Si-phian 119

Si-phian 119 - 現代台語譯本羅馬字版(TTVR)-闽南语

Siōng Chú ê Lu̍t-hoat

1Hêng-ûi bô thang chí-chek,

seng-oa̍h chun-hêng Siōng Chú lu̍t-hoat ê lâng,

chit-khoán lâng chin ū hok-khì!

2Thiaⁿ-thàn Siōng Chú ê kà-sī,

choân-sim chhē-kiû I ê lâng,

chit-khoán lâng chin ū hok-khì!

3In bô chòe put-gī ê sū,

ū chun-hêng I ê tō-lō͘.

4Siōng Chú, lí chiong lí ê lu̍t-lē bēng-lēng goán,

ài goán khak-si̍t chun-siú.

5Goān góa ê só͘-kiâⁿ-só͘-chòe,

khak-si̍t ū teh chun-siú lí ê kui-lē.

6Góa tiōng-sī lí it-chhè ê kài-bēng,

bōe tì-kàu sit-pāi kiàn-siàu.

7Góa ha̍k-si̍p lí kong-chèng ê phòaⁿ-toàn;

góa beh sêng-sim kám-siā lí.

8Góa beh chun-siú lí ê kui-lē;

kiû lí choa̍t-tùi m̄-thang pàng-sak góa.

Ì-ài Siōng Chú ê Lu̍t-hoat

9Siàu-liân-lâng tio̍h án-chóaⁿ hō͘ seng-oa̍h sûn-kiat?

Tio̍h chun-hêng lí ê ōe!

10Siōng Chú ah, góa beh choân-sim chhē-kiû lí;

kiû lí hō͘ góa bô phian-lī lí ê kài-bēng.

11Góa chiong lí ê ōe khǹg tī sim-lāi,

chiah bián hoān-chōe tek-chōe lí.

12Siōng Chú ah, lí eng-kai siū chheng-chàn;

kiû lí kà góa bat lí ê kui-lē.

13Lí só͘ kóng it-chhè ê kui-lē,

góa ēng chhùi chhut-siaⁿ liām.

14Góa ì-ài lí ê kà-sī,

chhin-chhiūⁿ lâng ì-ài tōa châi-hù.

15Góa ná liām ná siūⁿ lí ê lu̍t-lē,

tiōng-sī lí ê tō-lō͘.

16Góa ì-ài lí ê bēng-lēng,

bōe bōe-kì-tit lí ê ōe.

Chun-thàn Siōng Chú ê Lu̍t-hoat

17Kiû lí si tōa-un hō͘ lí ê po̍k-jîn,

hō͘ góa oa̍h thang chun-thàn lí ê ōe.

18Kiû lí khui góa ê ba̍k-chiu,

hō͘ góa khòaⁿ-chhut lí lu̍t-hoat ê kî-biāu.

19Góa tī tōe-chiūⁿ sī chhut-gōa-lâng;

kiû lí m̄-thang tùi góa khàm-ba̍t lí ê kài-bēng.

20Góa put-sî pek-chhiat him-bō͘ lí ê kui-lē,

him-bō͘ kàu kiông-beh hūn--khì.

21Lí chek-pī kiau-ngō͘ siū chiù-chó͘ ê lâng;

in bê-lō͘ lī-khui lí ê kài-bēng.

22Lâng tùi góa ê lêng-jio̍k kap khòaⁿ-khin, kiû lí tû--khì,

in-ūi góa ū chun-siú lí ê kà-sī.

23Thóng-tī-chiá chē-teh chham-siông beh hāi góa,

m̄-kú lí ê po̍k-jîn teh be̍k-sióng lí ê bēng-lēng.

24Lí ê kà-sī sī góa só͘ ì-ài,

sī góa ê tō-su.

Chhî-siú Siōng Chú ê Lu̍t-hoat

25Góa siū phah-tó phak tī thô͘-kha;

kiû lí chiàu lí ê èng-ún pó-siú góa ê sìⁿ-miā.

26Góa tùi lí kóng-khí só͘ chòe ê tāi-chì, lí ū ìn góa;

kiû lí kà góa bat lí ê kui-lē.

