Chim-giân 19

Chim-giân 19 - 現代台語譯本羅馬字版(TTVR)-闽南语

1Hêng-ûi chèng-ti̍t ê sàn-chhiah-lâng

khah iâⁿ kóng-ōe khúi-chà ê gōng-lâng.

2Jia̍t-sim bô tì-sek m̄ hó;

kho̍k-kho̍k-chông tian-tò ōe cháu m̄-tio̍h lō͘.

3Lâng in-ūi gû-gōng phò-hoāi ka-kī ê chiân-tô͘;

i ê sim tian-tò oàn-thàn Siōng Chú.

4Hó-gia̍h, pêng-iú chiū ke chin chōe;

sàn-chhiah, pêng-iú chiū lóng lī-khui.

5Choh gūi-chèng it-tēng siū hêng-hoa̍t;

kóng pe̍h-chha̍t bōe-tàng tô-thoat chek-hoa̍t.

6Ū-koân--ê, lâng-lâng kā i phô͘-tháⁿ;

khóng-khài--ê, lâng-lâng chòe i ê pêng-iú.

7Sàn-chhiah-lâng liân hiaⁿ-tī to iàm-ò͘ⁿ,

pêng-iú koh-khah ōe lī-khui i;

i jip beh kap lâng kóng-ōe, lâng m̄ chhap i.

8Ū tì-hūi chiah ōe-hiáu thiàⁿ-sioh ka-kī ê sìⁿ-miā;

tin-sioh tì-sek ōe tit-tio̍h hok-khì.

9Choh gūi-chèng it-tēng siū hêng-hoa̍t;

kóng pe̍h-chha̍t ōe bia̍t-bông.

10Gōng-lâng seng-oa̍h chhia-hoa bô ha̍h;

po̍k-jîn koán-hat chú-lâng koh-khah bô eng-kai.

11Lâng ū kiàn-sek chiū bōe khoài siū-khì;

bô tui-kiù lâng ê kè-sit sī ka-kī ê kong-êng.

12Ông ê siū-khì chhin-chhiūⁿ sai tōa-siaⁿ háu;

i ê un-hūi chhin-chhiūⁿ chháu-téng ê lō͘-chúi.

13Kiáⁿ gōng sī lāu-pē ê chai-hō;

bó͘ chháu-nāu chhin-chhiūⁿ hō͘-chúi chha̍p-chha̍p-tih.

14Chhù-the̍h châi-sán sī chó͘-kong só͘ lâu;

hiân-hūi ê bó͘ sī Siōng Chú só͘ sù.

15Pîn-tōaⁿ hō͘ lâng khùn tāng-bîn;

lán-si ê lâng ōe iau-gō.

16Chun-siú kài-bēng ōe pó-choân ka-kī ê sìⁿ-miā;

bô tì-ì Siōng Chú ê lō͘ ōe tì-kàu sí-bông.

17Chín-chè sàn-chhiah-lâng sī chioh hō͘ Siōng Chú,

Siōng Chú ōe chiàu i ê só͘-chòe hêng i.

18Thàn iáu ū ǹg-bāng, tio̍h koán-kàu ka-kī ê kiáⁿ,

m̄-kú m̄-thang kè-thâu soah kā i hāi-sí.

19Gâu hoat tōa siū-khì ê lâng it-tēng siū chhú-hoa̍t;

nā beh kiù i, it-tēng ke liáu-kang.

20Tio̍h thiaⁿ khó͘-khǹg siū kà-sī,

hō͘ lí kàu-bé ū tì-hūi.

21Lâng sim-lāi ū chin chōe kè-ōe,

chí-ū Siōng Chú ê chí-ì ōe si̍t-hiān.

22Tham-sim hō͘ lâng tì-kàu kiàn-siàu;

lêng-khó sàn-chhiah mā bô ài pe̍h-chha̍t.

23Kèng-ùi Siōng Chú ōe tit-tio̍h sìⁿ-miā;

i ōe an-ku-lo̍k-gia̍p, bōe tú-tio̍h chai-hō.

24Pîn-tōaⁿ ê lâng chhiú chhun kàu pôaⁿ--ni̍h,

mā m̄-khéng the̍h kàu chhùi.

25Phah chū-ko chū-tāi ê lâng, ōe hō͘ gōng-ti̍t ê lâng tit-tio̍h kà-sī;

chek-pī bêng-lí ê lâng, ōe hō͘ i tit-tio̍h tì-sek.

26Pháiⁿ khoán-thāi lāu-pē, kóaⁿ lāu-bú chhut--khì-ê,

chit-khoán kiáⁿ tòa-lâi kiàn-siàu, lâu chhàu-miâ.

27Góa ê kiáⁿ ah, lí nā bô kè-sio̍k thiaⁿ kà-sī,

ōe phian-lī tì-sek ê ōe.

28Choh gūi-chèng sī teh hì-lāng kong-pêng;

pháiⁿ-lâng ēng chōe-ok chòe pn̄g chia̍h.

29Hêng-hoa̍t sī ūi-tio̍h chū-ko chū-tāi ê lâng chún-pī;

piⁿ-phah sī ūi-tio̍h gōng-lâng ê ka-chiah-phiaⁿ an-pâi.

Chim-giân 19 - 現代台語譯本羅馬字版(TTVR)-闽南语

Learn More About Us