Lī-bī-kì 23

Lī-bī-kì 23 - 現代台語譯本羅馬字版(TTVR)-闽南语

An-hioh-ji̍t

1Siōng Chú tùi Mô͘-se kóng,

2“Lí tio̍h tùi Í-sek-lia̍t-lâng soan-pò͘ góa ê choeh-ji̍t. Lín tī Siōng Chú ê choeh-ji̍t, tio̍h chū-chi̍p kú-hêng sèng-hōe.

3La̍k ji̍t tio̍h chòe kang, tē-chhit ji̍t sī tio̍h oân-choân hioh-khùn ê An-hioh-ji̍t. Chit-ji̍t, lín bô-lūn tòa tī sím-mi̍h só͘-chāi, jīm-hô ê kang-chok lóng m̄-thang chòe, tio̍h kú-hêng sèng-hōe; in-ūi chit-ji̍t sī Siōng Chú ê An-hioh-ji̍t.

4“Ē-bīn chiah-ê sī Siōng Chú ê choeh-kî, lín tio̍h chiàu-sî chū-chi̍p kú-hêng sèng-hōe.”

Pôaⁿ-kè-choeh kap Tû-kàⁿ-choeh(Chhut 12.1-20; Bîn 28.16-25; Sin 16.1-8)

5“Chiaⁿ-ge̍h cha̍p-sì hông-hun ê sî, sī Siōng Chú ê Pôaⁿ-kè-choeh.

6Chit kò-ge̍h ê cha̍p-gō͘ sī Siōng Chú ê Tû-kàⁿ-choeh; lín tio̍h chia̍h bô-kàⁿ-piáⁿ chhit ji̍t.

7Thâu chi̍t ji̍t tio̍h kú-hêng sèng-hōe, jīm-hô ji̍t-siông ê kang-chok lóng m̄-thang chòe.

8Chhit ji̍t kú tio̍h ēng hé sio chè-mi̍h hiàn hō͘ Siōng Chú; tē-chhit ji̍t tio̍h kú-hêng sèng-hōe, jīm-hô ji̍t-siông ê kang-chok lóng m̄-thang chòe.”

Hiàn Thâu-chúi ê Siu-sêng

9Siōng Chú bēng-lēng Mô͘-se

10tio̍h tùi Í-sek-lia̍t-lâng soan-pò͘: Lín chìn-ji̍p góa siúⁿ-sù lín ê tōe, siu-sêng ngó͘-kok ê sî, tio̍h chiong thâu-chúi ê ngó͘-kok chi̍t khún tòa-lâi kau hō͘ chè-si.

11Chè-si tio̍h tī An-hioh-ji̍t ê keh-ji̍t chiong chit-khún tī Siōng Chú ê bīn-chêng iô-iô--leh, hō͘ Siōng Chú chiap-la̍p.

12Hiàn chit-khún ngó͘-kok hit-ji̍t, lín tio̍h chiong chi̍t chiah chi̍t hè, bô hâ-chhû, kang ê mî-iûⁿ-á chòe sio-hòa-chè hiàn hō͘ Siōng Chú.

13Sòa-chiap koh hiàn sò͘-chè, chiū-sī ēng nn̄g kong-kun chhiau-iû ê iù mī-hún, ēng hé sio chòe phang-phang ê chè-mi̍h hiàn hō͘ Siōng Chú; jiân-āu koh tio̍h hiàn chi̍t kong-seng ê chiú chòe tiān-chiú-chè.

14Bô-lūn sī piáⁿ, pē--kè ê ngó͘-kok, á-sī sin siu-sêng ê be̍h-sūi, kàu lín tòa-lâi hiàn hō͘ lín ê Siōng-tè hit-ji̍t chiah thang chia̍h. Lín bô-lūn tòa tī sím-mi̍h só͘-chāi, chiah-ê beh chòe lín sè-sè-tāi-tāi éng-oán ê kui-lē.

