Iok-ná-su 1

Iok-ná-su 1 - 現代台語譯本羅馬字版(TTVR)-闽南语

Iok-ná Ûi-pōe Siōng Chú

1Siōng Chú tùi A-bí-thài ê kiáⁿ Iok-ná kóng,

2“Lí khì, khì Nî-nî-bî hit-ê tōa-siâⁿ, chhut-siaⁿ kéng-kài in; in-ūi in ê siâ-ok góa ū khòaⁿ--tio̍h.”

3M̄-kú Iok-ná siūⁿ-beh cháu-khì Tha-si siám-pī Siōng Chú. I lo̍h-khì Iok-phà, tú-tio̍h chi̍t chiah chûn beh khì Tha-si, chiū la̍p chûn-hùi, chē hit-chiah chûn kap lâng khì Tha-si, siám-pī Siōng Chú.

4M̄-kú Siōng Chú hō͘ hái khí tōa-hong, hong-éng chin tōa, chûn kiông-beh phòa--khì.

5Chûn-oân chin kiaⁿ, ta̍k-ê lâng ai-kiû ka-kī ê sîn-bêng, koh chiong chûn-lāi ê hè-mi̍h hiat-lo̍h hái, hō͘ chûn khah khin. M̄-kú Iok-ná í-keng lo̍h-khì chûn-tó͘ tóe, tó--teh, khùn kah chin lo̍h-bîn.

6Chûn-tiúⁿ kiâⁿ óa--khì, kā Iok-ná kóng, “Lí ná hiah hó-khùn? Khí-lâi kiû-kiò lí ê sîn-bêng; i kiám-chhái ōe kā lán pó-pì, hō͘ lán bián sí.”

7Chèng-lâng kóng-lâi-kóng-khì, “Lâi, lâi thiu-chhiam, khòaⁿ sī siáⁿ-lâng jiá-khí chit-ê chai-hō.” In chiū thiu-chhiam, thiu-tio̍h Iok-ná.

8In mn̄g i kóng, “Lí kā goán kóng, lí sī-án-chóaⁿ ín-khí chit-ê chai-hō? Lí sī chia̍h sím-mi̍h thâu-lō͘? Lí tó-ūi lâi? Sī tó chi̍t kok, tó chi̍t cho̍k--ê?”

9I ìn kóng, “Góa sī Hi-pek-lâi lâng; góa kèng-ùi Siōng Chú — Thiⁿ-téng ê Siōng-tè, I sī chhòng-chō tōa-hái kap lio̍k-tōe--ê.”

10Hiah-ê lâng hui-siông tio̍h-kiaⁿ, tùi i kóng, “Lí tàu-tóe ū chòe sím-mi̍h tāi-chì?”

Hiah-ê lâng chai Iok-ná teh siám-pī Siōng Chú, in-ūi i ū kā in kóng.

11In chiū mn̄g i, “Goán tio̍h án-chóaⁿ tùi-thāi lí, chiah ōe hō͘ hái pêng-chēng?” In-ūi hái-éng ná lâi ná tōa.

12I kā in kóng, “Lín kā góa lia̍h khí-lâi hiat-lo̍h hái, hái chiū ōe pêng-chēng; góa chai lín tú-tio̍h chit-ê tōa-hong sī in-ūi góa ê iân-kò͘.”

13Sui-jiân Iok-ná án-ni kóng, chûn-oân iáu-kú chīn-la̍t beh kā chûn kò óa-hōaⁿ, m̄-kú bô hoat-tō͘, in-ūi hái-éng ná khí ná tōa.

14In chiū kiû-kiò Siōng Chú, kóng, “Siōng Chú ah, goán pek-chhiat kiû lí, m̄-thang in-ūi goán hō͘ chit-ê lâng sí, soah hāi goán bô-miā; m̄-thang kā goán chek-hoa̍t, kóng goán lâu bû-ko͘ ê lâng ê huih. Siōng Chú ah, che it-chhè lóng sī chiàu lí ê ì-sù chòe.”

15In chiū kā Iok-ná lia̍h khí-lâi hiat-lo̍h hái; hái ê hong-éng chiū pêng-chēng.

16Hiah-ê lâng chiū tōa-tōa kèng-ùi Siōng Chú, hiàn-chè hō͘ Siōng Chú, koh hē-goān.

17Siōng Chú an-pâi chi̍t bé tōa-hî kā Iok-ná thun--lo̍h-khì; Iok-ná tī hî ê pak-tó͘ lāi saⁿ mî saⁿ ji̍t.

Iok-ná-su 1 - 現代台語譯本羅馬字版(TTVR)-闽南语

Learn More About Us