27Kiû lí hō͘ góa bêng-pe̍k lí ê lu̍t-lē,

góa thang be̍k-sióng lí kî-biāu ê chok-ûi.

28Góa ê sim pi-siong kàu beh chhùi--khì;

kiû lí chiàu lí ê èng-ún hō͘ góa hôe-ho̍k goân-khì.

29Kiû lí hō͘ góa bô kiâⁿ hu-ké ê tō-lō͘;

kiû lí si-un kà-sī góa lí ê lu̍t-hoat.

30Góa ū kéng chin-si̍t ê lō͘;

góa khòaⁿ-tāng lí ê kui-lē.

31Góa chhî-siú lí ê kà-sī;

Siōng Chú ah, kiû lí m̄-thang hō͘ góa sit-pāi kiàn-siàu.

32Góa beh jia̍t-chhiat tui-kiû lí ê kài-bēng,

in-ūi lí ū khui góa ê sim-khiàu.

Kiû Tì-hūi Liáu-kái Siōng Chú ê Lu̍t-hoat

33Siōng Chú ah, kiû lí chiong chun-siú lí bēng-lēng ê tō-lō͘ chí-sī góa,

hō͘ góa chai án-chóaⁿ thiat-tóe chun-siú.

34Kiû lí hō͘ góa ū tì-hūi chun-siú lí ê lu̍t-hoat,

thang choân-sim chun-siú.

35Kiû lí chhōa góa kiâⁿ lí kài-bēng ê lō͘;

chit-ê lō͘ góa chin ì-ài.

36Kiû lí hō͘ góa ê sim kui-ǹg lí ê kà-sī,

bô ǹg put-gī ê chîⁿ-châi.

37Kiû lí hō͘ góa bōe ì-ài hu-ké,

chiàu lí ê ōe sù góa oa̍h-miā.

38Kiû lí si̍t-hiān tùi lí po̍k-jîn ê èng-ún,

hō͘ lâng thang kèng-ùi lí.

39Kiû lí hō͘ góa só͘ kiaⁿ ê lêng-jio̍k lī-khui góa,

in-ūi lí ê kui-lē sī hó.

40Góa him-bō͘ lí ê lu̍t-lē;

kiû lí chiàu lí ê kong-gī sù góa oa̍h-miā.

Sìn-khò Siōng Chú ê Lu̍t-hoat

41Siōng Chú ah, kiû lí hián-sī lí ê chû-ài,

chiàu lí ê èng-ún chín-kiù góa,

42góa chiū thang ìn-tap lêng-jio̍k góa ê lâng,

in-ūi góa óa-khò lí ê ōe.

43Kiû lí m̄-thang chiong chin-lí ê ōe tùi góa ê chhùi chhiúⁿ--khì,

in-ūi góa gióng-bōng lí ê phòaⁿ-toàn.

44Góa beh kè-sio̍k siú lí ê lu̍t-hoat,

ti̍t-kàu éng-oán.

45Góa beh chū-iû chū-chāi seng-oa̍h,

in-ūi góa ū chhē-kiû lí ê lu̍t-lē.

46Góa tī kun-ông ê bīn-chêng káng-lūn lí ê kà-sī,

mā bōe tì-kàu kiàn-siàu.

47Lí ê kài-bēng hō͘ góa hí-lo̍k,

in-ūi chiah-ê kài-bēng sī góa só͘ ì-ài.

48Góa chun-tiōng koh ì-ài lí ê kài-bēng;

góa mā beh ná liām ná siūⁿ lí ê kui-lē.

Khak-sìn Siōng Chú ê Lu̍t-hoat

49Kiû lí ōe-kì-tit tùi lí po̍k-jîn ê èng-ún,

in-ūi lí hō͘ góa ū ǹg-bāng.

50Tī hoān-lān tiong, góa tit-tio̍h an-ùi;

tùi lí ê èng-ún, góa tit-tio̍h oa̍h-miā.

51Kiau-ngō͘ ê lâng it-ti̍t bú-jio̍k thí-chhiò góa,

iáu-kú góa m̄-bat phian-lī lí ê lu̍t-hoat.

52Siōng Chú ah, góa ōe-kì-tit lí kó͘-chá í-lâi ê kui-lē,

tùi chiah-ê tit-tio̍h an-ùi.

