Hui-li̍p-pí-su 1

Hui-li̍p-pí-su 1 - 現代台語譯本羅馬字版(TTVR)-闽南语

1Góa Pó-lô kap Thê-mô͘-thài sī Ki-tok Iâ-so͘ ê po̍k-jîn. Goán siá-phoe hō͘ tòa tī Hui-li̍p-pí, kap sio̍k Ki-tok Iâ-so͘ lóng-chóng ê sìn-tô͘ í-ki̍p kok-ūi kam-tok kap chip-sū.

2Goān lán ê Pē Siōng-tè kap Chú Iâ-so͘ Ki-tok sù lín un-tián kap pêng-an!

Ūi Hui-li̍p-pí ê Sìn-tô͘ Kî-tó

3Góa ta̍k-piàn siūⁿ-tio̍h lín ê sî lóng kám-siā góa ê Siōng-tè;

4ta̍k-piàn ūi-tio̍h lín chèng-lâng kî-tó ê sî lóng ēng hoaⁿ-hí ê sim kî-kiû,

5in-ūi lín tùi thâu chi̍t ji̍t khí kàu hiān-chāi, lóng ū tâng-sim hia̍p-le̍k teh thoân hok-im.

6Góa chhim-sìn hit-ūi tī lín tiong-kan khai-sí chòe bí-hó kang-chok ê Siōng-tè, ōe kè-sio̍k kā hit-ê kang-chok oân-sêng, ti̍t-kàu Ki-tok Iâ-so͘ koh-lâi ê Ji̍t.

7Góa siông-siông teh siàu-liām lín, tùi lín chèng-lâng ū chit-khoán ê sim-chêng sī tong-jiân--ê, in-ūi bô-lūn góa hiān-chāi tī kaⁿ-ga̍k lāi á-sī í-chêng ūi-tio̍h hok-im piān-hō͘ kap choh-chèng ê sî, lín lóng ū kap góa hun-hióng Siōng-tè ê un-sù.

8Góa ēng Ki-tok Iâ-so͘ ê thiàⁿ-sim jōa-ni̍h siàu-liām lín tāi-ke, Siōng-tè thang kā góa choh-chèng.

9Góa só͘ kî-kiû--ê sī án-ni: Lín ê thiàⁿ ōe ná ke-thiⁿ, lín ê tì-sek kap tùi ta̍k-hāng ê phòaⁿ-toàn-le̍k mā ná chìn-pō͘,

10hō͘ lín ōe-hiáu hun-pia̍t sím-mi̍h chiah sī siōng hó, án-ni tī Ki-tok ê Ji̍t lín chiah ōe chiâⁿ-chòe sûn-kiat bô thang hiâm ê lâng,

11chhiong-móa khò Iâ-so͘ Ki-tok chiah ū ê hó tek-hēng, thang chiong êng-kng kap o-ló kui hō͘ Siōng-tè.

Oa̍h Sī Ki-tok

12Hiaⁿ-tī chí-bē, góa ài lín chai, góa só͘ tú--tio̍h ê tāi-chì tian-tò hō͘ hok-im koh-khah chìn-tián,

13tì-kàu ông-kiong ê choân-thé kéng-ōe í-ki̍p kî-tha só͘-ū ê lâng lóng chai-iáⁿ góa koaiⁿ-kaⁿ sī ūi-tio̍h Ki-tok ê iân-kò͘.

14Chin chōe hiaⁿ-tī chí-bē mā in-ūi góa koaiⁿ-kaⁿ tī Chú lāi-bīn koh-khah khak-sìn, koh-khah hó-táⁿ bô kiaⁿ-hiâⁿ lâi thoân Siōng-tè ê sìn-sit.

15Ū lâng thoân Ki-tok sī chhut tī oàn-tò͘ kap hò͘ⁿ cheng-lūn; mā ū lâng sī chhut tī hó ì-sù.

16Chiah-ê lâng sī chhut tī thiàⁿ-sim, chai-iáⁿ góa siū jīm-bēng sī beh ūi hok-im piān-hō͘.

