Tān-í-lí-su 6

Tān-í-lí-su 6 - 現代台語譯本羅馬字版(TTVR)-闽南语

Tān-í-lí tī Sai-hia̍t

1 Tāi-liû-sū chiàu i ê siūⁿ-hoat, siat-li̍p chi̍t-pah jī-cha̍p ê chóng-tok tī-lí choân-kok;

2tī in ê téng-bīn koh siat-li̍p saⁿ ê chóng-tiúⁿ, kî-tiong chi̍t ê sī Tān-í-lí, kàm-tok hiah-ê chóng-tok, chiah bián ông kè-thâu chhau-lô.

3Tān-í-lí in-ūi ū hui-siông hó ê lêng-sèng, pí kî-tha ê chóng-tiúⁿ kap chóng-tok khah kia̍t-chhut, só͘-í ông beh chí-phài i tī-lí choân-kok.

4In-ūi án-ni, kî-tha ê chóng-tiúⁿ kap chóng-tok tī kok-chióng ê sū-bū beh chhē Tān-í-lí ê khang-phāng, thang kā i khòng-kò. M̄-kú in chhē bô i ū sím-mi̍h khang-phāng á-sī kè-sit, in-ūi i tiong-si̍t khó-khò.

5Hiah-ê lâng chiū chham-siông, kóng, “Tû-liáu tùi Tān-í-lí chun-hêng i ê Siōng-tè ê lu̍t-hoat í-gōa, lán bōe-tàng chhē-tio̍h kā i khòng-kò ê lí-iû.”

6Chiah-ê chóng-tiúⁿ kap chóng-tok sio-iok lâi kìⁿ ông, tùi ông kóng, “Hông-siōng bān-sòe!

7Choân-kok ê chóng-tiúⁿ, chóng-tok, séng-tiúⁿ, koān-tiúⁿ, kap kò͘-būn chòe-hé chham-siông, beh chhiáⁿ hông-siōng kàng-chí, soan-pò͘ chi̍t ê kìm-lēng, ‘Saⁿ-cha̍p ji̍t lāi, tû-liáu ǹg ông í-gōa, nā ū lâng ǹg jīm-hô sîn-bêng á-sī tùi lâng kî-tó, tio̍h kā i hiat-lo̍h sai-hia̍t.’

8Hông-siōng, chhiáⁿ lí chè-tēng chhiam-sú chit-tiâu kìm-lēng, lâng chiū bōe-tàng kái-piàn chit-ê bēng-lēng, in-ūi chiàu Bí-tí-a kap Pho-su ê hoat-lu̍t, chhiam-sú--kè ê hoat-lēng bōe-ēng-tit kái-piàn.”

9Tāi-liû-sū chiū tī chit-ê kìm-lēng chhiam-sú.

10Tān-í-lí thiaⁿ-tio̍h ông í-keng tī chit-ê bûn-kiāⁿ chhiam-miâ, chiū tò-khì chhù--ni̍h; i lâu-téng ê pâng-keng ū thang-á khui ǹg Iâ-lō͘-sat-léng. I chiàu-siông chi̍t ji̍t saⁿ piàn kūi-teh ǹg Siōng-tè khún-kiû kám-siā.

11Hiah-ê lâng tàu-tīn khì Tān-í-lí hia, khòaⁿ-tio̍h i kūi-teh ǹg Siōng-tè kî-kiû pang-chān,

12chiū koh lâi kìⁿ ông, tùi ông thê-khí kìm-lēng ê tāi-chì, kóng, “Hông-siōng, lí kiám m̄-sī ū chhiam-sú chi̍t ê bûn-kiāⁿ, kui-tēng saⁿ-cha̍p ji̍t lāi, tû-khì ǹg hông-siōng í-gōa, nā ū lâng ǹg jīm-hô sîn-bêng kî-tó á-sī tùi lâng khún-kiû, tio̍h kā i hiat-lo̍h sai-hia̍t?”

Ông ìn kóng, “Khak-si̍t ū. Chiàu Bí-tí-a kap Pho-su ê hoat-lu̍t, chit-ê hoat-lu̍t bōe-ēng-tit piàn-keng.”

13In chiū tùi ông kóng, “Hông-siōng, hit-ê siū-lia̍h ê Iû-thài-lâng Tān-í-lí bô chun-tiōng ông, bô chun-siú lí chhiam-sú ê kìm-lēng. I kèng-jiân chi̍t ji̍t saⁿ piàn kî-tó.”

