Í-sài-a-su 26

Í-sài-a-su 26 - 現代台語譯本羅馬字版(TTVR)-闽南语

Sèng-lī ê Koa

1Hit-ji̍t, tī Iû-tāi-tōe lâng ōe chhiùⁿ chit-siú koa:

Goán ū chi̍t ê kian-kò͘ ê siâⁿ;

Siōng Chú ēng sèng-lī chòe siâⁿ-chhiûⁿ kap pó-lúi.

2Tio̍h phah-khui siâⁿ-mn̂g,

hō͘ tiong-sìn chèng-gī ê jîn-bîn ji̍p--lâi!

3Sim kian-tēng--ê, lí sù in pêng-an hoân-êng,

in-ūi in sìn-khò lí.

4Tio̍h éng-oán sìn-khò Siōng Chú,

in-ūi Siōng Chú — lán ê Siōng-tè sī éng-oán ê Chio̍h-pôaⁿ.

5I kā chē koân-ūi ê lâng thoa--lo̍h-lâi,

thiah-húi khí tī koân ê só͘-chāi ê siâⁿ,

kā i tàn tī thô͘-kha,

hō͘ i pìⁿ-chòe thô͘-hún,

6hō͘ lâng thún-ta̍h;

sàn-chhiah-lâng kā i thún,

khùn-khó͘-lâng kā i ta̍h.

7Chèng-ti̍t ê lâng lō͘ pîⁿ-tháⁿ;

kong-gī ê Chú, lí kā chèng-ti̍t-lâng ê lō͘ pho͘-pîⁿ siu-ti̍t.

8Siōng Chú ah, tī lí sím-phòaⁿ ê lō͘,

goán teh thèng-hāu lí;

goán ê sim khat-bō͘ lí siū chun-chông ê miâ.

9Tī mî--sî, góa ê sim-sîn him-bō͘ lí;

góa ê sîn-hûn pek-chhiat chhē-kiû lí.

In-ūi lí tī tōe-chiūⁿ si-hêng sím-phòaⁿ ê sî,

sè-kan ê chū-bîn ha̍k-si̍p chèng-gī.

10Siâ-ok ê lâng chiū-sī tit-tio̍h jîn-chû,

mā o̍h bōe tio̍h kong-gī.

Tī chèng-ti̍t-lâng ê tōe, in iû-goân chòe pháiⁿ,

in khòaⁿ bōe tio̍h Siōng Chú ê ui-giâm.

11Siōng Chú ah, lí chhiú gia̍h-koân beh hêng-hoa̍t in,

m̄-kú in bô khòaⁿ--kìⁿ.

Kiû lí hō͘ in khòaⁿ-kìⁿ lí tùi lí chú-bîn ê jia̍t-ài,

ka-kī kám-kak kiàn-siàu.

Goān lí ēng hé thun-bia̍t lí ê tùi-te̍k.

12Siōng Chú ah, goān lí sù goán pêng-an hoân-êng,

in-ūi goán ê só͘-chòe lí lóng ū kā goán sêng-chiū.

13Siōng Chú — goán ê Siōng-tè ah,

bat ū pa̍t-ê chú koán-hat goán,

m̄-kú goán chí-ū chun-chông lí ê miâ.

14Sí--khì ê lâng bōe-tàng koh oa̍h--khí-lâi;

in ê im-hûn mā bōe-tàng koh khí--lâi.

Só͘-í, lí chhú-hoa̍t in, húi-bia̍t in,

hō͘ in tùi lâng ê kì-e̍k tiong siau-sit.

15Siōng Chú ah, lí hō͘ goán ê kok-bîn cheng-ka,

hō͘ kok-bîn ke-thiⁿ lâi hián-sī lí ê êng-iāu.

Lí hō͘ goán ê kok-thó͘ khok-tián kàu thiⁿ-piⁿ-hái-kak.

16Siōng Chú ah, in tī kan-lân tiong chhē-kiû lí;

lí koán-kàu in ê sî,

in thó͘-khùi tùi lí kî-kiû.

17Sán-hū teh-beh siⁿ,

chhui-chūn, thàng-thiàⁿ, âu-kiò;

Siōng Chú ah, goán tī lí bīn-chêng mā chhin-chhiūⁿ án-ni.

18Goán hoâi-īn, thàng-thiàⁿ kiáu-ká,

put-kò siⁿ lóng bô;

goán bô ūi kok-ka tòa-lâi kái-kiù,

bô ūi jîn-bîn kòng-hiàn sím-mi̍h.

19M̄-kú goán sí--khì ê tông-pau ōe koh-oa̍h,

in ê si-thé ōe koh khí--lâi.

Tòa tī tîn-ai ê lâng ah, chhíⁿ--khí-lâi, hoaⁿ-hí chhiùⁿ-koa!

Lí ê lō͘-chúi sī siám-sih ê kam-lō͘,

lo̍h tī tōe, hō͘ sí--khì ê lâng oa̍h--khí-lâi.

Sím-phòaⁿ kap Ho̍k-heng

20Taⁿ, góa ê chú-bîn ah, ji̍p-khì lín ê pâng-keng;

mn̂g tio̍h chhòaⁿ hō͘ tiâu.

Lín tio̍h chiām-sî bih--khí-lâi,

it-ti̍t kàu Siōng-tè ê tōa siū-khì soah.

21Lín khòaⁿ, Siōng Chú teh-beh tùi I tòa ê só͘-chāi chhut--lâi,

beh hêng-hoa̍t tōe-bīn-chiūⁿ hoān-chōe ê lâng.

Tōe ōe po̍k-lō͘ in thâi-lâng só͘ lâu ê huih,

bōe koh am-khàm in sat-hāi ê lâng ê si-thé.

Í-sài-a-su 26 - 現代台語譯本羅馬字版(TTVR)-闽南语

Learn More About Us