Í-se-kiat-su 47

Í-se-kiat-su 47 - 現代台語譯本羅馬字版(TTVR)-闽南语

Tùi Sèng-tiān Lâu-chhut Chôaⁿ-chúi

1Hit-ê lâng chhōa góa tńg-lâi sèng-tiān mn̂g-kháu. Góa khòaⁿ-kìⁿ ū chúi tùi sèng-tiān ê hō͘-tēng ē-bīn chhèng--chhut-lâi, lâu ǹg tang-pêng, chiū-sī sèng-tiān tōa-mn̂g ê hong-hiòng. Chúi tùi sèng-tiān ê chiàⁿ-pêng, keng-kè chè-tôaⁿ ê lâm-pêng lâu--lo̍h-lâi.

2Jiân-āu, i koh chhōa góa tùi pak-mn̂g chhut--lâi, chhōa góa tùi gōa-bīn se̍h kàu tang-pêng ê gōa-mn̂g. Ū chúi tùi mn̂g ê lâm-pêng lâu--chhut-lâi.

3Hit-ê lâng the̍h niû-chhioh, tùi mn̂g-kháu ǹg tang kiâⁿ, niû gō͘-pah kong-chhioh, kiò góa liâu-chúi kè--khì; chúi im kàu kha-ba̍k.

4I koh tùi hia chìn-chêng niû gō͘-pah kong-chhioh, kiò góa liâu-chúi kè--khì; chúi im kàu kha-thâu-u. Koh tùi hia chìn-chêng niû gō͘-pah kong-chhioh, kiò góa liâu-chúi kè--khì; chúi im kàu io.

5I koh tùi hia chìn-chêng niû gō͘-pah kong-chhioh; chúi tiòng--khí-lâi chiâⁿ-chòe hô, bô lâng ōe-tàng liâu--kè-khì, chí-ū ōe-tàng ēng siû--ê.

6I kā góa kóng, “Jîn-chú ah, lí ū khòaⁿ--kìⁿ-bô?”

Liáu-āu, hit-ê lâng chhōa góa tńg-lâi hô-piⁿ.

7Góa tńg--lâi ê sî, khòaⁿ-kìⁿ hô ê nn̄g pêng hōaⁿ ū chin chōe chhiū.

8I kā góa kóng, “Chit-tiâu hô lâu ǹg tang, keng-kè Iok-tàn-hô hô-kok, chìn-ji̍p Sí-hái. Hô-chúi lâu-ji̍p Sí-hái, ōe hō͘ kiâm-chúi pìⁿ-chòe chiáⁿ-chúi.

9Chit-tiâu hô keng-kè ê só͘-chāi, lóng ōe chhiong-móa ta̍k-chióng seng-bu̍t, hô--ni̍h ōe ū chin chōe hî. Chit-tiâu hô hō͘ Sí-hái ê chúi pìⁿ chiáⁿ-chúi; lâu--kè ê só͘-chāi, ta̍k-hāng mi̍h lóng ōe oa̍h.

10Tī hia ōe ū chin chōe lia̍h-hî--ê; tùi Ún Ki-tí kàu Ún Í-kek-liân ê hōaⁿ-piⁿ ōe pìⁿ-chòe pha̍k-bāng ê só͘-chāi. Sí-hái ê hî-lūi ōe chhin-chhiūⁿ Tōe-tiong-hái hiah-ni̍h chōe.

11M̄-kú Sí-hái hù-kūn ê sip-tōe kap chúi-khut ê chúi bô pìⁿ chiáⁿ, lâu-teh chòe iâm.

12Chit-tiâu hô ê siang-pêng hōaⁿ beh ū ta̍k-chióng chhiū-ba̍k seng-tióng, só͘ kiat ê ké-chí thang chòe chia̍h-mi̍h; hio̍h bōe ta, ké-chí chhut-sán bōe tn̄g, ta̍k kò-ge̍h lóng ū sin ê ké-chí, in-ūi tùi sèng-tiān lâu--chhut-lâi ê chúi lūn-te̍k chiah-ê chhiū; ké-chí thang chòe chia̍h-mi̍h, hio̍h-á thang chòe io̍h-châi.”

Tōe-kài

13Chì-koân ê Siōng Chú án-ni kóng, “Lín tio̍h chiong thó͘-tōe pun hō͘ Í-sek-lia̍t cha̍p-jī chi-cho̍k; Iok-sek chi-cho̍k tio̍h pun nn̄g hūn.

14Góa bat tùi lín ê chó͘-sian li̍p-sè, beh chiong chit-tè tōe sù hō͘ in chòe sán-gia̍p. Taⁿ, lín sêng-siū chit-tè tōe, tio̍h kong-pîⁿ hun-phòe thó͘-tōe.

15“Pak-pêng ê tōe-kài sī: Tùi Tōe-tiong-hái ǹg tang iân beh khì Hi-te̍k-lûn ê lō͘, keng-kè Hap-má ài-kháu, Se-ta̍t-ta̍t,

16Pí-lô-tha, Se-pek-liân (chiah-ê siâⁿ-chhī tī Tāi-má-sū-kek ông-kok kap Hap-má ông-kok ê tiong-kan), kàu Hō-lân ông-kok ê Hap-sat Hap-thê-kan.

17Só͘-í, pak-pêng ê tōe-kài sī tùi Tōe-tiong-hái kàu Hap-sat Í-lân-siâⁿ; chit-ê siâⁿ tī Tāi-má-sū-kek ê pak-pêng, Hap-má ê lâm-pêng. Í-siōng sī pak-pêng ê tōe-kài.

18“Tang-pêng ê tōe-kài sī: Tùi Tāi-má-sū-kek kap Hō-lân ê kau-kài, iân Í-sek-lia̍t kap Ki-lia̍t tiong-kan ê Iok-tàn-hô sòa kàu Sí-hái ê Tha-má.

19“Lâm-pêng ê tōe-kài sī: Tùi Tha-má ǹg sai-lâm kàu Bí-lī-pa Ka-te-su le̍k-chiu, koh oat ǹg sai-pak, iân Ai-ki̍p pian-kài ê khoe-kok kàu Tōe-tiong-hái.

20“Sai-pêng ê tōe-kài sī Tōe-tiong-hái, ǹg pak kàu Hap-má ài-kháu ê tùi-bīn.

21“Lín tio̍h chiàu Í-sek-lia̍t ta̍k chi-cho̍k pun chit-tè tōe.

22Tio̍h thiu-chhiam pun chit-tè tōe, hō͘ lín ka-kī kap tī lín tiong-kan kià-ku siⁿ-kiáⁿ ê gōa-cho̍k-lâng chòe sán-gia̍p. Lín tio̍h chhin-chhiūⁿ tùi-thāi chāi-tōe siⁿ ê Í-sek-lia̍t-lâng án-ni tùi-thāi in, hō͘ in tī lín tiong-kan kap Í-sek-lia̍t ta̍k chi-cho̍k kâng-khoán tit-tio̍h thó͘-tōe.

23Gōa-cho̍k-lâng kià-ku tī tó chi̍t chi-cho̍k, chiū tī hit-ê chi-cho̍k pun-tio̍h thó͘-tōe.” Chì-koân ê Siōng Chú án-ni soan-pò͘.

Í-se-kiat-su 47 - 現代台語譯本羅馬字版(TTVR)-闽南语

Learn More About Us