14Ông thiaⁿ-liáu hui-siông hoân-ló, siūⁿ-beh kiù Tān-í-lí, kui-ji̍t teh siūⁿ pān-hoat.

15Āu-lâi, hiah-ê lâng koh sio-iok lâi kìⁿ ông, tùi ông kóng, “Hông-siōng, tio̍h ōe-kì--tit, chiàu Bí-tí-a-lâng kap Pho-su-lâng ê hoat-lu̍t, ông pan-pò͘ ê kìm-lēng kap hoat-lu̍t bōe-ēng-tit kái-piàn.”

16Ông chiū hā-lēng lia̍h Tān-í-lí, kā i hiat-lo̍h sai-hia̍t. Ông kā Tān-í-lí kóng, “Lí it-ti̍t teh ho̍k-sāi ê Siōng-tè it-tēng ōe kiù lí.”

17Ū lâng poaⁿ chi̍t lia̍p tōa-lia̍p chio̍h-thâu kā sai-hia̍t ê kháu that--teh; khàm ông-ìn kap tāi-sîn ê koaⁿ-ìn, kā sai-hia̍t hong--khí-lâi, hō͘ Tān-í-lí ê àn-kiāⁿ bōe-tàng ū sím-mi̍h kái-piàn.

18Ông tò-khì ông-kiong, kui-mî kìm-chia̍h, bô beh hō͘ lâng ián-chàu ga̍k-khì; hit-mî, ông khùn bōe khì.

19Keh-ji̍t, ông thàu-chá khí--lâi, kóaⁿ-kín khì sai-hia̍t hia.

20I óa-kūn sai-hia̍t ê piⁿ--á, siong-sim kiò Tān-í-lí, kóng, “Éng-oa̍h Siōng-tè ê po̍k-jîn Tān-í-lí, lí chīn-tiong ho̍k-sāi ê Siōng-tè ū kiù lí bô hō͘ sai kā bô?”

21 Tān-í-lí kóng, “Hông-siōng bān-sòe!

22Góa ê Siōng-tè ū phài sù-chiá kā hiah-ê sai ê chhùi hong--khí-lâi, bô kā góa siong-hāi, in-ūi góa tī Siōng-tè bīn-chêng sī bû-ko͘--ê. Hông-siōng, góa mā bô chòe sím-mi̍h siong-hāi ông ê tāi-chì.”

23Ông hui-siông hoaⁿ-hí, chiū hoan-hù lâng chiong Tān-í-lí tùi sai-hia̍t giú--chhut-lâi. Tān-í-lí tùi sai-hia̍t chhut--lâi, kui seng-khu lóng bô siū-siong, in-ūi i óa-khò i ê Siōng-tè.

24Ông bēng-lēng, chiong hiah-ê khòng-kò Tān-í-lí ê lâng kap in ê bó͘-kiáⁿ lóng lia̍h--khí-lâi, kā in hiat-lo̍h sai-hia̍t. In iáu-bē kàu sai-hia̍t ê tóe, sai chiū ǹg in tà--khì, kā-chhùi in ê kut-thâu.

25Āu-lâi, Tāi-liû-sū thong-kò choân-kok bô-lūn tó chi̍t ê bîn-cho̍k, tó chi̍t ê pang-kok, kóng tó chi̍t khoán gú-giân ê jîn-bîn, kóng, “Goān lín pêng-an hù-chiok!

26Hiān-chāi góa kàng-chí, góa thóng-tī ê choân-kok jîn-bîn, lín lóng tio̍h kèng-ùi Tān-í-lí ê Siōng-tè,

I sī éng-oa̍h ê Siōng-tè,

éng-oán chûn-chāi;

I ê kok éng-oán bōe siau-bia̍t,

I ê ông-koân éng-oán chûn-sio̍k!

27I tháu-pàng, I chín-kiù,

tī thiⁿ-téng tōe-chiūⁿ kiâⁿ sîn-jiah kî-sū;

I kái-kiù Tān-í-lí,

chiong i tùi sai ê chhùi kiù--chhut-lâi.”

28 Tān-í-lí tī Tāi-liû-sū kap Pho-su-lâng Sài-ló͘-sū chāi-ūi ê sî, sū-sū heng-thong.

Tān-í-lí-su 6 - 現代台語譯本羅馬字版(TTVR)-闽南语

Learn More About Us