Tān-í-lí-su 4

Tān-í-lí-su 4 - 現代台語譯本羅馬字版(TTVR)-闽南语

Nî-pò͘-kah-nî-sat Tē-jī Ê Bāng

1 Nî-pò͘-kah-nî-sat-ông tùi choân-kok jîn-bîn, bô-lūn in sio̍k tó chi̍t ê bîn-cho̍k, tó chi̍t ê pang-kok, kóng tó chi̍t khoán gú-giân, kā in chiok-hok:

Goān lín pêng-an hù-chiok!

2Góa lo̍k-ì chiong Chì-koân Siōng-tè tùi góa só͘ chòe ê sîn-jiah kî-sū kā lín kóng.

3I ê sîn-jiah hui-siông úi-tāi!

I ê kî-sū chin ū khùi-la̍t!

I ê kok-tō͘ éng-oán chûn-chāi!

I ê thóng-tī sòa kàu bān-tāi!

4Góa Nî-pò͘-kah-nî-sat pêng-an tòa tī góa ê chhù, tī ông-kiong hióng-siū êng-hôa-hù-kùi.

5Góa chòe chi̍t ê bāng hō͘ góa chin kiaⁿ-hiâⁿ. Góa tī bîn-chhn̂g téng ê hoàn-sióng kap thâu-khak lāi ê īⁿ-siōng hō͘ góa kám-kak chin khióng-pò͘.

6Góa ū tiàu-chi̍p Pa-pí-lûn só͘-ū ū tì-hūi ê lâng lóng lâi góa chia, ài in kā góa kái-bāng.

7Chiah-ê su̍t-sū, kiâⁿ hoat-su̍t--ê, seng-siōng-ka, chiam-pok--ê chìn-kiong, góa tng-bīn chiong hit-ê bāng kā in kóng, m̄-kú in lóng bōe-hiáu kā góa kóe-seh hit-ê bāng ê ì-sù.

8Chòe-āu, góa chiàu góa ê sîn-bêng ê miâ kā i hō-chòe Pek-thê-sa-sat ê Tān-í-lí lâi góa chia; i ū chì-sèng sîn-bêng ê sîn tī i ê lāi-bīn. Góa chiong bāng kā i kóng,

9“Koán-lí ū tì-hūi ê lâng ê Pek-thê-sa-sat, góa chai lí lāi-bīn ū chì-sèng sîn-bêng ê sîn, bô chi̍t hāng ò-pì ōe-tàng kā lí ûi-lân. Taⁿ chhiáⁿ lí chiong góa tī bîn-bāng tiong khòaⁿ--tio̍h ê īⁿ-siōng kā góa kóe-seh.

10“Góa teh khùn ê sî khòaⁿ--tio̍h ê īⁿ-siōng sī án-ni: Góa khòaⁿ-tio̍h tāi-tōe ê tiong-ng chhut-hiān chi̍t châng hui-siông tōa-châng ê chhiū.

11Hit-châng chhiū ná tōa-châng ná chho͘-ióng, koân kah tú-thiⁿ, thiⁿ-piⁿ-hái-kak lóng khòaⁿ ōe tio̍h.

12I ki-hio̍h bō͘-sēng, ké-chí chin chōe, chōe kah ū-kàu thang chòe só͘-ū tōng-bu̍t ê chia̍h-mi̍h; chhân-iá ê cháu-siù lâi i ê chhiū-ńg hioh-khùn, pe-chiáu lâi hioh tī i ê chhiū-oe, só͘-ū ê seng-bu̍t lóng tùi chit-châng chhiū tit-tio̍h chia̍h-mi̍h.

13“Góa tó tī bîn-chhn̂g iáu-teh khòaⁿ chit-ê īⁿ-siōng ê sî, khòaⁿ-tio̍h chi̍t ūi sèng ê siú-bōng-chiá tùi thiⁿ lo̍h--lâi.

14I tōa-siaⁿ hoah kóng, ‘Chiong hit-châng chhiū chhò--khí-lâi, kā chhiū-oe chām-tn̄g, kā chhiū-hio̍h iô hō͘ lak-liáu-liáu, kā ké-chí iā hìⁿ-sak, kā cháu-siù kóaⁿ lī-khui chhiū-kha, hō͘ pe-chiáu bōe-tàng koh lâi hioh tī chhiū-ki.

15M̄-kú, tio̍h kā chhiū-thâu lâu tī tōe--ni̍h, ēng thih kap tâng ê liān-á kā i khún tiàm iá-gōa chhiⁿ-chháu ê tiong-kan.

