Lī-bī-kì 7

Lī-bī-kì 7 - 現代台語譯本羅馬字版(TTVR)-闽南语

Pê-chōe-chè ê Tiâu-lē

1Ē-bīn sī pê-chōe-chè ê tiâu-lē:

Pê-chōe-chè sī chì-sèng--ê.

2Tio̍h tī thâi sio-hòa-chè ê cheng-siⁿ ê só͘-chāi thâi pê-chōe-chè ê cheng-siⁿ; kā i ê huih hiù tī chè-tôaⁿ ê sì-chiu-ûi.

3I ê iû tio̍h lóng hiàn; kui-ki pûi ê bé, pak-lāi kap i téng-bīn ê iû,

4nn̄g lia̍p io-chí kap in piⁿ--á ê iû, í-ki̍p koaⁿ kap i ê bāng-se tio̍h lóng the̍h--khí-lâi.

5Chè-si tio̍h chiong chiah-ê hē tī chè-tôaⁿ téng sio, chòe hiàn hō͘ Siōng Chú ê chè-mi̍h. Che sī pê-chōe-chè.

6Chè-si ka-sio̍k ê ta-po͘-lâng lóng thang tī hōe-bō͘ ê tiâⁿ chia̍h chè-bah; che sī chì-sèng--ê.

7Pê-chōe-chè kap sio̍k-chōe-chè ê tiâu-lē siâng-khoán, chè-mi̍h kui tī hiàn chiah-ê chè ê chè-si.

8Kâng-khoán, sio-hòa-chè ê cheng-siⁿ ê phê kui tī hiàn sio-hòa-chè ê chè-si.

9Só͘-ū tī hé-lô͘ hang--ê, tī tiáⁿ-á á-sī chian-pôaⁿ chian ê sò͘-chè, lóng kui tī hiàn chit-ê chè ê chè-si.

10Ū chhiau-iû--ê, kap bô chhiau-iû ê sò͘-chè, lóng tio̍h kui A-lûn ê kiáⁿ-sun, tāi-ke pîⁿ-pun.

Pêng-an-chè ê Tiâu-lē

11Ē-bīn sī hiàn hō͘ Siōng Chú ê pêng-an-chè ê tiâu-lē:

12Nā ū lâng ūi-tio̍h kám-siā beh hiàn-chè, tio̍h ēng chhiau-iû ê bô-kàⁿ-piáⁿ, boah-iû ê bô-kàⁿ po̍h-piáⁿ, kap chhiau-iû ê iù mī-hún chòe ê piáⁿ, kap siā-un-chè ê cheng-siⁿ chòe-hé hiàn.

13Koh tio̍h hiàn ū-kàⁿ ê piáⁿ, kap ūi-tio̍h kám-siā hiàn ê pêng-an-chè chòe-hé hiàn.

14Tio̍h tùi ta̍k-hāng beh hiàn ê piáⁿ the̍h chi̍t hūn gia̍h-koân chòe lé-mi̍h hiàn hō͘ Siōng Chú; chiah-ê mi̍h tio̍h kui tī hiù pêng-an-chè ê huih ê chè-si.

15Ūi-tio̍h kám-siā hiàn ê pêng-an-chè ê bah, tio̍h tī hiàn-chè hit-ji̍t chia̍h, chi̍t-tiám-á to m̄-thang lâu kàu keh-chá-khí.

16Nā ū lâng ūi-tio̍h siā-goān á-sī kam-sim hiàn-chè, hiàn ê chè-mi̍h tio̍h tī hiàn-chè hit-ji̍t chia̍h; chhun--ê keh-ji̍t iáu thang chia̍h,

17m̄-kú chhun ê chè-bah kàu tē-saⁿ ji̍t tio̍h sio-tiāu.

18Nā ū lâng kàu tē-saⁿ ji̍t iáu-teh chia̍h pêng-an-chè ê bah, i hiàn ê chè bōe siū Siōng-tè chiap-la̍p, mā bô sǹg i ū hiàn chit-ê chè; chiah-ê bah bô chheng-khì, chia̍h ê lâng tio̍h tùi ka-kī ê chōe hū chek-jīm.

19Chè-bah nā kha̍p-tio̍h bô chheng-khì ê mi̍h, chiū m̄-thang chia̍h, tio̍h ēng hé sio-tiāu. Kî-tha ê chè-bah, lé-gî-siōng chheng-khì ê lâng lóng thang chia̍h.

20Nā ū lâng pún-sin bô chheng-khì, koh chia̍h hiàn hō͘ Siōng Chú ê pêng-an-chè ê bah, chit-ê lâng tio̍h tùi jîn-bîn ê tiong-kan kek-chhut.

