Í-se-kiat-su 35

Í-se-kiat-su 35 - 現代台語譯本羅馬字版(TTVR)-闽南语

Siōng-tè Hêng-hoa̍t Í-tong

1Siōng Chú tùi góa kóng,

2“Jîn-chú ah, lí tio̍h tùi Í-tong-lâng thoân-ta̍t góa ê sìn-sit, chí-chek in.

3Tio̍h kā in kóng, góa — Chì-koân ê Siōng Chú án-ni kóng:

Í-tong-lâng, góa beh kap lí choh-tùi!

Góa beh chhun-chhiú kong-kek lí, hō͘ lí pha-hng hong-hòe.

4Góa beh hō͘ lí ê siâⁿ-tìn pha-hng;

hō͘ lí ê thó͘-tōe pìⁿ-chòe hong-po͘; án-ni, lí chiū chai góa sī Siōng Chú.

5“Lí tùi kó͘-chá chiū oàn-hūn Í-sek-lia̍t. Í-sek-lia̍t in-ūi chōe-ok koàn-boán siū hêng-hoa̍t ê sî, lí kā in pàng hō͘ lâng tô͘-sat.

6Só͘-í, góa — Chì-koân ê Siōng Chú kí ka-kī ê oa̍h-miā li̍p-sè: Góa beh hō͘ lí tú-tio̍h lâu-huih ê pò-èng, huih it-tēng ōe tui-jip lí; lí kì-jiân bô oàn-hūn thâi-lâng lâu-huih, lâu lâng huih ê chōe it-tēng kā lí tîⁿ chi̍t-sì-lâng.

7Góa beh hō͘ Se-ní-soaⁿ pha-hng hong-hòe, bô beh hō͘ lâng koh tùi hia keng-kè.

8Góa beh hō͘ Í-tong só͘-ū ê soaⁿ piàn-móa sin-si; hō͘ to thâi-sí ê lâng tó tī lí ê soaⁿ-lûn-á, soaⁿ-kok, kap khoe-kau.

9Góa beh hō͘ lí éng-oán hong-hòe, bô koh ū lâng tòa tī lí ê siâⁿ-tìn. Án-ni, lín chiū chai góa sī Siōng Chú.

10“Lí bat kóng, ‘Iû-tāi kap Í-sek-lia̍t chit nn̄g kok kap in ê thó͘-tōe lóng sī góa ê, beh chòe góa ê sán-gia̍p.’ Kî-si̍t, Siōng Chú iáu tī hia.

11Só͘-í, Chì-koân ê Siōng Chú kí ka-kī ê oa̍h-miā li̍p-sè: Lí án-chóaⁿ siū-khì, oàn-tò͘ góa ê chú-bîn, góa mā beh chiàu án-ni tùi-thāi lí. Góa sím-phòaⁿ lí ê sî, beh hō͘ in bat góa.

12Hit-sî lí chiū chai, góa Siōng Chú ū thiaⁿ-kìⁿ lí bú-jio̍k Í-sek-lia̍t chèng-soaⁿ ê ōe, kóng, ‘Chiah-ê soaⁿ í-keng hong-hòe, beh hō͘ goán thun-bia̍t.’

13Lí chū-ko khoa-kháu, bô chām-chat kong-kek góa ê ōe, góa lóng ū thiaⁿ--kìⁿ.

14“Chì-koân ê Siōng Chú án-ni kóng, ‘Góa it-tēng beh hō͘ lí hong-hòe, hit-sî choân-tōe beh hoaⁿ-hí khoài-lo̍k.

15Lí tī Í-sek-lia̍t-lâng ê tōe pha-hng ê sî hoaⁿ-hí, góa mā beh chiàu lí ê só͘-chòe tùi-thāi lí. Se-ní-soaⁿ kap Í-tong choân-kok lóng beh pha-hng hong-hòe, lâng chiū chai góa sī Siōng Chú.’”

Í-se-kiat-su 35 - 現代台語譯本羅馬字版(TTVR)-闽南语

Learn More About Us