Si-phian 22

Si-phian 22 - 現代台語譯本羅馬字版(TTVR)-闽南语

Tāi-pi̍t ê si, kau hō͘ sèng-ga̍k-tiúⁿ; tiāu, ēng “Chá-khí-sî ê lo̍k-bú”.Khùn-khó͘ Tiong ê Ai-kiû kap Chheng-chàn

1Góa ê Siōng-tè, góa ê Siōng-tè, lí sī-án-chóaⁿ pàng-sak góa?

Lí sī-án-chóaⁿ lī góa hn̄g-hn̄g m̄ kiù góa, m̄ thiaⁿ góa ê âu-kiò?

2Góa ê Siōng-tè ah, góa ji̍t--sî kiû-kiò, lí bô ìn góa;

góa mî--sî kiû-kiò, bô tit-tio̍h an-lêng.

3Lí sī sèng ê Siōng-tè,

lí ēng Í-sek-lia̍t ê chheng-chàn chòe pó-chō.

4Goán ê lia̍t-chó͘ óa-khò lí;

in óa-khò lí, lí ū kái-kiù in.

5In ai-kiû lí, ū tit-tio̍h chín-kiù;

in óa-khò lí, lí bô hō͘ in sit-bāng.

6M̄-kú góa m̄-sī lâng, sī thâng-thōa,

hō͘ lâng ki-chhì, siū chèng-lâng khòaⁿ-khin.

7Khòaⁿ-tio̍h góa ê lâng lóng kā góa thí-chhiò,

ngiauh-chhùi hàiⁿ-thâu, kóng,

8“Lí chiong pún-sin kau-tài Siōng Chú, I ná bô lâi kiù lí?

Kì-jiân Siōng Chú kah-ì lí, I ná bô lâi kiù lí?”

9Lí tùi bú-thai kā góa chiap--chhut-lâi;

lí hō͘ góa tī lāu-bú ê heng-chêng tit-tio̍h an-ún.

10Góa tùi chhut bú-thai chiū kau-thok lí,

tùi góa chhut-sì, lí chiū-sī góa ê Siōng-tè.

11Kiû lí m̄-thang lī góa hn̄g-hn̄g,

in-ūi hoān-lān pek-kūn, bô lâng pang-chān góa.

12Ū chin chōe gû-káng pau-ûi góa;

Pa-san ê iá-gû sì-bīn ûi-khùn góa.

13In chhin-chhiūⁿ sai khui-chhùi tōa-siaⁿ háu,

beh thiah-li̍h thun-chia̍h góa.

14Góa ê khùi-la̍t chhin-chhiūⁿ chúi piàⁿ-liáu-liáu;

góa ê kut-thâu lóng thu̍t-lûn;

góa ê sim chhin-chhiūⁿ la̍h tī pak-lāi siau-iûⁿ.

15Góa ê cheng-le̍k ta--khì, chhin-chhiūⁿ phòa--khì ê hiā-phìⁿ;

góa ê chi̍h liâm tī téng-kiuⁿ bōe kóng-ōe;

lí kā góa pàng tī thô͘-kha, chhut-chāi góa sí.

16Pháiⁿ-lâng chhin-chhiūⁿ kui-kûn káu pau-ûi góa,

chhin-chhiūⁿ sai thiah-li̍h góa ê kha, góa ê chhiú.

17Góa ê kut-thâu lóng ōe-sǹg--tit;

in teh khòaⁿ góa, teh siòng góa.

18In pun góa ê gōa-phàu,

ūi-tio̍h góa ê saⁿ thiu-chhiam.

19Siōng Chú ah, kiû lí m̄-thang lī góa hn̄g-hn̄g;

Siōng-tè — góa ê khùi-la̍t ah, kiû lí kín lâi pang-chān góa.

20Kiû lí kiù góa thoat-lī to-kiàm,

kiù góa ê sìⁿ-miā thoat-lī káu ê sè-le̍k.

21Kiû lí kiù góa thoat-lī sai ê chhùi;

lí í-keng ū thiaⁿ góa, hō͘ góa thoat-lī iá-gû ê kak.

22Góa beh tùi góa ê hiaⁿ-tī pò-iông lí ê miâ;

góa beh tī chū-hōe tiong o-ló lí.

23Lín kèng-ùi Siōng Chú ê, tio̍h chheng-chàn I.

Í-sek-lia̍t ê hō͘-tāi, tio̍h kui êng-kng hō͘ I;

Ngá-kok ê hō͘-tāi, lóng tio̍h kèng-ùi I.

24In-ūi I bōe khòaⁿ-khin sàn-chhiah-lâng, bōe bû-sī in ê khùn-khó͘,

mā bōe bīn oa̍t-cháu m̄ chhap in;

in kiû-kiò ê sî, Siōng Chú ū kā in thiaⁿ.

25Góa beh tī tōa chū-hōe tiong chheng-chàn lí ê só͘-chòe;

góa beh tī kèng-ùi Siōng Chú ê lâng bīn-chêng siā góa ê goān.

26Sàn-chhiah-lâng ōe tit-tio̍h pá-chiok;

chhē-kiû Siōng Chú ê lâng ōe chheng-chàn I.

Goān lín ê sim éng-oán ū oa̍h-khì!

27Tōe-chiūⁿ só͘-ū ê lâng lóng ōe-kì-tit Siōng Chú ê só͘-chòe lâi kui-sūn I;

sè-chiūⁿ bān-cho̍k lóng ōe tī I bīn-chêng kèng-pài.

28In-ūi chú-koân sio̍k tī Siōng Chú,

I sī bān-kok ê chú-cháiⁿ.

29Tōe-chiūⁿ só͘-ū hù-kùi ê lâng ōe chū-chi̍p lim-chia̍h, kèng-pài;

liân teh-beh sí, teh-beh kui-thó͘ ê lâng to ōe tī I bīn-chêng kūi-pài.

30In ê kiáⁿ-sun ōe ho̍k-sāi I;

Chú ê chok-ûi ōe thoân kàu in ê hō͘-tāi.

31Lâng ōe tùi chiong-lâi beh chhut-sì ê chú-bîn kóng,

“Chú í-keng oân-sêng I ê chín-kiù.”

Si-phian 22 - 現代台語譯本羅馬字版(TTVR)-闽南语

Learn More About Us