Lia̍t-ông-kì Siōng-koàn 12

Lia̍t-ông-kì Siōng-koàn 12 - 現代台語譯本羅馬字版(TTVR)-闽南语

Pak-pō͘ Chi-cho̍k Hoán-poān(2 Tāi 10.1-19)

1 Lô-pho-an khì Sī-kiàm, in-ūi Í-sek-lia̍t jîn-bîn beh tī hia siat-li̍p i choh-ông.

2Í-chêng Nî-pat ê kiáⁿ Iâ-lô-pho-an ūi-tio̍h siám-pī Só͘-lô-bûn-ông, cháu-khì tòa tī Ai-ki̍p. Iâ-lô-pho-an iáu tī Ai-ki̍p ê sî, thiaⁿ-tio̍h Lô-pho-an choh-ông ê siau-sit.

3Í-sek-lia̍t-lâng chhe lâng khì chhiáⁿ i tò--lâi; Iâ-lô-pho-an chiū kap Í-sek-lia̍t hōe-chiòng lâi kìⁿ Lô-pho-an, tùi i kóng,

4“Lí ê lāu-pē hō͘ goán pē tāng ê tàⁿ; kiû lí kiám-khin lí ê lāu-pē hē tī goán keng-thâu téng ê tāng-tàⁿ, kiám-chió goán ê khó͘-kang, goán chiū ho̍k-sāi lí.”

5 Lô-pho-an kā in kóng, “Lín tò--khì, saⁿ ji̍t āu chiah koh lâi.” Jîn-bîn chiū tò--khì.

6 Lô-pho-an ê lāu-pē Só͘-lô-bûn iáu oa̍h--teh ê sî, ū goân-ló ho̍k-sāi i; Lô-pho-an-ông chhéng-kàu in, kóng, “Lín ū sím-mi̍h kè-chhek, góa thang hôe-ho̍k chiah-ê jîn-bîn?”

7In ìn i kóng, “Kin-á-ji̍t lí nā goān-ì chòe chiah-ê jîn-bîn ê po̍k-jîn ho̍k-sāi in, ēng hó-ōe hôe-tap in, in chiū ōe éng-oán chòe lí ê po̍k-jîn.”

8M̄-kú Lô-pho-an kū-choa̍t chiah-ê goân-ló hō͘ i ê kè-chhek, khì kap hiah-ê kap i chòe-hé tōa-hàn, ho̍k-sāi i ê siàu-liân-lâng chham-siông;

9i kā in kóng, “Chiah-ê jîn-bîn ū tùi góa kóng, ‘Kiû lí kiám-khin lí ê lāu-pē hē tī goán keng-thâu téng ê tāng-tàⁿ.’ Taⁿ lín ū sím-mi̍h ì-kiàn hō͘ lán thang kā in hôe-ho̍k?”

10Hiah-ê kap i chòe-hé tōa-hàn ê siàu-liân-lâng kā i kóng, “Chiah-ê jîn-bîn tùi ông kóng, ‘Kiû lí kiám-khin lí ê lāu-pē hē tī goán keng-thâu téng ê tāng-tàⁿ.’ Ông tio̍h án-ni ìn in kóng, ‘Góa ê bé-cháiⁿ pí góa ê lāu-pē ê io khah chho͘.

11Góa ê lāu-pē hō͘ lín pē tāng ê tàⁿ, góa beh hō͘ lín koh-khah tāng ê tàⁿ; góa ê lāu-pē ēng piⁿ hêng-hoa̍t lín, góa beh ēng thih-chhì ê piⁿ hêng-hoa̍t lín.’”

12 Iâ-lô-pho-an kap chèng jîn-bîn chiàu Lô-pho-an-ông ê ōe, tī tē-saⁿ ji̍t tò-lâi kìⁿ i.

13Ông ēng pháiⁿ siaⁿ-sàu ìn jîn-bîn; i m̄ thiaⁿ goân-ló hō͘ i ê kiàn-gī,

14chiàu siàu-liân-lâng ê ì-kiàn tùi jîn-bîn kóng, “Góa ê lāu-pē hō͘ lín pē tāng ê tàⁿ, góa beh hō͘ lín koh-khah tāng ê tàⁿ; góa ê lāu-pē ēng piⁿ hêng-hoa̍t lín, góa beh ēng thih-chhì ê piⁿ hêng-hoa̍t lín.”

15Ông m̄-khéng thiaⁿ jîn-bîn ê chhéng-kiû, in-ūi chit-ê tāi-chì sī chhut tī Siōng Chú, beh si̍t-hiān Siōng Chú thong-kè Sī-lô-lâng A-hi-ngá tùi Nî-pat ê kiáⁿ Iâ-lô-pho-an só͘ kóng ê ōe.

16 Í-sek-lia̍t chèng jîn-bîn chi̍t-ē chai ông m̄-khéng thiaⁿ in ê chhéng-kiû, chiū tùi ông kóng:

Tāi-pi̍t ê ông-kok goán bô hūn;

Iâ-se ê kiáⁿ kap goán bô koan-hē.

Í-sek-lia̍t-lâng ah, lín lóng tò-khì lín tau!

Taⁿ, Tāi-pi̍t-ke, lín ka-kī kò͘ hō͘ hó!

Tùi án-ni, Í-sek-lia̍t-lâng lóng tò-khì in tau.

