Í-sài-a-su 54

Í-sài-a-su 54 - 現代台語譯本羅馬字版(TTVR)-闽南语

Éng-oán Hô-pêng ê Iok

1 Iâ-lō͘-sat-léng, lí chit-ê bōe hoâi-īn, bô siⁿ-kiáⁿ ê hū-jîn-lâng ah,

tio̍h chhiùⁿ-koa!

Lí chit-ê m̄-bat keng-giām chhui-chūn kan-khó͘ ê hū-jîn-lâng ah,

tio̍h chhut tōa-siaⁿ hoaⁿ-hí chhiùⁿ-koa!

In-ūi siū khì-sak ê hū-jîn-lâng ōe ū chin chōe kiáⁿ-jî,

pí ū tiōng-hu--ê khah chōe.

Siōng Chú án-ni soan-pò͘.

2Tio̍h khok-tián lí tòa ê pò͘-pîⁿ ê tōe.

Tio̍h kā lí pò͘-pîⁿ ê pò͘ khiú hō͘ khui, m̄-thang hān-chè;

soh tio̍h khan kah chīn-pōng;

khi̍t-á lóng tèng hō͘ tiâu.

3In-ūi lí ōe sì-bīn khok-tián léng-thó͘,

lí ê hō͘-tāi ōe tit-tio̍h lia̍t-kok ê thó͘-tōe;

hong-hòe ê siâⁿ-tìn ōe ū chin chōe lâng tòa.

4M̄-bián kiaⁿ! Lí bōe koh-chài kiàn-siàu;

lí bián koh jím-siū bú-jio̍k.

Tio̍h bōe-kì-tit lí siàu-liân ê sî ê kiàn-siàu;

m̄-thang koh kì-tiâu lí chòe kóaⁿ-hū ê thí-jio̍k.

5In-ūi chhòng-chō lí--ê sī lí ê tiōng-hu;

I ê chheng-ho͘ sī Siōng Chú — Bān-kun ê Thóng-sòe.

Í-sek-lia̍t sîn-sèng ê Siōng-tè sī lí ê Kiù-sio̍k-chú;

I siū chheng-ho͘ chòe choân-tōe ê Siōng-tè.

6 Í-sek-lia̍t ah, lí í-chêng sī siàu-liân ê hū-jîn-lâng,

hō͘ Siōng Chú — lí ê tiōng-hu khì-sak, sim iu-siong.

M̄-kú I kiò lí tò-tńg-khì I hia, kóng:

7Sui-jiân góa ū chiām-sî khì-sak lí,

góa beh ēng chhim-chhim ê thiàⁿ chiap lí tńg--lâi.

8Góa bat tùi lí hoat ke̍k-tōa ê siū-khì, lī-khui lí chi̍t-sî-á kú,

taⁿ, góa beh ēng put-piàn ê thiàⁿ lîn-bín lí.

Siōng Chú — lí ê Kiù-sio̍k-chú án-ni soan-pò͘.

9Che, tùi góa lâi kóng, ná-chhin-chhiūⁿ Ná-a ê ji̍t:

Góa li̍p-sè bōe koh hō͘ tōa-chúi im-ba̍t tāi-tōe.

Taⁿ, góa mā li̍p-sè bōe koh tùi lí siū-khì,

bōe koh chek-pī lí.

10Tōa-soaⁿ ōe-tàng sóa-khui, sió-soaⁿ ōe-tàng chhian-î;

m̄-kú góa put-piàn ê thiàⁿ éng-oán bōe lī-khui lí;

góa ōe éng-oán chun-siú hô-pêng ê iok.

Lîn-bín lí ê Siōng Chú án-ni soan-pò͘.

Iâ-lō͘-sat-léng ê Chiong-lâi

11Siōng Chú kóng:

Iâ-lō͘-sat-léng, lí chit-ê siū-khó͘ ê siâⁿ ah,

lí hō͘ pō-hong sàu-cháu, bô lâng kā lí an-ùi.

Góa beh ēng chhái-sek ê chio̍h kā lí tiông-kiàn,

ēng nâ-pó-chio̍h chòe lí ê tōe-ki.

12Góa beh ēng âng-pó-chio̍h kā lí khí siâⁿ-thah,

ēng ōe hoat-kng ê pó-chio̍h chō lí ê siâⁿ-mn̂g,

ēng chu-pó chō lí sì-ûi ê siâⁿ-chhiûⁿ.

13Lí ê kiáⁿ-jî lóng ōe siū Siōng Chú kàu-tō;

lí ê kiáⁿ-sun lóng ōe pêng-an hoân-êng.

14Lí ōe in-ūi péng-kong-hêng-gī tit-tio̍h kian-li̍p.

Lí bô sím-mi̍h thang kiaⁿ-hiâⁿ, in-ūi bōe koh siū ap-pek;

hiong-pō ōe lī-khui lí hn̄g-hn̄g,

khióng-pò͘ bōe pek-kūn lí.

15Nā ū lâng kong-kek lí, m̄-sī góa ín-khí--ê.

Só͘-ū kong-kek lí--ê, ōe hō͘ lí phah-pāi.

16Lí khòaⁿ, góa chō phah-thih sai-hū,

in pûn hé-thòaⁿ hō͘ hé iām, chè-chō bú-khì.

Góa mā chō húi-bia̍t-chiá,

in khí-lâi si-hêng châu-bia̍t.

17Só͘-ū ūi-tio̍h beh kong-kek lí chè-chō ê bú-khì, bô chi̍t hāng ū lō͘-ēng.

Múi chi̍t ê tī hoat-têng khòng-kò lí ê lâng, it-tēng bōe sèng-sò͘.

Che sī Siōng Chú ê po̍k-jîn èng-tit ê sán-gia̍p;

góa beh ûi-hō͘ i, hō͘ i sèng-lī.

Siōng Chú án-ni soan-pò͘.

Í-sài-a-su 54 - 現代台語譯本羅馬字版(TTVR)-闽南语

Learn More About Us