17Lēng-gōa hiah-ê lâng soan-iông Ki-tok sī chhut tī iá-sim, tōng-ki bô sûn, siūⁿ-beh thàn góa koaiⁿ-kaⁿ ê sî ke-thiⁿ góa ê kan-khó͘.

18Án-ni ū sím-mi̍h koan-hē? Sī ké-ì á-sī chin-sim, bô-lūn án-chóaⁿ, Ki-tok siū thoân-khui, góa chiū ūi-tio̍h án-ni hoaⁿ-hí!

Tio̍h, góa beh kè-sio̍k hoaⁿ-hí,

19in-ūi góa chai, tùi lín ê kî-tó kap Iâ-so͘ Ki-tok ê Sîn ê pang-chān, góa it-tēng ōe tit-tio̍h chū-iû.

20Góa pek-chhiat kî-thāi kap ǹg-bāng--ê, chiū-sī bô chi̍t hāng tāi-chì ōe hō͘ góa kiàn-siàu; góa sî-sî-khek-khek, te̍k-pia̍t sī hiān-chāi, ū kàu-gia̍h ê ióng-khì, sī oa̍h á-sī sí, thang hō͘ Ki-tok thong-kè góa chit-ê lâng tit-tio̍h êng-iāu.

21In-ūi, tùi góa lâi kóng, oa̍h sī Ki-tok, sí sī lī-ek.

22Nā-sī kè-sio̍k oa̍h--teh ōe-tàng chòe khah chōe ū hāu-kó ê kang-chok, góa soah m̄ chai beh kéng sím-mi̍h.

23Góa chìn-thè-lióng-lân. Góa si̍t-chāi chin ài lī-khui chit-ê sè-kan kap Ki-tok chòe-hé, che eng-kai ke hó chiok chōe.

24Put-kò, ūi-tio̍h lín ê iân-kò͘, góa koh-khah tio̍h oa̍h--lo̍h-khì.

25Tùi chit-hāng, góa khak-sìn; góa chai góa beh oa̍h--lo̍h-khì, beh kè-sio̍k kap lín tāi-ke oa̍h--lo̍h-khì, sī beh hō͘ lín ê sìn-gióng koh-khah chìn-pō͘, koh-khah ū hoaⁿ-hí,

26án-ni góa kap lín koh saⁿ-kìⁿ ê sî, lín ōe in-ūi Ki-tok Iâ-so͘ ū chhiong-hun ê lí-iû thang ēng góa chòe khoa-kháu.

27Bô-lūn án-chóaⁿ, lín ê giân-hêng-kú-chí tio̍h hû-ha̍p Ki-tok ê hok-im. Án-ni, bô-lūn góa ōe-tàng koh khì kap lín saⁿ-kìⁿ á bōe, lóng ōe-tàng thiaⁿ-tio̍h lín ê tāi-chì, chai lín lóng ēng siâng chi̍t ê sim-chì khiā-chāi, tâng-sim chòe-hé ūi-tio̍h só͘ sìn ê hok-im phah-piàⁿ.

28Bô-lūn chòe sím-mi̍h, m̄-bián kiaⁿ hoán-tùi-chiá ê ui-hia̍p, án-ni thang chèng-bêng in ōe sit-pāi, lín ōe tek-sèng; chit-ê tek-sèng sī tùi Siōng-tè lâi--ê.

29In-ūi Siōng-tè m̄-nā ū sù lín te̍k-pia̍t ê un-hūi lâi sìn Ki-tok, mā hō͘ lín ūi-tio̍h Ki-tok siū-khó͘,

30lâi chham-ú siâng-khoán ê cheng-chiàn; chit-ê cheng-chiàn lín ū khòaⁿ-tio̍h góa án-chóaⁿ chiàn, hiān-chāi koh thiaⁿ-kìⁿ góa iáu-teh chiàn.

Hui-li̍p-pí-su 1 - 現代台語譯本羅馬字版(TTVR)-闽南语

Learn More About Us