53Góa in-ūi hiah-ê khì-sak lí lu̍t-hoat ê pháiⁿ-lâng,

khí tōa siū-khì, chhin-chhiūⁿ hé teh to̍h.

54Góa bô-lūn chhut-gōa khì tó-ūi,

lóng ēng lí ê kui-lē chòe si-koa.

55Siōng Chú ah, góa mî--sî ōe-kì-tit lí ê tông-chāi,

chun-siú lí ê lu̍t-hoat.

56Góa tit-tio̍h hok-hūn,

in-ūi góa ū sūn-thàn lí ê lu̍t-lē.

Jia̍t-sim Chun-thàn Siōng Chú ê Lu̍t-hoat

57Siōng Chú sī góa ê sán-gia̍p;

góa bat kóng, “Góa beh chun-thàn lí ê ōe.”

58Góa bat choân-sim kiû lí ê un;

kiû lí chiàu lí ê èng-ún lîn-bín góa.

59Góa chhim-chhim su-siúⁿ lí ê tō-lō͘,

oa̍t-tńg-sin kui-ǹg lí ê kà-sī.

60Góa kóaⁿ-kín bô iân-chhiân,

beh siú lí ê kài-bēng.

61Pháiⁿ-lâng ê soh khún-pa̍k góa,

m̄-kú góa bô bōe-kì-tit lí ê lu̍t-hoat.

62Góa in-ūi lí kong-chèng ê phòaⁿ-toàn,

pòaⁿ-mî khí-lâi kám-siā lí.

63Só͘-ū kèng-ùi lí, chun-siú lí lu̍t-lē ê lâng,

góa kap in chòe pêng-iú.

64Siōng Chú ah, lí ê chû-ài piàn-móa choân-tōe;

kiû lí kà góa bat lí ê kui-lē.

Siōng Chú Pó-kùi ê Lu̍t-hoat

65Siōng Chú ah, lí ū chiàu lí ê èng-ún,

hó khoán-thāi lí ê po̍k-jîn.

66Kiû lí kà-sī góa, hō͘ góa ū tì-sek kap chèng-khak ê phòaⁿ-toàn,

in-ūi góa sìn-khò lí ê kài-bēng.

67Góa chêng ū kiâⁿ bê-lō͘, siū lí kéng-kài,

taⁿ góa chun-siú lí ê ōe.

68Lí sī liông-siān, lí ê só͘-chòe lóng sī hó;

kiû lí kà góa bat lí ê kui-lē.

69Kiau-ngō͘ ê lâng ēng pe̍h-chha̍t-ōe kong-kek góa,

m̄-kú góa beh choân-sim chun-siú lí ê lu̍t-lē.

70In ê sim chhin-chhiūⁿ hō͘ iû pau-ba̍t bâ-pì,

m̄-kú góa ì-ài lí ê lu̍t-hoat.

71Góa siū koán-kàu tùi góa ū lī-ek,

hō͘ góa thang ha̍k-si̍p lí ê kui-lē.

72Lí só͘ kóng ê lu̍t-hoat tùi góa ū lī-ek,

iâⁿ-kè chheng-bān ê kim-gûn.

Siōng Chú Kong-gī ê Lu̍t-hoat

73Lí ê chhiú chhòng-chō góa, lia̍p-chō góa;

kiû lí sù góa tì-hūi thang ha̍k-si̍p lí ê kài-bēng.

74Kèng-ùi lí ê lâng ōe khòaⁿ-kìⁿ góa lâi hoaⁿ-hí,

in-ūi góa gióng-bōng lí ê ōe.

75Siōng Chú ah, góa chai lí ê phòaⁿ-toàn kong-chèng,

lí ū chiàu lí ê sìn-si̍t koán-kàu góa.

76Kiû lí chiàu lí tùi po̍k-jîn ê èng-ún,

ēng lí ê chû-ài an-ùi góa.

77Goān lí ê chû-pi lîm-kàu góa, hō͘ góa thang oa̍h,

in-ūi lí ê lu̍t-hoat sī góa só͘ ì-ài.