“‘Tio̍h kā chit-ê lâng pàng tī iá-gōa, hō͘ lō͘-chúi tàng, hō͘ i kap iá-gōa ê cháu-siù kâng-khoán chia̍h chhiⁿ-chháu;

16hō͘ i ê sim kái-piàn chòe iá-siù ê sim, án-ni keng-kè chhit nî kú.

17Che sī hit kúi ê siú-bōng-chiá soan-pò͘ ê chhâi-koat, sī chiah-ê sèng-chiá soan-pò͘ ê koat-tēng, beh hō͘ sè-kan-lâng lóng chai, Chì-koân-chiá teh chiáng-koán chit sè-kan ê kok-ka; I beh chiong kok sù hō͘ sím-mi̍h-lâng, chiū hō͘ hit-ê lâng; I ōe-tàng soán-li̍p sè-kan siōng pi-bî ê lâng tī-lí kok-ka.’”

18 Nî-pò͘-kah-nî-sat-ông koh kóng, “Che sī góa chòe ê bāng. Pek-thê-sa-sat, chhiáⁿ kā góa kóe-seh chit-ê bāng ê ì-sù. Góa ê kok-ka só͘-ū ū tì-hūi ê lâng chí-ū lí ōe-tàng kā góa kái-bāng, in-ūi lí lāi-bīn ū chì-sèng sîn-bêng ê sîn.”

Tān-í-lí Kái-bāng

19Hit-chūn, kiò-chòe Pek-thê-sa-sat ê Tān-í-lí gāng chi̍t-sî-á kú; i siūⁿ--tio̍h ê tāi-chì hō͘ i chin khióng-hông. Ông kā i kóng, “Pek-thê-sa-sat, lí m̄-bián in-ūi hit-ê bāng kap i ê ì-sù sim kan-khó͘.”

Pek-thê-sa-sat ìn ông kóng, “Hông-siōng, goān chit-ê bāng si̍t-hiān tī oàn-hūn lí ê lâng, èng-giām tī lí ê tùi-te̍k.

20Lí khòaⁿ--tio̍h hit-châng tōa-châng chhiū, i jú lâi jú tōa-châng, jú ióng, koân kah tú-thiⁿ, tùi thiⁿ-piⁿ-hái-kak lóng ōe-tàng khòaⁿ--tio̍h,

21ki-hio̍h bō͘-sēng, ké-chí chin chōe, chōe kah ū-kàu thang hō͘ só͘-ū ê tōng-bu̍t chòe chia̍h-mi̍h; chhân-iá ê cháu-siù lóng lâi hioh tī i ê ńg, pe-chiáu lóng lâi hioh tī i ê ki.

22“Hông-siōng, hit-châng jú lâi jú tōa-châng, jú ióng ê tōa-châng chhiū chiū-sī lí. Lí í-keng tōa koh kiông; lí ê koân-le̍k í-keng chhèng kàu thiⁿ, lí thóng-tī ê hoān-ûi í-keng ta̍t-kàu tōe ê chīn-thâu.

23Hông-siōng, lí só͘ khòaⁿ--tio̍h tùi thiⁿ lo̍h--lâi hit-ê sîn-sèng ê siú-bōng-chiá, i ū kóng, ‘Kā hit-châng chhiū chhò--khí-lâi, kā i húi-húi--tiāu, kan-ta tio̍h kā chhiū-thâu lâu tī tōe--ni̍h, ēng thih kap tâng ê liān-á kā i khún tiàm iá-gōa chhiⁿ-chháu ê tiong-kan; tio̍h kā chit-ê lâng pàng tī iá-gōa, hō͘ lō͘-chúi tàng, hō͘ i kap iá-gōa ê cháu-siù kâng-khoán chia̍h chhiⁿ-chháu; án-ni keng-kè chhit nî kú.’

24“Hông-siōng, chit-ê bāng ōe hoat-seng tī góa ê chú góa ê ông sin-chiūⁿ, sī chhut-tī Chì-koân-chiá ê koat-tēng.

25Lí ōe siū kóaⁿ lī-khui jîn-kûn, khì kap iá-gōa ê cháu-siù chòe-hé tòa, chhin-chhiūⁿ gû chia̍h-chháu, hō͘ lō͘-chúi tàng, án-ni keng-kè chhit nî kú; ti̍t-kàu lí sêng-jīn Chì-koân-chiá teh chiáng-koán sè-kan ê kok-ka, I beh chiong kok sù hō͘ sím-mi̍h-lâng, chiū hō͘ hit-ê lâng.

