Lō͘-ka Hok-im 22

Lō͘-ka Hok-im 22 - 現代台語譯本羅馬字版(TTVR)-闽南语

Hāi-sí Iâ-so͘ ê Im-bô͘(Thài 26.1-5, 14-16; Khó 14.1-2, 10-11; Iok 11.45-53)

1Tû-kàⁿ-choeh, iā kiò-chòe Pôaⁿ-kè-choeh, teh-beh kàu.

2Chè-si-tiúⁿ kap keng-ha̍k-kàu-su in-ūi kiaⁿ bîn-chiòng, só͘-í teh chhē-khòaⁿ ū sím-mi̍h hoat-tō͘ thang hāi-sí Iâ-so͘.

3Sat-tàn ji̍p-khì hit-ê kiò-chòe Í-su-ka-lio̍k ê Iû-tāi ê sim-lāi; i sī cha̍p-jī sù-tô͘ ê chi̍t ê.

4I khì kap chè-si-tiúⁿ í-ki̍p Sèng-tiān ê siú-ōe-koaⁿ chham-siông, khòaⁿ beh ēng sím-mi̍h hoat-tō͘ chiong Iâ-so͘ chhut-bōe hō͘ in.

5In chin hoaⁿ-hí, iok beh hō͘ i chîⁿ.

6Iû-tāi tông-ì, chiū it-ti̍t teh chhē ki-hōe, thang tī kûn-chiòng bô tī in tiong-kan ê sî chhut-bōe Iâ-so͘.

Chún-pī Pôaⁿ-kè-choeh ê Boán-chhan(Thài 26.17-25; Khó 14.12-21; Iok 13.21-30)

7Tû-kàⁿ-choeh, chiū-sī tio̍h thâi Pôaⁿ-kè-choeh ê iûⁿ-ko hit-ji̍t, kàu lah.

8Iâ-so͘ chhe Pí-tek kap Iok-hān, kā in kóng, “Lín khì chún-pī Pôaⁿ-kè-choeh ê boán-chhan, lán thang chia̍h.”

9In kā I mn̄g, “Lí ài goán tī tó-ūi chún-pī?”

10Iâ-so͘ kā in kóng, “Lín ji̍p-khì siâⁿ-lāi, ōe tú-tio̍h chi̍t ê the̍h chúi-pân ê ta-po͘-lâng, lín tè i khì i beh ji̍p--khì hit-keng chhù,

11kā hit-ke ê chú-lâng kóng, ‘Lāu-su teh mn̄g, I kap I ê bûn-tô͘ beh chia̍h Pôaⁿ-kè-choeh boán-chhan ê kheh-thiaⁿ tī tó-ūi?’

12Hit-ê lâng ōe pò lín khòaⁿ lâu-téng chi̍t keng khoán hó-sè ê tōa-thiaⁿ. Lín chiū tī hia chún-pī.”

13In khì, khòaⁿ-tio̍h ta̍k-hāng kap Iâ-so͘ kā in kóng--ê lóng siâng-khoán; in chiū tī hia chún-pī Pôaⁿ-kè-choeh ê boán-chhan.

Chú ê Boán-chhan(Thài 26.26-30; Khó 14.22-26; 1 Lîm 11.23-25)

14Boán-chhan ê sî-kan kàu, Iâ-so͘ chiū chē-toh; sù-tô͘ kap I chòe-hé chē.

15Iâ-so͘ kā in kóng, “Góa siū-lān í-chêng chin ài kap lín chia̍h chit-ê Pôaⁿ-kè-choeh ê boán-chhan.

16Góa kā lín kóng, chit-ê Boán-chhan tī Siōng-tè-kok oân-choân si̍t-hiān í-chêng, góa choa̍t-tùi bōe koh chia̍h.”

17Iâ-so͘ chiong poe chiap--kè-lâi, kám-siā liáu-āu, kóng, “Lín phâng chit-ê poe, pun hō͘ tāi-ke lim.

18Góa kā lín kóng, tùi hiān-chāi khí ti̍t-kàu Siōng-tè-kok lâi-lîm, góa choa̍t-tùi bōe koh lim chit-ê phû-tô-chiú.”