78Goān kiau-ngō͘ ê lâng sit-pāi kiàn-siàu, in-ūi in bô lí-iû óng-khut góa,

m̄-kú góa beh ná liām ná siūⁿ lí ê lu̍t-lē.

79Goān kèng-ùi lí, jīn-bat lí kà-sī ê lâng,

tò-tńg-lâi chiap-la̍p góa.

80Goān góa choân-sim chun-siú lí ê kui-lē,

hō͘ góa bōe tì-kàu sit-pāi kiàn-siàu.

Kî-kiû Siōng Chú Kái-kiù

81Góa ê sim pek-chhiat him-bō͘ lí ê chín-kiù kàu beh hūn--khì;

lí ê ōe hō͘ góa ū ǹg-bāng.

82Góa in-ūi ǹg-bāng lí ê èng-ún kàu ba̍k-chiu beh hoe--khì;

góa kóng, “Lí sím-mi̍h sî beh an-ùi góa?”

83Sui-jiân góa chhin-chhiūⁿ phê-tē hō͘ hé hun kah beh ta--khì,

iáu-kú góa bô bōe-kì-tit lí ê bēng-lēng.

84Lí ê po̍k-jîn tio̍h koh jím-nāi jōa kú?

Lí tī-sî chiah beh sím-phòaⁿ khún-pek góa ê lâng?

85Kiau-ngō͘ bô thàn lí lu̍t-hoat ê lâng,

ku̍t hām-khiⁿ beh hāi góa.

86In bô lí-iû khún-pek góa,

m̄-kú lí ê kài-bēng lóng khó-khò;

kiû lí pang-chān góa.

87Góa hiám-hiám-á hō͘ in tùi tōe-chiūⁿ siau-bia̍t,

m̄-kú góa bô pàng-sak lí ê lu̍t-lē.

88In-ūi lí ū hong-sēng ê chû-ài, kiû lí pó-siú góa ê sìⁿ-miā;

góa beh chun-siú lí ê chhùi só͘ chhut ê kà-sī.

Siong-sìn Siōng Chú ê Lu̍t-hoat

89Siōng Chú ah, lí éng-oán chûn-chāi;

lí ê ōe khak-li̍p tī thiⁿ-téng.

90Lí ê sìn-si̍t sòa kàu bān-tāi;

lí kiàn-li̍p tōe, hō͘ i khak-li̍p.

91Thiⁿ tōe chiàu lí ê an-pâi, kàu taⁿ iáu chûn-chāi;

in lóng sī lí ê chhe-ēng.

92Góa nā m̄-sī ì-ài lí ê lu̍t-hoat,

chá chiū tī góa ê khó͘-lān tiong bia̍t-bông.

93Góa éng-oán bōe bōe-kì-tit lí ê lu̍t-lē,

in-ūi lí ēng lí ê lu̍t-lē pó-siú góa ê sìⁿ-miā.

94Góa sī lí ê, kiû lí kiù góa,

in-ūi góa chhē-kiû lí ê lu̍t-lē.

95Pháiⁿ-lâng tng-tán beh húi-bia̍t góa,

m̄-kú góa beh be̍k-sióng lí ê kà-sī.

96Góa khòaⁿ-chhut só͘ ū oân-choân--ê lóng iú-hān,

chí-ū lí ê kài-bēng oân-choân, bô kài-hān.

Ì-ài Siōng Chú ê Lu̍t-hoat

97Góa si̍t-chāi chin ì-ài lí ê lu̍t-hoat,

kui-ji̍t ná liām ná siūⁿ.

98Lí ê kài-bēng put-sî tī góa sin-piⁿ,

hō͘ góa pí góa ê tùi-te̍k khah ū tì-hūi.

99Góa pí góa lóng-chóng ê sian-siⁿ khah thong-ta̍t,

in-ūi góa ná liām ná siūⁿ lí ê kà-sī.

100Góa pí lāu-lâng khah ū tì-hūi,

in-ūi góa chun-siú lí ê lu̍t-lē.

101Góa kìm-chí góa ê kha kiâⁿ it-chhè ê pháiⁿ-lō͘,

hō͘ góa thang chun-hêng lí ê ōe.

102Góa bô phian-lī lí ê kui-lē,

in-ūi lí ū kà-sī góa.