17M̄-kú Lô-pho-an iû-goân chòe tòa tī lâm-pō͘ Iû-tāi tōe-khu ê Í-sek-lia̍t-lâng ê ông.

18 Lô-pho-an-ông phài kàm-tok kiông-chè-lô-kang ê A-to-lân khì Í-sek-lia̍t-lâng hia; Í-sek-lia̍t jîn-bîn ēng chio̍h-thâu kā i tìm-sí. Lô-pho-an-ông chiū kóaⁿ-kín chiūⁿ chiàn-chhia cháu tò-khì Iâ-lō͘-sat-léng.

19Tùi án-ni, pak-pō͘ ê Í-sek-lia̍t-lâng hoán-poān Tāi-pi̍t-ke, kàu kin-á-ji̍t.

20 Í-sek-lia̍t jîn-bîn thiaⁿ-tio̍h Iâ-lô-pho-an tò--lâi, chiū chhe lâng chhiáⁿ i khì choân hōe-chiòng bīn-chêng, siat-li̍p i chòe Í-sek-lia̍t jîn-bîn ê ông. Iû-tāi chi-cho̍k í-gōa, bô lâng tè Tāi-pi̍t-ke.

Sī-má-ngá ê Ū-giân(2 Tāi 11.1-4)

21 Lô-pho-an kàu Iâ-lō͘-sat-léng, chiū chū-chi̍p Iû-tāi-ke kap Piān-ngá-bín chi-cho̍k te̍k-soán ê chiàn-sū, kiōng cha̍p-poeh-bān lâng, beh kap Í-sek-lia̍t-ke kau-chiàn, hō͘ kui-ê ông-kok koh kui-sio̍k Só͘-lô-bûn ê hō͘-tāi.

22M̄-kú Siōng-tè ê ōe lîm-kàu Siōng-tè tiōng-iōng ê lâng Sī-má-ngá, kóng,

23“Lí khì kā Só͘-lô-bûn ê kiáⁿ Iû-tāi-ông Lô-pho-an, Iû-tāi kap Piān-ngá-bín choân-ke, í-ki̍p kî-tha ê jîn-bîn kóng,

24‘Siōng Chú án-ni kóng: Lín m̄-thang khì kap lín ê hiaⁿ-tī Í-sek-lia̍t-lâng kau-chiàn; ta̍k-ê lâng tò-khì ka-kī ê chhù, in-ūi chit-ê tāi-chì chhut tī góa.’” In chiū thiaⁿ-thàn Siōng Chú ê ōe tò-tńg--khì.

Iâ-lô-pho-an Lī-khui Siōng Chú

25 Iâ-lô-pho-an tī Í-hoat-liân soaⁿ-khu tiông-kiàn Sī-kiàm, tòa tī hia; āu-lâi lī-khui Sī-kiàm, tiông-kiàn Pí-ló͘-i-le̍k.

26Iâ-lô-pho-an sim-lāi kóng, “Taⁿ chit-ê kok m̄-chai ōe koh kui-sio̍k Tāi-pi̍t-ke bōe;

27chiah-ê jîn-bîn nā chiūⁿ-khì Iâ-lō͘-sat-léng tī Siōng Chú ê tiān hiàn-chè, in ê sim ōe kui-ǹg in ê chú Iû-tāi-ông Lô-pho-an; in ōe kā góa thâi-sí, koh tò-khì kui-sio̍k Iû-tāi-ông Lô-pho-an.”

28Ông kap lâng chham-siông liáu-āu, koat-tēng chù-chō nn̄g chiah kim ê gû-á, chiū tùi jîn-bîn kóng, “Lín khì Iâ-lō͘-sat-léng kèng-pài siuⁿ sin-khó͘. Í-sek-lia̍t, khòaⁿ leh, chiah-ê sī chhōa lín tùi Ai-ki̍p-tōe chhut--lâi ê sîn-bêng.”

29I hē chi̍t chiah tī Pek-te̍k-lī, chi̍t chiah tī Tān.

30Chit-ê tāi-chì hō͘ Í-sek-lia̍t jîn-bîn hām-lo̍h chōe, in-ūi in khì Tān kap Pek-te̍k-lī

pài kim-gû-á.

31Ông tī soaⁿ-thâu khí tiān; siat-li̍p m̄-sī Lī-bī chi-cho̍k ê lâng chòe chè-si.

32 Iâ-lô-pho-an o̍h Iû-tāi tēng choeh-kî siú choeh, m̄-kú chiong ji̍t-kî tēng tī poeh-ge̍h cha̍p-gō͘; koh tī chè-tôaⁿ hiàn-chè. I chiong só͘ siat-li̍p soaⁿ-thâu-tôaⁿ ê chè-si phài-khì Pek-te̍k-lī, ka-kī mā khì Pek-te̍k-lī hiàn-chè hō͘ i só͘ chù ê kim-gû-á.

33I tī poeh-ge̍h cha̍p-gō͘, chiū-sī i chiàu ka-kī ê ì-sù tēng ê ji̍t, khì Pek-te̍k-lī tī i só͘ khí-chō ê chè-tôaⁿ hiàn-chè; i kā Í-sek-lia̍t-lâng tēng choeh-kî, koh tī chè-tôaⁿ hiàn-chè sio-hiuⁿ.

Lia̍t-ông-kì Siōng-koàn 12 - 現代台語譯本羅馬字版(TTVR)-闽南语

Learn More About Us