Khé-sī-lio̍k 18

Khé-sī-lio̍k 18 - 現代台語譯本羅馬字版(TTVR)-闽南语

Pa-pí-lûn ê Tó-hoāi

1Āu-lâi, góa ū khòaⁿ-kìⁿ lēng-gōa chi̍t ê thiⁿ-sài tùi thiⁿ-téng lo̍h--lâi. I ū tōa koân-pèng; i ê êng-kng hō͘ tōe-chiūⁿ kng--khí-lâi.

2I tōa-siaⁿ hoah:

Tó--lo̍h-khì lah! Tōa Pa-pí-lûn tó--lo̍h-khì lah!

Chit-ê siâⁿ chiâⁿ-chòe kúi khiā-khí ê só͘-chāi:

it-chhè ù-òe ê sîn ê kaⁿ-lô,

it-chhè ù-òe ê chiáu ê chiáu-lang,

it-chhè ù-òe koh khó-ò͘ⁿ ê iá-siù ê lông-á.

3In-ūi lia̍t-kok lóng ū lim-tio̍h chit-ê îm-hū îm-loān ê chiú ín-khí Siōng-tè tōa siū-khì,

tōe-chiūⁿ ê kun-ông lóng ū kap i kiâⁿ-îm,

tōe-chiūⁿ ê seng-lí-lâng lóng ū tùi i ê chhia-hoa hòng-tōng hoat tōa-châi.

4Góa koh ū thiaⁿ-kìⁿ lēng-gōa chi̍t ê siaⁿ tùi thiⁿ-téng chhut--lâi, kóng:

Góa ê chú-bîn ah, chhut--lâi, tio̍h tùi îm-hū hia chhut--lâi,

chiah bián bak-tio̍h i ê chōe,

chiah bián hō͘ i ê chai-hō liân-lūi--tio̍h.

5In-ūi i ê chōe í-keng lúi-chek tú-thiⁿ,

Siōng-tè ōe-kì-tit i ê siâ-ok.

6I án-chóaⁿ tùi-thāi lâng, tio̍h chiàu án-ni tùi-thāi i,

chiàu i ê só͘-chòe ka-pē kā i pò-èng,

ēng i tiâu-hô chiú ê poe tiâu-hô ka-pē ê chiú hō͘ i!

7I bat án-chóaⁿ êng-kng ka-kī, án-chóaⁿ chhia-hoa,

tio̍h chiàu án-ni hō͘ i thòng-khó͘ pi-siong.

In-ūi i sim-lāi ka-kī kóng:

Góa chē tī pó-chō choh lú-ông;

góa m̄-sī kóaⁿ-hū,

choa̍t-tùi bōe tú-tio̍h choh kóaⁿ-hū ê pi-siong.

8Só͘-í, tī chi̍t ji̍t lāi chai-hō ōe kàu,

ōe ū sí-bông, pi-siong, ki-hng.

I ōe hō͘ hé sio-bia̍t,

in-ūi sím-phòaⁿ i ê Chú Siōng-tè ū tōa khùi-la̍t.

9Kap i kiâⁿ-îm, kè chhia-hoa seng-oa̍h chiah-ê tōe-chiūⁿ ê kun-ông, khòaⁿ-tio̍h siâⁿ tio̍h-hé-sio ê ian, ōe ūi-tio̍h siâⁿ pi-siong thî-khàu.

10In khòaⁿ-tio̍h siâⁿ só͘ siū ê kan-khó͘ chin kiaⁿ-hiâⁿ, lóng khiā-hn̄g-hn̄g, kóng:

Chhám ah, chit-ê tōa-siâⁿ!

Pa-pí-lûn chit-ê kian-kò͘ ê siâⁿ chhám ah!

In-ūi bô jōa kú, lí chiū ōe siū-tio̍h sím-phòaⁿ!

11Tōe-chiūⁿ ê seng-lí-lâng ūi-tio̍h i thî-khàu ai-siong, in-ūi bô lâng koh bóe in ê hè,

12chiū-sī kim, gûn, pó-chio̍h, chin-chu; iù-môa-pò͘, si-tiû, ko-kùi ê chí-sek kap âng-sek pò͘-liāu; ta̍k-chióng hiuⁿ-chhâ, ta̍k-khoán chhiūⁿ-gê chè-phín, ta̍k-khoán kùi-khì ê bo̍k-châi chè-phín, tâng-khì, thih-khì, kap tāi-lí-chio̍h chè-phín;

13jio̍k-kùi, phang-liāu, hiuⁿ, jú-hiuⁿ; chiú, kaⁿ-ná-iû, iù mī-hún, be̍h; gû, iûⁿ, bé, bé-chhia, lô͘-lē, í-ki̍p lâng.