103Lí ê ōe tī góa chhùi-lāi,

pí bi̍t koh-khah tiⁿ.

104Góa tùi lí ê lu̍t-lē tit-tio̍h tì-hūi,

só͘-í góa oàn-hūn it-chhè siâ-ok ê lō͘.

Siōng Chú Lu̍t-hoat ê Kng

105Lí ê ōe sī góa kha-chêng ê teng,

sī góa lō͘-siōng ê kng.

106Lí kong-chèng ê phòaⁿ-toàn, góa koat-ì beh chun-hêng;

góa it-tēng beh án-ni chun-siú.

107Góa siū-tio̍h ke̍k-tōa ê khó͘-lān;

Siōng Chú ah, kiû lí chiàu lí ê èng-ún pó-siú góa ê sìⁿ-miā.

108Siōng Chú ah, kiû lí chiap-siū góa ê chhùi hoaⁿ-hí hiàn ê o-ló,

koh chiong lí ê kui-lē kà-sī góa.

109Góa ê sìⁿ-miā put-sî tú-tio̍h gûi-hiám,

iáu-kú góa bô bōe-kì-tit lí ê lu̍t-hoat.

110Pháiⁿ-lâng siat lô-bāng beh hāi góa,

iáu-kú góa bô phian-lī lí ê lu̍t-lē.

111Góa chiong lí ê kà-sī chòe éng-oán ê sán-gia̍p,

in-ūi chiah-ê sī góa sim só͘ ì-ài.

112Góa choân-sim kui-ǹg lí ê bēng-lēng,

éng-oán chun-thàn, ti̍t-kàu sìⁿ-miā kiat-sok.

Tùi Siōng Chú ê Lu̍t-hoat Tit-tio̍h Pó-hō͘

113Tùi lí bô tiong-sim ê lâng, góa iàm-ò͘ⁿ;

góa só͘ ì-ài--ê, sī lí ê lu̍t-hoat.

114Lí sī góa siám-bih ê só͘-chāi, sī pó-hō͘ góa ê tún-pâi;

góa gióng-bōng lí ê èng-ún.

115Choh-pháiⁿ ê lâng ah, tio̍h lī-khui góa,

hō͘ góa thang chun-siú góa ê Siōng-tè ê kài-bēng.

116Kiû lí chiàu lí ê èng-ún hû-chhî góa, pó-siú góa ê sìⁿ-miā,

hō͘ góa bô in-ūi gióng-bōng lí sit-pāi kiàn-siàu.

117Kiû lí hû-chhî góa, góa chiū tit-kiù;

góa beh put-sî choân-sim chun-hêng lí ê bēng-lēng.

118Ûi-pōe lí bēng-lēng ê lâng, lí kū-choa̍t in;

in ê khúi-chà ōe sit-pāi.

119Sè-kan ê pháiⁿ-lâng, lí khòaⁿ-chòe pùn-sò kā in tû--khì,

só͘-í góa ì-ài lí ê kà-sī.

120Góa in-ūi kiaⁿ-ùi lí, kui seng-khu phi̍h-phi̍h-chhoah;

lí ê sím-phòaⁿ hō͘ góa kiaⁿ-hiâⁿ.

Chun-hêng Siōng Chú ê Lu̍t-hoat

121Góa ū si̍t-hêng kong-gī chèng-ti̍t;

kiû lí m̄-thang kā góa pàng hō͘ ap-chè góa ê lâng.

122Kiû lí pó-chèng lí ê po̍k-jîn sū-sū heng-thong,

bô siū-tio̍h kiau-ngō͘ ê lâng ap-chè.

123Góa ǹg-bāng lí ê chín-kiù kap kong-gī ê èng-ún,

tì-kàu ba̍k-chiu hoe.

124Kiû lí chiàu lí ê chû-ài tùi-thāi lí ê po̍k-jîn,

chiong lí ê kui-lē kà-sī góa.

125Góa sī lí ê po̍k-jîn, kiû lí sù góa tì-hūi,

hō͘ góa bat lí ê kà-sī.

126Siōng Chú ah, hiān-chāi sī lí hêng-tōng ê sî,

in-ūi lâng phò-hoāi lí ê lu̍t-hoat.

