Hap-pa-kok-su 3

Hap-pa-kok-su 3 - 現代台語譯本羅馬字版(TTVR)-闽南语

Hap-pa-kok ê Kî-tó

1Sian-ti Hap-pa-kok ê kî-tó; tiāu, ēng “Lī-pia̍t”.

2Siōng Chú ah, góa thiaⁿ-tio̍h lí ê miâ-siaⁿ kap lí ê só͘-chòe chiū kiaⁿ-hiâⁿ.

Siōng Chú ah, kiû lí tī goán ê sè-tāi hō͘ goán koh khòaⁿ-kìⁿ lí úi-tāi ê chok-ûi,

tī lí tōa siū-khì ê sî, kiû lí ōe-kì-tit lîn-bín goán!

3Siōng-tè tùi Thê-bān lâi,

sîn-sèng ê Siōng-tè tùi Pa-lân-soaⁿ lo̍h--lâi.

I ê êng-kng khàm-móa thiⁿ;

chheng-chàn I ê siaⁿ chhiong-móa choân-tōe.

4I ê chhàn-lān chhin-chhiūⁿ ji̍t-kng;

I ê chhiú chiáng-ak khùi-la̍t,

tùi hia siā-chhut sih-nà.

5Un-e̍k kiâⁿ tī I ê thâu-chêng,

jia̍t-pīⁿ tè tī I ê āu-bīn.

6I khiā--teh, tāi-tōe chiū tín-tāng;

I chi̍t-ē khòaⁿ, lia̍t-pang chiū phi̍h-phi̍h-chhoah.

Bān-nî ê tōa-soaⁿ pang--lo̍h-lâi;

chhian-kó͘ ê sió-soaⁿ tîm--lo̍h-khì.

Siōng-tè ê só͘-kiâⁿ-só͘-chòe, éng-oán bô kái-piàn.

7Góa khòaⁿ-tio̍h Kó͘-san ê pò͘-pîⁿ siū thiah-húi,

Bí-tiân-lâng tòa ê só͘-chāi siū húi-hoāi.

8Siōng Chú ah, lí khiâ-bé, chē tek-sèng ê chiàn-chhia lâi,

kiám sī teh tùi khoe hoat siū-khì,

tùi kang-hô khí sèng-tē,

tùi hái-iûⁿ hoat tōa siū-khì?

9Lí ê keng lóng gia̍h--chhut-lâi,

chìⁿ mā í-keng an hó-sè.

Lí ēng kang-hô pun-khui tāi-tōe.

10Soaⁿ-niá khòaⁿ-tio̍h lí lóng kiaⁿ-hiâⁿ;

tōa-chúi chhiong--kè,

chhim-ian chhut tōa-siaⁿ,

tōa-éng chhèng-koân.

11Lí ê chìⁿ siā-chhut kng,

lí ê chhiuⁿ iām-iām-sih,

ji̍t kap ge̍h soah thêng tī goân-ūi.

12Lí hoat siū-khì piàn-kiâⁿ choân-tōe;

lí tōa siū-khì thún-ta̍h lia̍t-kok.

13Lí chhut-lâi beh kái-kiù lí ê chú-bîn,

chín-kiù lí soán-li̍p ê ông.

Lí thiah-húi pháiⁿ-lâng ê chhù-téng,

thiah kah liân tōe-ki to lō͘-hiān.

14Lí ēng chhiuⁿ chha̍k-thàng in ê chiàn-sū ê thâu;

in lâi chhin-chhiūⁿ pō-hong kā góa chhe-cháu;

in ài tī àm-tiong thun-chia̍h khùn-khó͘-lâng.

15Lí khiâ-bé chhiong-kè tōa-hái,

hō͘ hái-chúi ká-kún giâ-éng.

16Góa chi̍t-ē thiaⁿ--tio̍h, kui seng-khu phi̍h-phi̍h-chhoah;

hit-ê siaⁿ hō͘ góa ê chhùi-tûn gi̍h-gi̍h-chùn,

kut-thâu so͘--khì, kha khiā bōe tiâu.

Góa kan-ta ōe-tàng tiām-tiām-á thèng-hāu

kong-kek goán ê lâng tú-tio̍h chai-lān ê ji̍t lâi-lîm.

17Sui-jiân bû-hoa-kó-chhiū bô puh-íⁿ,

phû-tô-chhiū bô kiat ké-chí,

kaⁿ-ná-chhiū bô siu-sêng,

chhân-hn̂g bô chhut ngó͘-kok,

tiâu-lāi bô pòaⁿ-chiah iûⁿ,

gû-tiâu mā bô gû,

18góa iáu-kú beh in-ūi Siōng Chú lâi hoaⁿ-hí,

in-ūi kiù góa ê Siōng-tè lâi khoài-lo̍k.

19Chì-koân ê Siōng Chú sī góa ê khùi-la̍t;

I hō͘ góa ê kha chhin-chhiūⁿ lo̍k-bú gâu cháu,

hō͘ góa tī koân ê só͘-chāi kha-pō͘ an-ún.

Kau hō͘ sèng-ga̍k-tiúⁿ, ēng hiân-ga̍k phōaⁿ-chàu.

Hap-pa-kok-su 3 - 現代台語譯本羅馬字版(TTVR)-闽南语

Learn More About Us