14Chiah-ê seng-lí-lâng tùi i kóng:

Lí ê sim só͘ ì-ài hiah-ê hó-mi̍h lóng bô--khì;

lí ê êng-hôa-hù-kùi lóng siau-sit,

éng-oán bōe-tàng koh khòaⁿ--tio̍h.

15Khò chit-ê siâⁿ chòe seng-lí hoat tōa-châi ê seng-lí-lâng, in-ūi khòaⁿ-tio̍h chit-ê siâⁿ só͘ siū ê khó͘-chhó͘ chin kiaⁿ-hiâⁿ, lóng ōe khiā-hn̄g-hn̄g pi-siong thî-khàu,

16kóng:

Chhám ah, chhám ah, chit-ê tōa-siâⁿ!

Lí koàn-sì chhēng iù-môa-pò͘,

ko-kùi ê chí-sek kap âng-sek pò͘-liāu ê saⁿ,

kòa kim, pó-chio̍h, kap chin-chu chòe chng-thāⁿ.

17Chi̍t-sî-á kú, só͘-ū ê châi-hù lóng bô--khì.

Só͘-ū ê chûn-tiúⁿ, lú-kheh, chúi-siú, kap só͘-ū khò hái seng-oa̍h ê lâng, khiā-hn̄g-hn̄g,

18khòaⁿ-tio̍h siâⁿ tio̍h-hé-sio ê ian, lóng hoah:

Ū tó chi̍t ê siâⁿ chhin-chhiūⁿ chit-ê tōa-siâⁿ?

19In sám thô͘-hún tī ka-kī ê thâu-khak téng, thî-khàu pi-siong tōa-siaⁿ hoah:

Chhám ah, chhám ah, chit-ê tōa-siâⁿ!

Tī hái--ni̍h kiâⁿ-chûn ê lâng lóng khò chit-ê siâⁿ ê châi-hù hoat-châi.

In-ūi chi̍t-sî-á kú, i ê it-chhè lóng bô--khì.

20Thiⁿ ah, tio̍h ūi-tio̍h chit-ê siâⁿ hoaⁿ-hí!

Lín chiah-ê sìn-tô͘, sù-tô͘, kap sian-ti tio̍h hoaⁿ-hí,

in-ūi Siōng-tè í-keng ū thòe lín sin-oan, kā i hêng-hoa̍t lah!

21Āu-lâi, ū chi̍t ê tōa khùi-la̍t ê thiⁿ-sài giâ chi̍t tè chio̍h, chhin-chhiūⁿ tōa chio̍h-bō, kā i hiat-lo̍h hái, kóng:

Tōa Pa-pí-lûn-siâⁿ mā ōe chhin-chhiūⁿ án-ni,

hō͘ lâng tōa-la̍t kā i hiat--lo̍h-khì,

éng-oán bōe koh khòaⁿ--kìⁿ.

22Tôaⁿ-khîm, chhiùⁿ-koa,

pûn-siau, pûn-lat-pah ê siaⁿ,

lí mā bōe koh thiaⁿ--kìⁿ;

ta̍k-chióng kang-gē sai-hū,

lí mā bōe koh khòaⁿ--kìⁿ;

oe-bō ê siaⁿ,

lí mā bōe koh thiaⁿ--kìⁿ;

23teng-hé ê kng,

bōe koh kā lí chiò;

sin kiáⁿ-sài kap sin-niû ê siaⁿ,

lí bōe koh thiaⁿ--kìⁿ;

in-ūi lí ê seng-lí-lâng í-chêng tī tōe-chiūⁿ sī ū sè-le̍k ê lâng,

in-ūi lí ū ēng siâ-su̍t bê-he̍k bān-kok.

24Sian-ti, kap sìn-tô͘,

í-ki̍p só͘-ū tī tōe-chiūⁿ siū thâi ê lâng ê huih,

tī chit-ê siâⁿ ta̍k só͘-chāi lóng khòaⁿ ōe tio̍h.

Khé-sī-lio̍k 18 - 現代台語譯本羅馬字版(TTVR)-闽南语

Learn More About Us