127Só͘-í góa ì-ài lí ê kài-bēng,

pí kim, pí sûn-kim koh-khah ài.

128Lí ūi bān-sū tēng ê lu̍t-lē, góa lóng chun-hêng,

só͘-í góa iàm-ò͘ⁿ it-chhè hu-ké ê lō͘.

Khat-bō͘ Chun-hêng Siōng Chú ê Lu̍t-hoat

129Lí ê kà-sī kî-biāu,

góa chīn-sim chun-siú.

130Lí ê ōe chi̍t-ē kóe-seh chiū hoat-chhut kng,

liân gōng-ti̍t ê lâng mā ōe liáu-kái.

131Góa chhùi tōa khui ti̍t-ti̍t chhoán,

khat-bō͘ lí ê kài-bēng.

132Kiû lí oa̍t kè-lâi khòaⁿ góa, lîn-bín góa,

chhin-chhiūⁿ lí teh tùi-thāi kèng-ài lí miâ ê lâng.

133Kiû lí chiàu lí ê èng-ún ín-chhōa góa ê kha-pō͘,

bô iông-ún chōe-ok koán-hat góa.

134Kiû lí kiù góa thoat-lī lâng ê ap-chè,

hō͘ góa thang chun-siú lí ê lu̍t-lē.

135Goān lí ēng lí ê bīn ê kng chiò lí ê po̍k-jîn,

kà góa bat lí ê kui-lē.

136Góa ê ba̍k-sái chhin-chhiūⁿ khoe-chúi ti̍t-ti̍t lâu,

in-ūi lâng bô chun-siú lí ê lu̍t-hoat.

Siōng Chú ê Lu̍t-hoat Kong-chèng

137Siōng Chú, lí sī kong-gī;

lí ê phòaⁿ-toàn kong-chèng.

138Lí pan-pò͘ ê lu̍t-lē kong-chèng,

oân-choân khó-khò.

139Góa hui-siông siū-khì chhin-chhiūⁿ hé beh kā góa thun-bia̍t,

in-ūi góa ê tùi-te̍k bōe-kì-tit lí ê ōe.

140Lí ê èng-ún sûn-chin khó-khò;

lí ê po̍k-jîn chin ì-ài.

141Góa pi-bî, hō͘ lâng khòaⁿ-khin,

m̄-kú góa bô bōe-kì-tit lí ê lu̍t-lē.

142Lí ê kong-gī sòa kàu éng-oán;

lí ê lu̍t-hoat chin-si̍t.

143Góa siū-tio̍h hoān-lān iu-khó͘,

iáu-kú ì-ài lí ê kài-bēng.

144Lí ê kà-sī éng-oán kong-chèng;

kiû lí sù góa tì-hūi, hō͘ góa thang oa̍h.

Kî-kiû Siōng Chú Kái-kiù

145Siōng Chú ah, góa choân-sim kiû-kiò lí, kiû lí ìn góa;

góa beh chun-siú lí ê bēng-lēng.

146Góa kiû-kiò lí, kiû lí kiù góa;

góa beh chun-siú lí ê kà-sī.

147Thiⁿ-bē-kng góa chiū khí-lâi kiû-kiò lí;

góa gióng-bōng lí ê ōe.

148Góa kui-mî ba̍k-chiu kim-kim,

ná liām ná siūⁿ lí ê ōe.

149Siōng Chú ah, in-ūi lí ū chû-ài, kiû lí thiaⁿ góa ê siaⁿ;

chiàu lí kong-chèng ê phòaⁿ-toàn, kiû lí pó-siú góa ê sìⁿ-miā.

150Kè-bô͘ chòe pháiⁿ ê lâng pek-kūn góa;

in lī lí ê lu̍t-hoat hn̄g-hn̄g.

151M̄-kú Siōng Chú ah, lí óa-kūn góa;

lí ê kài-bēng chin-si̍t khó-khò.

152Góa chá chiū ha̍k-si̍p lí ê kà-sī;

lí hō͘ in khak-li̍p kàu éng-oán.

Kî-kiû Siōng Chú Pang-chān

153Kiû lí koan-sim góa ê khó͘-lān lâi kái-kiù góa,

in-ūi góa bô bōe-kì-tit lí ê lu̍t-hoat.

