Sat-ka-lī-a-su 8

Sat-ka-lī-a-su 8 - 現代台語譯本羅馬字版(TTVR)-闽南语

Tùi Iâ-lō͘-sat-léng ê Èng-ún

1Siōng Chú — Bān-kun ê Thóng-sòe tùi góa kóng-ōe.

2I kóng, “Góa chhim-chhim thiàⁿ-sioh Sek-an, jia̍t-ài i, ài kah sim-kông-hé-jia̍t.”

3Siōng Chú koh kóng, “Góa beh tò-lâi Sek-an, beh tiàm tī Iâ-lō͘-sat-léng; Iâ-lō͘-sat-léng beh chheng-chòe Tiong-si̍t ê Siâⁿ; Siōng Chú — Bān-kun ê Thóng-sòe ê soaⁿ beh chheng-chòe Sèng-soaⁿ.”

4Siōng Chú — Bān-kun ê Thóng-sòe án-ni kóng, “Chiong-lâi Iâ-lō͘-sat-léng ê kóng-tiûⁿ ōe koh ū tn̂g-hè-siū, gia̍h koáiⁿ-á ê lāu-a-peh, lāu-a-ḿ tī hia teh chē.

5Siâⁿ-lāi ê kóng-tiûⁿ ōe koh ū chin chōe ta-po͘ gín-á kap cha-bó͘ gín-á tī hia teh thit-thô.”

6Siōng Chú — Bān-kun ê Thóng-sòe án-ni kóng, “Kàu hiah-ê ji̍t, liû-bông tò-tńg--lâi ê chú-bîn ōe khòaⁿ che chòe bô khó-lêng; góa kiám mā ōe khòaⁿ che chòe bô khó-lêng?”

7Siōng Chú — Bān-kun ê Thóng-sòe koh kóng, “Lí khòaⁿ, góa beh tùi ji̍t chhut ê só͘-chāi kap ji̍t lo̍h ê só͘-chāi kái-kiù góa ê chú-bîn.

8Góa beh chhōa in tò-tńg-lâi tòa tī Iâ-lō͘-sat-léng; in beh chòe góa ê chú-bîn, góa beh chòe in ê Siōng-tè, ēng sìn-si̍t kap kong-gī tùi-thāi in.”

9Siōng Chú — Bān-kun ê Thóng-sòe án-ni kóng, “Tio̍h kian-kiông! Che sī lín tī Siōng Chú — Bān-kun ê Thóng-sòe ê sèng-tiān hē tōe-ki beh tiông-kiàn ê sî, só͘ thiaⁿ--tio̍h sian-ti kóng ê ōe.

10Tī hiah-ê ji̍t í-chêng, lâng kap cheng-siⁿ lóng bô lâng chhiàⁿ, koh in-ūi ū tùi-te̍k, lâng chhut-ji̍p bô pêng-an; in-ūi góa hō͘ lâng hō͘-siōng te̍k-tùi.

11M̄-kú, hiān-chāi góa bōe koh chhin-chhiūⁿ í-chêng án-ni tùi-thāi liû-bông tò-tńg--lâi ê chú-bîn. Siōng Chú — Bān-kun ê Thóng-sòe án-ni soan-pò͘.

12In thang pêng-an iā-chéng; phû-tô-chhiū ōe kiat ké-chí, tōe chhut thó͘-sán, thiⁿ kàng lō͘-chúi. Góa beh hō͘ liû-bông tò-tńg--lâi ê jîn-bîn hióng-siū chiah-ê it-chhè.

13Iû-tāi-ke kap Í-sek-lia̍t-ke ah, í-chêng lín tī lia̍t-kok tiong hō͘ lâng khòaⁿ-chòe sī siū chiù-chó͘--ê, hiān-chāi góa beh kái-kiù lín, hō͘ lín chiâⁿ-chòe siū chiok-hok--ê. M̄-bián kiaⁿ, tio̍h kian-kiông!”

14Siōng Chú — Bān-kun ê Thóng-sòe án-ni kóng, “Lín ê lia̍t-chó͘ jiá góa siū-khì ê sî, góa ū koat-ì kàng chai-hō hō͘ in, bô kái-piàn sim-ì. Siōng Chú — Bān-kun ê Thóng-sòe kóng,

15‘Hiān-chāi góa koat-ì beh si-un hō͘ Iâ-lō͘-sat-léng kap Iû-tāi-ke, bōe kái-piàn sim-ì. Lín m̄-bián kiaⁿ.

16Lín eng-kai chòe--ê sī án-ni: Tio̍h hō͘-siōng kóng chin-si̍t-ōe; tī hoat-têng sím-phòaⁿ tio̍h chiàu chin-si̍t kong-chèng, chhiok-chìn hô-bo̍k.

17M̄-thang kè-bô͘ pháiⁿ-tāi, hō͘-siōng hām-hāi; m̄-thang chiù ké-chōa; in-ūi chiah-ê tāi-chì lóng sī góa só͘ iàm-ò͘ⁿ.’ Che sī Siōng Chú kóng--ê.”

18Siōng Chú — Bān-kun ê Thóng-sòe tùi góa kóng-ōe.

19I kóng, “Sì--ge̍h, gō͘--ge̍h, chhit--ge̍h, cha̍p--ge̍h kìm-chia̍h ê ji̍t beh chiâⁿ-chòe Iû-tāi-ke hoaⁿ-hí ê ji̍t-chí, khoài-lo̍k ê choeh-kî; só͘-í lín tio̍h ì-ài chin-si̍t kap hô-pêng.”

20Siōng Chú — Bān-kun ê Thóng-sòe án-ni kóng, “Chiong-lâi ū lia̍t-kok ê lâng kap chin chōe siâⁿ ê chū-bîn ōe lâi;

21chit-ê siâⁿ ê chū-bîn ōe khì kā hit-ê siâⁿ ê lâng kóng, ‘Lán kín lâi-khì chhē Siōng Chú — Bān-kun ê Thóng-sòe, kî-kiû I si-un; góa mā beh chòe-hé khì.’

22Koh ōe ū chin chōe bîn-cho̍k kap kiông-kok lâi Iâ-lō͘-sat-léng chhē Siōng Chú — Bān-kun ê Thóng-sòe, kiû Siōng Chú si-un.

23Siōng Chú — Bān-kun ê Thóng-sòe koh kóng, ‘Tī hiah-ê ji̍t beh ū cha̍p ê gōa-kok-lâng lâi khiú chi̍t ê Iû-tāi-lâng ê saⁿ-á-ku, kóng: Goán beh kap lín chòe-hé khì, in-ūi goán ū thiaⁿ-tio̍h Siōng-tè kap lín tông-chāi.’”

Sat-ka-lī-a-su 8 - 現代台語譯本羅馬字版(TTVR)-闽南语

Learn More About Us