26Koan-hē chhiū-thâu tio̍h lâu--teh ê bēng-lēng, sī beh tán lí sêng-jīn, Thiⁿ teh chiáng-koán choân sè-kài; kàu hit-sî, lí ê kok chiū ōe koh kau hō͘ lí.

27Hông-siōng, kiû lí chiap-siū góa ê khó͘-khǹg: Tio̍h péng-kong-hêng-gī, lī-khui lí ê chōe; chû-pi tùi-thāi sàn-chhiah-lâng, thoat-lī lí ê pháiⁿ só͘-kiâⁿ, án-ni, lí chiū ōe kú-tn̂g hoân-êng.”

Bāng Si̍t-hiān

28Chiah-ê sū lóng tī Nî-pò͘-kah-nî-sat-ông sin-chiūⁿ si̍t-hiān.

29Chi̍t nî āu, ū chi̍t ji̍t, i tī Pa-pí-lûn ông-kiong ê chhù-téng teh sàn-pō͘,

30i kóng, “Chit-ê tōa Pa-pí-lûn ê kiaⁿ-siâⁿ kiám m̄-sī góa ēng góa úi-tāi ê châi-lêng kiàn-chō--ê, ōe-tàng chiong-hián góa ê êng-kng?”

31Ōe kóng iáu-bē liáu, chiū ū chi̍t ê siaⁿ tùi thiⁿ thoân--chhut-lâi, kóng, “Nî-pò͘-kah-nî-sat-ông, góa kā lí kóng, ‘Lí bōe-tàng koh choh-ông lah.

32Lí beh hō͘ lâng kóaⁿ lī-khui jîn-kûn, khì kap iá-gōa ê cháu-siù chòe-hé tòa, chhin-chhiūⁿ gû chia̍h-chháu, án-ni keng-kè chhit nî kú; ti̍t-kàu lí sêng-jīn Chì-koân-chiá teh chiáng-koán sè-kan ê kok, I beh chiong kok sù hō͘ sím-mi̍h-lâng, chiū hō͘ hit-ê lâng.’”

33Chit-ê sū sûi-sî tī Nî-pò͘-kah-nî-sat sin-chiūⁿ si̍t-hiān. I siū kóaⁿ lī-khui jîn-kûn, chhin-chhiūⁿ gû chia̍h-chháu, hō͘ lō͘-chúi tàng; i ê thâu-mn̂g tn̂g kah chhin-chhiūⁿ eng-chiáu ê mn̂g, chńg-kah hoat kah chhin-chhiūⁿ eng-chiáu ê jiáu.

Nî-pò͘-kah-nî-sat Siōng-chàn Siōng-tè

34“Chhit nî kàu lah, góa Nî-pò͘-kah-nî-sat gia̍h-thâu ǹg thiⁿ, góa ê cheng-sîn hôe-ho̍k chèng-siông, chiū chheng-chàn Chì-koân-chiá, o-ló chit-ūi chun-êng, éng-oán chûn-chāi ê Siōng-tè:

I ê thóng-tī éng-oán chûn-chāi!

I ê kok sòa kàu bān-tāi!

35Tùi I lâi khòaⁿ, sè-kan-lâng lóng sī khang-hu;

tī thiⁿ-téng bān-kun kap tōe-chiūⁿ chū-bîn tiong-kan,

I chiàu I ê chí-ì chòe tāi-chì,

bô lâng ōe-tàng chó͘-tòng I,

á-sī chit-būn I: Lí teh chhòng siáⁿ?

36“Hit-sî, góa ê cheng-sîn hôe-ho̍k, góa ê chun-giâm kap êng-kng mā hôe-ho̍k, góa ê kok koh-chài chhiong-sēng. Chham-bô͘ kap jîn-sîn koh lâi ióng-hō͘ góa. Góa tiông-kiàn góa ê kok, tit-tio̍h pí í-chêng koh-khah tōa ê koân-pèng.

37“Taⁿ, góa Nî-pò͘-kah-nî-sat beh chheng-chàn, chun-chông, chiong êng-kng kui hō͘ thiⁿ-téng ê Ông, in-ūi I ê só͘-chòe lóng sī sìn-si̍t, I ê tō-lō͘ chèng-ti̍t; hêng-ûi kiau-ngō͘--ê, I kā in kàng-chòe pi-bî.”

Tān-í-lí-su 4 - 現代台語譯本羅馬字版(TTVR)-闽南语

Learn More About Us