154Kiû lí kā góa sin-oan, kiù-sio̍k góa,

chiàu lí ê èng-ún pó-siú góa ê sìⁿ-miā.

155Kiù-un lī-khui pháiⁿ-lâng hn̄g-hn̄g,

in-ūi in bô chhē-kiû lí ê bēng-lēng.

156Siōng Chú, lí ū hong-sēng ê chû-ài;

chiàu lí kong-chèng ê phòaⁿ-toàn, kiû lí pó-siú góa ê sìⁿ-miā.

157Khún-pek góa, tùi-te̍k góa ê lâng chin chōe,

iáu-kú góa bô phian-lī lí ê kà-sī.

158Góa khòaⁿ-tio̍h kan-ok ê lâng chiū chin iàm-ò͘ⁿ,

in-ūi in bô chun-siú lí ê ōe.

159Lí khòaⁿ góa jōa-á-ni̍h ì-ài lí ê lu̍t-lē;

Siōng Chú ah, kiû lí chiàu lí ê chû-ài pó-siú góa ê sìⁿ-miā.

160Lí ê ōe ê pún-chit sī chin-si̍t;

lí it-chhè kong-chèng ê phòaⁿ-toàn éng-oán chûn-sio̍k.

Ì-ài Siōng Chú ê Lu̍t-hoat

161Thóng-tī-chiá bô-lí-bô-iû pek-hāi góa;

m̄-kú góa ê sim kiaⁿ-ùi lí ê ōe.

162Góa ì-ài lí ê ōe,

chhin-chhiūⁿ lâng tit-tio̍h chin chōe chiàn-lī-phín.

163Góa thòng-hūn iàm-ò͘ⁿ pe̍h-chha̍t-ōe,

m̄-kú góa ì-ài lí ê lu̍t-hoat.

164In-ūi lí kong-chèng ê phòaⁿ-toàn,

góa ta̍k-ji̍t chhit piàn chheng-chàn lí.

165Ì-ài lí ê lu̍t-hoat ê lâng ū tōa pêng-an,

bô chi̍t hāng ōe hō͘ in poa̍h-tó sit-pāi.

166Siōng Chú ah, góa ǹg-bāng lí ê chín-kiù,

chun-hêng lí ê kài-bēng.

167Góa ê sim ū chun-siú lí ê kà-sī;

chiah-ê ōe, góa hui-siông ì-ài.

168Góa ū siú lí ê lu̍t-lē kap kà-sī;

góa ê só͘-kiâⁿ-só͘-chòe, lí lóng khòaⁿ ōe tio̍h.

Khat-bō͘ Siōng Chú Chín-kiù

169Siōng Chú ah, goān góa kiû-kiò ê siaⁿ thàu kàu lí ê bīn-chêng;

kiû lí chiàu lí ê èng-ún sù góa tì-hūi.

170Goān góa khún-kiû ê ōe ta̍t-kàu lí bīn-chêng;

kiû lí chiàu lí ê èng-ún khan-kiù góa.

171Goān góa ê chhùi-tûn hoat-chhut o-ló,

in-ūi lí ū chiong lí ê lu̍t-lē kà-sī góa.

172Goān góa ê chi̍h soan-pò͘ lí ê èng-ún,

in-ūi lí ê kài-bēng lóng kong-chèng.

173Kiû lí chhun-chhiú pang-chān góa,

in-ūi góa ū soán-te̍k lí ê lu̍t-lē.

174Siōng Chú ah, góa khat-bō͘ lí ê chín-kiù;

lí ê lu̍t-hoat sī góa só͘ ì-ài.

175Kiû lí hō͘ góa oa̍h--teh, thang chheng-chàn lí,

hō͘ lí ê phòaⁿ-toàn pang-chān góa.

176Góa bê-lō͘ chhin-chhiūⁿ sit-bê ê iûⁿ;

kiû lí kā lí ê po̍k-jîn chhē tò-tńg,

in-ūi góa bô bōe-kì-tit lí ê kài-bēng.

Si-phian 119 - 現代台語譯本羅馬字版(TTVR)-闽南语

Learn More About Us