21Nā ū lâng bong-tio̍h bô chheng-khì ê mi̍h, bô-lūn sī bô chheng-khì ê lâng, á-sī bô chheng-khì ê cheng-siⁿ, á-sī jīm-hô bô chheng-khì ê mi̍h, koh chia̍h-tio̍h hiàn hō͘ Siōng Chú ê pêng-an-chè ê bah, chit-ê lâng tio̍h tùi jîn-bîn tiong-kan kek-chhut.

22Siōng Chú bēng-lēng Mô͘-se

23tio̍h tùi Í-sek-lia̍t-lâng soan-pò͘:

Bô-lūn sī gû, mî-iûⁿ, soaⁿ-iûⁿ ê iû, lóng m̄-thang chia̍h.

24Chū-jiân sí ê cheng-siⁿ ê iû, hō͘ iá-siù thiah-li̍h ê cheng-siⁿ ê iû, thang chòe pa̍t-hāng ê lō͘-ēng, m̄-kú chhian-bān m̄-thang chia̍h.

25Bô-lūn sím-mi̍h-lâng chia̍h hiàn hō͘ Siōng Chú ēng hé sio ê cheng-siⁿ ê iû, hit-ê lâng tio̍h tùi jîn-bîn tiong-kan kek-chhut.

26Lín bô-lūn tòa tī sím-mi̍h só͘-chāi, lóng m̄-thang chia̍h chiáu-á á-sī iá-siù ê huih.

27Nā ū lâng chia̍h huih, bô-lūn sím-mi̍h huih, hit-ê lâng tio̍h tùi jîn-bîn tiong-kan kek-chhut.

28Siōng Chú bēng-lēng Mô͘-se

29tio̍h tùi Í-sek-lia̍t-lâng soan-pò͘:

Nā ū lâng beh hiàn pêng-an-chè hō͘ Siōng Chú, tio̍h tùi i ê pêng-an-chè ê chè-mi̍h the̍h chi̍t-pō͘-hūn lâi hiàn.

30I tio̍h chhin-chhiú tòa cheng-siⁿ ê iû kap heng-khám-bah, ēng hé sio chòe chè-mi̍h hiàn hō͘ Siōng Chú, chiong heng-khám-bah tī Siōng Chú ê bīn-chêng iô-iô--leh chòe chè-mi̍h hiàn hō͘ I.

31Chè-si tio̍h chiong iû hē tī chè-tôaⁿ téng sio; heng-khám-bah kui tī A-lûn kap i ê kiáⁿ-sun.

32Lín tio̍h tùi lín ê pêng-an-chè the̍h chiàⁿ-pêng ê tōa-thúi gia̍h-koân chòe lé-mi̍h, kui hō͘ chè-si.

33A-lûn ê kiáⁿ-sun tiong-kan, hiàn pêng-an-chè ê huih kap iû ê chè-si, thang tit-tio̍h chit-ê chiàⁿ-pêng ê tōa-thúi chòe in ê hūn-gia̍h.

34Góa tùi Í-sek-lia̍t-lâng pêng-an-chè ê tiong-kan, chiong chit-ê iô--kè ê heng-khám-bah kap the̍h-koân ê chiàⁿ-pêng tōa-thúi, hō͘ chè-si A-lûn kap i ê kiáⁿ-sun, chòe in tùi Í-sek-lia̍t-lâng tit-tio̍h éng-oán ê hūn-gia̍h.

35Chiah-ê chè-bah sī tùi ēng hé sio hiàn hō͘ Siōng Chú ê chè-mi̍h the̍h--chhut-lâi, chòe A-lûn kap i ê kiáⁿ-sun èng-tit ê hūn-gia̍h, tùi in chòe chè-si ho̍k-sāi Siōng Chú ê ji̍t khai-sí.

36Che chiū-sī lí kā in boah-iû siat-li̍p hit-ji̍t, Siōng Chú bēng-lēng beh hō͘ in ê hūn-gia̍h, chòe Í-sek-lia̍t-lâng sè-sè-tāi-tāi éng-oán ê kui-lē.

37Í-siōng sī sio-hòa-chè, sò͘-chè, sio̍k-chōe-chè, pê-chōe-chè, siat-li̍p chè-si ê chè, kap pêng-an-chè ê tiâu-lē.

38Chiah-ê sī Mô͘-se tī Se-nāi ê khòng-iá hoan-hù Í-sek-lia̍t-lâng hiàn chè-mi̍h hō͘ Siōng Chú ê sî, Siōng Chú tī Se-nāi-soaⁿ bēng-lēng Mô͘-se--ê.

Lī-bī-kì 7 - 現代台語譯本羅馬字版(TTVR)-闽南语

Learn More About Us