Thê-mô͘-thài Chiân-su 3

Thê-mô͘-thài Chiân-su 3 - 現代台語譯本羅馬字版(TTVR)-闽南语

Kàu-hōe ê Léng-siù: Kam-tok

1Chit-kù ōe thang siong-sìn:

Nā ū lâng ài choh kam-tok, i sī him-bō͘ bí-hó ê kang-chok.

2Só͘-í, kam-tok tio̍h bô thang hiâm, chí-ū chi̍t ê bó͘, an-hūn siú-kí, chū-chè, toan-chèng, gâu khoán-thāi chhut-gōa-lâng, gâu kà-sī;

3bô chiú-chùi, bô hiong-pō, hoán-tńg ài un-hô, bô saⁿ-chiⁿ, bô tham-châi,

4gâu koán-lí ka-kī ê ka-têng, kiáⁿ-jî ū sūn-ho̍k, sū-sū toan-chong.

5Lâng nā bōe-hiáu koán-lí ka-kī ê ka-têng, ná ōe-hiáu koàn-kò͘ Siōng-tè ê kàu-hōe?

6Chho͘-sìn-chiá m̄-thang hō͘ i tam-jīm kam-tok, chiah bōe chū-ko chū-tāi, hām-lo̍h kap Mô͘-kúi só͘ siū kâng-khoán ê sím-phòaⁿ.

7I tī kàu-hōe-gōa mā tio̍h ū hó kiàn-chèng, chiah bián siū húi-pòng, hām-lo̍h Mô͘-kúi ê lô-bāng.

Kàu-hōe Léng-siù ê Chō͘-chhiú: Chip-sū

8Chip-sū siâng-khoán mā tio̍h toan-chong, bô siang-bīn-ōe, bô hò͘ⁿ-chiú, bô tham châi-lī,

9tio̍h ēng chheng-khì ê liông-sim kò͘-siú sìn-gióng ê ò-pì.

10Chit-khoán lâng mā tio̍h seng hō͘ in chiap-siū khó-giām, nā bô thang hiâm chiah hō͘ in tam-jīm chip-sū.

11Lú chip-sū mā-sī tio̍h toan-chong, bô tiòng-siong pa̍t-lâng, an-hūn siú-kí, sū-sū tiong-si̍t.

12Chip-sū eng-kai chí-ū chi̍t ê bó͘, gâu koán-lí kiáⁿ-jî kap ka-kī ê ka-têng.

13Chip-sū ê kang-chok nā chòe ōe hó, pún-sin ōe tit-tio̍h hó miâ-siaⁿ, mā thang chin hó-táⁿ káng-lūn in tùi Ki-tok Iâ-so͘ ê sìn-gióng.

Ko-chhim ê Ò-pì

14-15Góa ǹg-bāng chin kín chiū ōe khì lí hia, m̄-kú kiaⁿ-liáu khah bān kàu, góa seng siá chit-tiuⁿ phoe hō͘ lí chai lán tī Siōng-tè ê ke tio̍h án-chóaⁿ seng-oa̍h; chit-ê ke chiū-sī chin-oa̍h Siōng-tè ê kàu-hōe, iā chiū-sī chin-lí ê thiāu-chio̍h kap tōe-ki.

16Tāi-ke lóng soan-jīn lán sìn-gióng ê ò-pì sī jōa-ni̍h tōa:

Ki-tok hián-hiān chòe lâng,

Sèng Sîn jīn-tēng chòe gī,

tùi thiⁿ-sài chhut-hiān,

tī bān-pang tiong siū soan-iông,

sè-kan-lâng siong-sìn,

siū chiap-la̍p ji̍p êng-iāu.

Thê-mô͘-thài Chiân-su 3 - 現代台語譯本羅馬字版(TTVR)-闽南语

Learn More About Us