Si-phian 61 - 現代台語譯本羅馬字版(TTVR)-闽南语

Tāi-pi̍t ê si, kau hō͘ sèng-ga̍k-tiúⁿ; ēng hiân ê ga̍k-khì phōaⁿ-chàu.Kî-kiû Pó-hō͘

1Siōng-tè ah, kiû lí thiaⁿ góa ê kiû-kiò,

àⁿ-lo̍h thiaⁿ góa ê kî-tó.

2Góa sim sit-chì ê sî,

beh tùi tōe ê chīn-thâu kiû-kiò lí.

Kiû lí chhōa góa kàu pí góa khah koân ê chio̍h-pôaⁿ.

3In-ūi lí sī góa ê pī-lān-só͘,

chòe góa kian-kò͘ ê pó-lúi thang tí-khòng tùi-te̍k.

4Góa beh éng-oán tòa tī lí ê pò͘-pîⁿ,

bih tī lí ê si̍t-kó͘-ē.

5Siōng-tè ah, góa só͘ hē ê goān lí ū thiaⁿ--kìⁿ;

lí ū chiong sán-gia̍p sù hō͘ kèng-ùi lí ê lâng.

6Lí beh ke-thiⁿ ông ê hè-siū,

hō͘ i ê nî-hè kàu sè-sè-tāi-tāi.

7Goān i tī Siōng-tè bīn-chêng kú-tn̂g chiáng-koân;

goān lí ēng chû-ài kap sìn-si̍t pó-hō͘ i.

8Án-ni, góa beh put-sî chhiùⁿ-koa chheng-chàn lí ê miâ,

ji̍t-ji̍t siā góa ê goān.

Learn More About Us