19Jiân-āu Iâ-so͘ the̍h piáⁿ, kám-siā liáu-āu peh-khui, the̍h hō͘ in, kóng, “Chit-ê sī góa ê seng-khu, sī ūi-tio̍h lín hiàn--ê. Lín tio̍h chòe chit-ê lâi kì-liām góa.”

20Chia̍h liáu-āu I koh chiàu án-ni phâng poe, kóng, “Chit-ê poe sī sin ê iok, ēng góa ūi-tio̍h lín lâu-chhut ê huih siat-li̍p--ê.

21“Lín khòaⁿ! Chhut-bōe góa hit-ê lâng chit-chūn kap góa chòe-hé chhun-chhiú tī toh-téng.

22In-ūi Jîn-chú ōe chiàu Siōng-tè ê koat-tēng lī-khui sè-kan; m̄-kú chhut-bōe Jîn-chú hit-ê lâng chhám ah!”

23In chiū mn̄g-lâi-mn̄g-khì, ài chai in tiong-kan sím-mi̍h-lâng ōe chòe chit-ê tāi-chì.

Bûn-tô͘ Cheng-lūn Sím-mi̍h-lâng Siōng Tōa

24Bûn-tô͘ tiong-kan ū khí cheng-lūn, khòaⁿ sím-mi̍h-lâng sǹg siōng tōa.

25Iâ-so͘ kā in kóng, “Gōa-pang-lâng ê kun-ông choh-chú koán-hat jîn-bîn; thóng-tī-chiá hō͘ lâng chheng-chòe un-chú.

26Chóng-sī lín m̄-sī án-ni. Lín tiong-kan siōng-tōa--ê tian-tò tio̍h chiâⁿ-chòe siōng-sòe--ê; choh léng-siù--ê tio̍h chiâⁿ-chòe ho̍k-sāi--ê.

27Án-ni, sím-mi̍h-lâng khah tōa? Sī chē-toh chia̍h-pn̄g--ê á-sī ho̍k-sāi--ê? Kiám m̄-sī chē-toh--ê? M̄-kú góa tī lín tiong-kan sī hit-ê ho̍k-sāi--ê.

28“Lín chiah-ê lâng tī góa ê chhì-liān tiong it-ti̍t kap góa chòe-hé.

29Góa ê Pē chiong ông ê koân-pèng sù hō͘ góa, góa mā án-ni chiong ông ê koân-pèng sù hō͘ lín,

30hō͘ lín thang tī góa ê Kok-tō͘ kap góa chē-toh, lim-chia̍h, koh chē tī pó-chō sím-phòaⁿ Í-sek-lia̍t ê cha̍p-jī chi-cho̍k.”

Iâ-so͘ Ū-giân Pí-tek M̄ Jīn I(Thài 26.31-35; Khó 14.27-31; Iok 13.36-38)

31Iâ-so͘ koh kóng, “Se-bûn, Se-bûn, Sat-tàn í-keng tùi Siōng-tè iau-kiû beh chhin-chhiūⁿ pòa be̍h-á án-ni kā lín pòa.

32Put-kò góa ū ūi-tio̍h lí kî-tó, hō͘ lí bōe sit-khì sìn-sim. Lí hôe-thâu tńg--lâi liáu-āu, tio̍h kian-kò͘ lí ê hiaⁿ-tī ê sìn-sim.”

33 Pí-tek ìn I kóng, “Chú ah, góa í-keng chún-pī piān-piān beh kap lí chē-kaⁿ, kap lí chòe-hé sí!”

34Iâ-so͘ kā i kóng, “Pí-tek, góa kā lí kóng, kin-á-ji̍t koe thî í-chêng, lí ōe saⁿ piàn m̄ jīn góa.”

Chîⁿ-tē, Lú-hêng-tē, kap To

35Iâ-so͘ koh kā bûn-tô͘ kóng, “Í-chêng góa chhe lín chhut--khì, kiò lín chîⁿ-tē, lú-hêng-tē, kap ôe lóng bián tòa, lín kiám ū khiàm sím-mi̍h?”