Chhit-chhit Siu-koah-choeh(Chhut 34.22; Bîn 28.26-31; Sin 16.9-12)

15Lín tio̍h tùi Pôaⁿ-kè-choeh An-hioh-ji̍t ê keh-ji̍t, chiū-sī tùi iô be̍h-khún chòe chè-mi̍h hiàn hō͘ Siōng Chú hit-ji̍t khai-sí sǹg, móa chhit ê An-hioh-ji̍t,

16kàu tē-chhit ê An-hioh-ji̍t ê keh-ji̍t, chiū-sī tē-gō͘-cha̍p ji̍t, tio̍h hiàn sin ê sò͘-chè hō͘ Siōng Chú.

17Ta̍k-ê ka-têng tio̍h the̍h nn̄g kong-kun ê iù mī-hún, chham kàⁿ lo̍h-khì hang, chòe nn̄g tè piáⁿ, kā iô-iô--leh chòe khí-thâu-se̍k ê chè-mi̍h hiàn hō͘ Siōng Chú.

18Hit nn̄g tè piáⁿ í-gōa, koh tio̍h ēng chhit chiah chi̍t-hè bô hâ-chhû ê mî-iûⁿ-káng-á, kap chi̍t chiah gû-káng-á, í-ki̍p nn̄g chiah mî-iûⁿ-káng, chòe sio-hòa-chè hiàn hō͘ Siōng Chú; mā tio̍h ēng sò͘-chè kap tiān-chiú-chè, ēng hé sio chòe phang-phang ê chè-mi̍h hiàn hō͘ Siōng Chú.

19Lín tio̍h hiàn chi̍t chiah soaⁿ-iûⁿ-káng chòe sio̍k-chōe-chè, nn̄g chiah chi̍t-hè ê mî-iûⁿ-á chòe pêng-an-chè.

20Chè-si tio̍h chiong hit nn̄g chiah iûⁿ-á kap ēng khí-thâu-se̍k ê be̍h hang ê piáⁿ, chòe-hé tī Siōng Chú ê bīn-chêng iô-iô--leh hun-pia̍t-choh-sèng, chòe chè-mi̍h hiàn hō͘ Siōng Chú, kui hō͘ chè-si.

21Siâng hit-ji̍t, tio̍h kú-hêng sèng-hōe, jīm-hô ji̍t-siông ê kang-chok lóng m̄-thang chòe. Lín bô-lūn tòa tī sím-mi̍h só͘-chāi, chiah-ê beh chòe lín sè-sè-tāi-tāi éng-oán ê kui-lē.

22Lín siu-sêng ngó͘-kok, hn̂g-piⁿ--ê m̄-thang koah-liáu-liáu, lak--lo̍h-lâi--ê mā m̄-thang khioh; tio̍h lâu hō͘ sàn-chhiah-lâng kap chhut-gōa-lâng. Góa sī Siōng Chú — lín ê Siōng-tè.

Sin-nî(Bîn 29.1-6)

23Siōng Chú bēng-lēng Mô͘-se

24tio̍h tùi Í-sek-lia̍t-lâng soan-pò͘: Chhit-ge̍h chhoe-it, lín tio̍h oân-choân hioh-khùn, kú-hêng sèng-hōe, pûn sàu-kak chòe kì-liām.

25Jīm-hô ji̍t-siông ê kang-chok lóng m̄-thang chòe; tio̍h ēng hé sio chè-mi̍h hiàn hō͘ Siōng Chú.

Sio̍k-chōe-ji̍t(Bîn 29.7-11)

26Siōng Chú koh tùi Mô͘-se kóng,

27“Chhit-ge̍h chhoe-cha̍p sī Sio̍k-chōe-ji̍t. Lín tio̍h kú-hêng sèng-hōe, kìm-chia̍h khek-khó͘, mā tio̍h ēng hé sio chè-mi̍h hiàn hō͘ Siōng Chú.

28Hit-ji̍t, jīm-hô ê khang-khè lóng m̄-thang chòe; in-ūi hit-ji̍t sī Sio̍k-chōe-ji̍t, beh tī Siōng Chú — lín ê Siōng-tè ê bīn-chêng kā lín sio̍k-chōe.

29Siâng chit-ji̍t, bô kìm-chia̍h khek-khó͘ ê lâng, tio̍h tùi jîn-bîn ê tiong-kan kā i kek-chhut.

