Si-phian 59

Si-phian 59 - 現代台語譯本羅馬字版(TTVR)-闽南语

Sò-lô phài lâng khì Tāi-pi̍t ê chhù bâi-ho̍k beh thâi i ê sî, Tāi-pi̍t chòe chit-siú kim-si, kau hō͘ sèng-ga̍k-tiúⁿ; tiāu, ēng “M̄-thang Húi-hoāi”.Kî-kiû Siōng-tè Pó-iū

1Góa ê Siōng-tè ah, kiû lí kiù góa thoat-lī góa ê tùi-te̍k,

kā góa an-tì tī koân ê só͘-chāi, hō͘ góa thoat-lī khí-lâi kong-kek góa ê lâng.

2Kiû lí kiù góa thoat-lī choh-pháiⁿ ê lâng,

kiù góa thoat-lī ài hāi lâng sìⁿ-miā ê lâng.

3In bâi-ho̍k beh hāi góa ê sìⁿ-miā;

hiong-ok ê lâng chū-chi̍p lâi kong-kek góa,

m̄-kú Siōng Chú ah, che m̄-sī in-ūi góa ê kè-sit á-sī chōe-kò.

4Góa sui-jiân bô kè-sit, in chhiong-lâi beh hāi góa.

Kín khí--lâi, khòaⁿ góa ê khùn-kéng lâi pang-chān góa!

5Siōng Chú — Bān-kun ê Thóng-sòe Siōng-tè ah,

kín khí-lâi chhú-hoa̍t te̍k-tùi lí ê lia̍t-pang!

Í-sek-lia̍t ê Siōng-tè ah, m̄-thang khoan-sià só͘-ū kan-chà ê pháiⁿ-lâng.

6In àm-sî tò--lâi, chhin-chhiūⁿ káu teh pūi,

tī siâⁿ-lāi kiâⁿ-lâi-kiâⁿ-khì.

7In ê chhùi thò͘-chhut ê ōe chhin-chhiūⁿ lāi ê to;

in siūⁿ, “Kiám ū lâng teh thiaⁿ?”

8M̄-kú Siōng Chú lí beh chhiò in;

lí beh thí-chhiò lia̍t-pang.

9Siōng-tè — góa ê khùi-la̍t ah, góa beh gióng-bōng lí,

in-ūi lí sī góa ê pó-lúi.

10Góa ê Siōng-tè ōe ēng chû-ài khoán-thāi góa;

Siōng-tè ōe hō͘ góa khòaⁿ-kìⁿ tùi-te̍k siū pò-èng.

11M̄-thang châu-bia̍t in, chiah bián góa ê chú-bîn bōe-kì--tit.

Chú — goán ê tún-pâi ah, kiû lí ēng lí ê khùi-la̍t hō͘ in sì-kòe liû-lōng koh sit-sè.

12In in-ūi chhùi hoān ê chōe kap chhùi-tûn kóng ê ōe,

ōe poa̍h-lo̍h ka-kī ê kiau-ngō͘ só͘ siat ê hām-chíⁿ.

In-ūi in só͘ kóng ê chiù-mē kap pe̍h-chha̍t,

13kiû lí hoat siū-khì châu-bia̍t in, kā in thiat-tóe siau-bia̍t,

hō͘ lâng lóng chai Siōng-tè teh chiáng-koán Í-sek-lia̍t,

sīm-chì kàu thiⁿ-piⁿ-hái-kak.

14In àm-sî tò--lâi, chhin-chhiūⁿ káu teh pūi,

tī siâⁿ-lāi kiâⁿ-lâi-kiâⁿ-khì.

15In cháu-lâi-cháu-khì chhē-chia̍h,

chia̍h bô pá chiū kui-mî pūi bô-thêng.

16M̄-kú góa beh chhiùⁿ-koa chheng-chàn lí ê khùi-la̍t,

chá-khí-sî beh tōa-siaⁿ o-ló lí ê chû-ài;

in-ūi lí sī góa ê pó-lúi,

tī hoān-lān ê ji̍t chòe góa pī-lān ê só͘-chāi.

17Siōng-tè — góa ê khùi-la̍t ah, góa beh chhiùⁿ-koa chheng-chàn lí,

in-ūi lí sī góa ê pó-lúi, sī éng-oán thiàⁿ góa ê Siōng-tè.

Si-phian 59 - 現代台語譯本羅馬字版(TTVR)-闽南语

Learn More About Us