In ìn kóng, “Lóng bô.”

36I chiū kā in kóng, “M̄-kú hiān-chāi, ū chîⁿ-tē--ê tio̍h tòa leh; ū lú-hêng-tē--ê mā tio̍h tòa leh; bô to--ê tio̍h bōe ka-kī ê gōa-phàu khì bóe.

37Góa kā lín kóng, Sèng-keng kì-chài ‘I hō͘ lâng sǹg-chòe put-hoat ê lâng’ chit-kù ōe it-tēng tio̍h tī góa ê sin-chiūⁿ èng-giām. Sèng-keng kì-chài koan-hē góa ê tāi-chì í-keng teh èng-giām lah.”

38Bûn-tô͘ kóng, “Chú ah, lí khòaⁿ, chia ū nn̄g ki to.”

Iâ-so͘ ìn kóng, “Kàu-gia̍h lah!”

Iâ-so͘ tī Kaⁿ-ná-soaⁿ Kî-tó(Thài 26.36-46; Khó 14.32-42)

39Iâ-so͘ chhut--khì, chiàu-siông khì Kaⁿ-ná-soaⁿ; bûn-tô͘ tè I khì.

40Kàu hit-ê só͘-chāi, I kā in kóng, “Tio̍h kî-tó chiah bōe hām-lo̍h chhì-thàm.”

41Jiân-āu I lī-khui in kàu hiat chio̍h-thâu ōe kàu hiah-hn̄g ê só͘-chāi, kūi lo̍h-khì kî-tó,

42kóng, “Pē ah, lí nā khéng, kiû lí chiong chit-ê poe kā góa the̍h-khui! Chóng-sī m̄-thang chiàu góa ê ì-sù, tio̍h chiàu lí ê chí-ì si̍t-hiān.”

43Ū chi̍t ê thiⁿ-sài tùi thiⁿ chhut-hiān, lâi chān I ê la̍t.

44Iâ-so͘ hui-siông thòng-khó͘, jú jia̍t-chhiat kî-tó; I ê kōaⁿ chhin-chhiūⁿ tōa tiám huih tih-lo̍h tōe.

45Kî-tó soah, Iâ-so͘ khiā--khí-lâi, tò-khì bûn-tô͘ hia, khòaⁿ-tio̍h in in-ūi iu-siong soah khùn--khì.

46I chiū kā in kóng, “Lín ná teh khùn? Khí-lâi kî-tó chiah bōe hām-lo̍h chhì-thàm.”

Iâ-so͘ Siū Lia̍h(Thài 26.47-56; Khó 14.43-50; Iok 18.3-11)

47Iâ-so͘ iáu-teh kóng ê sî, hut-jiân ū chi̍t tīn lâng lâi; cha̍p-jī sù-tô͘ ê chi̍t ê, kiò-chòe Iû-tāi--ê, chòe-chêng chhōa-lō͘. I kiâⁿ-óa Iâ-so͘, beh kā i chim.

48Iâ-so͘ kā i kóng, “Iû-tāi, lí ēng chhùi chim lâi chhut-bōe Jîn-chú o͘h?”

49Iâ-so͘ sin-piⁿ ê bûn-tô͘ khòaⁿ-tio̍h teh hoat-seng ê tāi-chì, chiū kóng, “Chú ah, goán ēng to kā in thâi hó--bô?”

50Kî-tiong ū chi̍t ê kā tōa-chè-si ê po̍k-jîn phut--lo̍h-khì, kā i chiàⁿ-pêng ê hī-á siah--khí-lâi.

51Iâ-so͘ kóng, “M̄-thang koh tāng-chhiú!” Iâ-so͘ bong hit-ê po̍k-jîn ê hī-á, kā i i-hó.

52Iâ-so͘ kā hiah-ê lâi beh lia̍h I ê chè-si-tiúⁿ, Sèng-tiān ê siú-ōe-koaⁿ, kap tiúⁿ-ló kóng, “Lín gia̍h to gia̍h kùn chhut--lâi, sī teh lia̍h kiông-tō sī--bô?

