Si-phian 143 - 現代台語譯本羅馬字版(TTVR)-闽南语

Tāi-pi̍t ê si.Kiû Pang-chān ê Kî-tó

1Siōng Chú ah, kiû lí thiaⁿ góa ê kî-tó,

àⁿ hī-khang thiaⁿ góa ê khún-kiû,

chiàu lí ê sìn-si̍t, chiàu lí ê kong-gī ìn-tap góa.

2Kiû lí m̄-thang sím-mn̄g lí ê po̍k-jîn,

in-ūi tī lí bīn-chêng, oa̍h--teh ê lâng bô chi̍t ê sī gī-lâng.

3Tùi-te̍k khún-pek góa,

chiong góa thiat-tóe phah-tó tī thô͘-kha,

hō͘ góa tiàm tī o͘-àm ê só͘-chāi, chhin-chhiūⁿ sí chin kú ê lâng,

4tì-kàu góa ê sim-sîn sit-chì, kiông-beh hūn--khì;

góa ê sim kiaⁿ kah gāng--khì.

5Góa ōe-kì-tit kó͘-chá ê ji̍t,

siàu-liām lí it-chhè ê chok-ûi,

chēng-chēng siūⁿ lí chhiú ê só͘-chòe.

6Góa ǹg lí gia̍h-chhiú;

góa ê sim khat-bō͘ lí chhin-chhiūⁿ khòng-hān ê tōe thèng-hāu hō͘-chúi.

7Siōng Chú ah, kiû lí kóaⁿ-kín ìn-tap góa;

góa ê sim-sîn thèng-hāu lí kàu beh hūn--khì.

M̄-thang bīn oa̍t-cháu m̄ chhap góa,

chiah bián góa chhin-chhiūⁿ sí--khì ê lâng.

8Kiû lí hō͘ góa chá-khí-sî thiaⁿ-kìⁿ lí chû-ài ê siaⁿ,

in-ūi góa óa-khò lí.

Kiû lí hō͘ góa chai eng-kai kiâⁿ ê lō͘,

in-ūi góa ê sim gióng-bōng lí.

9Siōng Chú ah, kiû lí kái-kiù góa thoat-lī góa ê tùi-te̍k,

hō͘ góa thang cháu-khì bih tī lí hia.

10Lí sī góa ê Siōng-tè, kiû lí kà-sī góa chun-hêng lí ê chí-ì.

Goān lí liông-siān ê sîn ín-chhōa góa kiâⁿ pîⁿ-tháⁿ ê lō͘.

11Siōng Chú ah, kiû lí in-ūi lí ê miâ hō͘ góa koh oa̍h--khí-lâi,

chiàu lí ê kong-gī ín-chhōa góa thoat-chhut hoān-lān.

12Kiû lí chiàu lí ê chû-ài siau-bia̍t góa ê tùi-te̍k,

châu-bia̍t só͘-ū khó͘-chhó͘ góa ê lâng,

in-ūi góa sī lí ê po̍k-jîn.

Learn More About Us