in beh kā i phah lâ-sâm.

22Góa beh bīn oa̍t-cháu m̄ chhap Í-sek-lia̍t, chhut-chāi góa sèng ê só͘-chāi siū siat-to̍k, hō͘ kiông-tō ji̍p-khì siat-to̍k.

23“Liān-á tio̍h chún-pī hó-sè! In-ūi ta̍k só͘-chāi lóng ū thâi-lâng lâu-huih ê sū, ta̍k hiong-tìn chhiong-móa kiông-pō.

24Góa beh hō͘ siōng hiong-ok ê bîn-cho̍k lâi chiàm in ê chhù, hō͘ lia̍t-kok siat-to̍k in kèng-pài ê só͘-chāi, hō͘ kiông-pō ê lâng bōe koh chhàng-chhiu.

25Chai-hō kàu lah! In teh kiû pêng-an, m̄-kú bô pêng-an.

26Chai-lān liáu-āu koh ū chai-lān, pháiⁿ siau-sit sòa-chiap pháiⁿ siau-sit. In chhē sian-ti kiû īⁿ-siōng, m̄-kú bô lō͘-ēng; chè-si bô koh ū kàu-tō, tiúⁿ-ló mā bōe-tàng kā jîn-bîn chí-tō.

27Kok-ông pi-siong, léng-siù sit-bāng, jîn-bîn kiaⁿ kah phi̍h-phi̍h-chhoah. Góa beh chiàu in ê hêng-ûi pān in, chiàu in phòaⁿ-toàn lâng ê hong-hoat kā in sím-phòaⁿ. Án-ni, in chiū chai góa sī Siōng Chú.”

Í-se-kiat-su 7 - 現代台語譯本羅馬字版(TTVR)-闽南语

Learn More About Us