Si-phian 135

Si-phian 135 - 現代台語譯本羅馬字版(TTVR)-闽南语

Chheng-chàn ê Si

1-2Ha-lé-lú-iah, chheng-chàn Siōng Chú!

Tio̍h chheng-chàn Siōng Chú ê miâ!

Lín chiah-ê tī Siōng Chú ê tiān teh sū-hōng,

tī lán Siōng-tè sèng-tiān ê tiâⁿ teh sū-hōng ê po̍k-jîn ah,

lín lóng tio̍h chheng-chàn I.

3Tio̍h chheng-chàn Siōng Chú, in-ūi Siōng Chú chì-siān;

tio̍h chhiùⁿ-koa o-ló I ê miâ, in-ūi I jîn-chû.

4In-ūi Siōng Chú kéng-soán Ngá-kok kui-sio̍k I ka-kī,

kéng Í-sek-lia̍t chòe I ê sán-gia̍p.

5Góa chai Siōng Chú úi-tāi;

lán ê Chú chhiau-oa̍t lóng-chóng ê sîn-bêng.

6Siōng Chú tī thiⁿ-téng kap tōe-chiūⁿ, tī hái-tiong kap só͘-ū ê chhim-ian,

lóng chiàu ka-kī ê ì-sù chòe tāi-chì.

7I hō͘ hûn-bū tùi thiⁿ-piⁿ-hái-kak chhèng--chhut-lâi,

hō͘ sih-nà tòa hō͘ chhut-hiān,

hō͘ hong tùi I ê chhng-khò͘ chhe--chhut-lâi.

8I chiong thâu-chiūⁿ-siⁿ ê Ai-ki̍p-lâng kap cheng-siⁿ

lóng phah-sí.

9 Ai-ki̍p ah, I tī lín ê tiong-kan kiâⁿ sîn-jiah kî-sū,

tùi-hù Hoat-ló kap i ê jîn-sîn.

10I phah-pāi chin chōe pang-kok,

phah-pāi kiông-béng ê kok-ông,

11chiū-sī A-mô͘-lī-ông Se-hông

kap Pa-san-ông Go̍k,

koh cheng-ho̍k Ka-lâm só͘-ū ê ông-kok.

12I chiong in ê thó͘-tōe hō͘ I ka-kī ê chú-bîn,

hō͘ Í-sek-lia̍t chòe sán-gia̍p.

13Siōng Chú ah, lí ê miâ lâu kàu éng-oán;

Siōng Chú ah, bān sè-tāi ê lâng lóng ōe kì-liām lí,

14in-ūi Siōng Chú beh ūi-tio̍h I ê chú-bîn sin-oan,

beh lîn-bín I ê po̍k-jîn.

15Gōa-pang ê ngó͘-siōng sī lâng ê chhiú

ēng gûn, ēng kim só͘ chù-chō;

16in ū chhùi, bōe kóng-ōe;

ū ba̍k-chiu, mā bōe khòaⁿ--kìⁿ;

17ū hī-khang, bōe thiaⁿ--kìⁿ;

ū chhùi, mā bô khùi.

18Chō in--ê, óa-khò in--ê,

lóng kap in kâng-khoán.

19 Í-sek-lia̍t-ke ah, tio̍h chheng-chàn Siōng Chú.

A-lûn chè-si ê ke ah, tio̍h chheng-chàn Siōng Chú.

20 Lī-bī ê ke ah, tio̍h chheng-chàn Siōng Chú;

kèng-ùi Siōng Chú ê lâng ah, tio̍h chheng-chàn Siōng Chú.

21Siōng Chú khiā-khí tī Iâ-lō͘-sat-léng;

goān I tùi Sek-an siū chheng-chàn.

Ha-lé-lú-iah, chheng-chàn Siōng Chú!

Si-phian 135 - 現代台語譯本羅馬字版(TTVR)-闽南语

Learn More About Us