30Tī hit-ji̍t choh-kang--ê, góa beh tùi jîn-bîn ê tiong-kan kā i siau-bia̍t.

31Jīm-hô kang-chok lín lóng m̄-thang chòe; lín bô-lūn tòa tī sím-mi̍h só͘-chāi, che beh chòe lín sè-sè-tāi-tāi éng-oán ê kui-lē.

32Lín tio̍h kìm-chia̍h khek-khó͘ siú chit-ji̍t chòe oân-choân hioh-khùn ê An-hioh-ji̍t. Chit kò-ge̍h chhoe-káu ê hông-hun kàu keh-ji̍t ê hông-hun, lín tio̍h siú An-hioh-ji̍t.”

Tah-liâu-choeh(Bîn 29.12-40; Sin 16.13-15)

33Siōng Chú hoan-hù Mô͘-se

34tùi Í-sek-lia̍t-lâng soan-pò͘: Chhit-ge̍h cha̍p-gō͘ sī Tah-liâu-choeh. Lín tio̍h tùi chit-ji̍t khí liân-sòa chhit ji̍t ǹg Siōng Chú siú-choeh.

35Thâu chi̍t ji̍t tio̍h kú-hêng sèng-hōe, jīm-hô ji̍t-siông ê kang-chok lóng m̄-thang chòe.

36Lín tio̍h chhit ji̍t kú ēng hé sio chè-mi̍h hiàn hō͘ Siōng Chú; tē-poeh ji̍t mā tio̍h kú-hêng sèng-hōe, ēng hé sio chè-mi̍h hiàn hō͘ Siōng Chú. Chit-ê sī giâm-siok-hōe, jīm-hô ji̍t-siông ê kang-chok lóng m̄-thang chòe.

37Í-siōng sī Siōng Chú ê choeh-kî; lín tio̍h chū-chi̍p kú-hêng sèng-hōe, chiàu ji̍t-kî chiong sio-hòa-chè, sò͘-chè, kap kî-tha ê chè-mi̍h, í-ki̍p tiān-chiú-chè ēng hé sio hiàn hō͘ Siōng Chú.

38Chiah-ê sī lín tī Siōng Chú ê An-hioh-ji̍t só͘ hiàn ê lé-mi̍h, siā-goān ê chè, í-ki̍p kam-sim hiàn ê chè í-gōa, tio̍h hiàn hō͘ Siōng Chú ê chè.

39Lín siu-sêng thó͘-tōe chhut-sán ê sî, tùi chhit-ge̍h cha̍p-gō͘ khí, tio̍h siú Siōng Chú ê choeh-kî chhit ji̍t; thâu chi̍t ji̍t kap tē-poeh ji̍t tio̍h oân-choân hioh-khùn.

40Thâu chi̍t ji̍t tio̍h the̍h tōa-châng hó-khòaⁿ ê chhiū-á ê ké-chí, chang-chhiū ê ki, chin ām ê chhiū ê chhiū-oe, kap khoe-piⁿ liú-chhiū ê ki, tī Siōng Chú — lín ê Siōng-tè bīn-chêng khèng-chiok chhit ji̍t.

41Ta̍k-nî ê chhit--ge̍h, lín tio̍h ǹg Siōng Chú siú chit-ê choeh chhit ji̍t; che sī lín sè-sè-tāi-tāi éng-oán ê kui-lē.

42Lín tio̍h tòa tī chháu-liâu-á chhit ji̍t; só͘-ū chāi-tōe ê Í-sek-lia̍t-lâng lóng tio̍h tòa tī chháu-liâu-á,

43thang hō͘ lín ta̍k sè-tāi ê lâng chai, góa chhōa Í-sek-lia̍t-lâng chhut Ai-ki̍p ê sî, ū hō͘ in tòa tī chháu-liâu-á. Góa sī Siōng Chú — lín ê Siōng-tè.

44 Mô͘-se chiū chiong Siōng Chú chí-tēng ê choeh-kî tùi Í-sek-lia̍t-lâng soan-pò͘.

Lī-bī-kì 23 - 現代台語譯本羅馬字版(TTVR)-闽南语

Learn More About Us