53Góa ta̍k-ji̍t kap lín tī Sèng-tiān, lín bô hē-chhiú kā góa lia̍h. M̄-kú, che sī lín ê sî, o͘-àm teh chiáng-koân lah.”

Pí-tek M̄ Jīn Iâ-so͘(Thài 26.57-58, 69-75; Khó 14.53-54, 66-72; Iok 18.12-18, 25-27)

54In lia̍h Iâ-so͘, ah I ji̍p-khì tōa-chè-si ê kong-koán. Pí-tek lī hn̄g-hn̄g teh tè Iâ-so͘.

55In tī tiâⁿ ê tiong-ng khí hé, ûi tī hé piⁿ chòe-hé teh chē; Pí-tek mā chē tī in tiong-kan.

56Ū chi̍t ê lú-pī khòaⁿ-tio̍h Pí-tek ǹg hé teh chē, kim-kim kā i siòng, kóng, “Chit-ê mā-sī Iâ-so͘ in hit-tīn ê lâng.”

57 Pí-tek m̄ jīn, kóng, “Lí chit-ê cha-bó͘-lâng, góa m̄ bat I.”

58Kè bô jōa kú, lēng-gōa chi̍t ê lâng khòaⁿ-tio̍h i, kóng, “Lí mā-sī in hit-tīn ê lâng.”

Pí-tek kóng, “Lí chit-ê lâng, góa m̄-sī!”

59Chha-put-to kè chi̍t tiám-cheng, koh ū chi̍t ê lâng kian-chhî kóng, “Chit-ê lâng khak-si̍t ū teh kap Iâ-so͘ chòe-hé, in-ūi i mā-sī Ka-lī-lī-lâng.”

60M̄-kú Pí-tek kóng, “Lí chit-ê lâng, góa m̄ chai lí teh kóng sím-mi̍h!”

I iáu-teh kóng ê sî, koe sûi-sî thî.

61Hit-sî Chú oa̍t-thâu khòaⁿ Pí-tek, Pí-tek chiū siūⁿ-khí Chú tùi i kóng ê ōe, “Kin-á-ji̍t koe thî í-chêng, lí ōe saⁿ piàn m̄ jīn góa.”

62I chiū chhut-khì gōa-bīn tōa-siaⁿ thî-khàu.

Iâ-so͘ Siū Hì-lāng Piⁿ-phah(Thài 26.67-68; Khó 14.65)

63Hiah-ê khàn-siú Iâ-so͘ ê lâng kā I hì-lāng, koh kā I phah.

64In ng I ê ba̍k-chiu, mn̄g I kóng, “Sian-ti, lí kā goán kóng, siáⁿ-lâng kā lí phah?”

65In koh kóng chin chōe ōe kā I bú-jio̍k.

Iâ-so͘ tī Gī-hōe Siū Sím(Thài 26.59-66; Khó 14.55-64; Iok 18.19-24)

66Thiⁿ-kng, Iû-thài-lâng ê tiúⁿ-ló, chè-si-tiúⁿ, kap keng-ha̍k-kàu-su chū-chi̍p. In kā Iâ-so͘ ah-khì in ê gī-hōe,

67kā I kóng, “Lí nā-sī Ki-tok, tio̍h kā goán kóng.”

Iâ-so͘ kā in kóng, “Góa nā kā lín kóng, lín mā m̄ sìn.

68Góa mn̄g lín, lín mā m̄ ìn.

69Tùi hiān-chāi khí, Jîn-chú ōe chē tī Choân-lêng Siōng-tè ê chiàⁿ-pêng.”

70Chèng-lâng kóng, “Án-ni lí chiū-sī Siōng-tè ê Kiáⁿ lo͘h?”

Iâ-so͘ ìn in kóng, “Góa sī, sī lín kóng--ê.”

71In chiū kóng, “Lán iáu su-iàu sím-mi̍h chèng-kù? Lán í-keng ū thiaⁿ-tio̍h I chhin-chhùi kóng lah!”

Lō͘-ka Hok-im 22 - 現代台語譯本羅馬字版(TTVR)-闽南语

Learn More About Us