Iok-pek-kì 42

Iok-pek-kì 42 - 現代台語譯本羅馬字版(TTVR)-闽南语

1 Iok-pek ìn Siōng Chú kóng:

2Góa chai lí ta̍k-hāng lóng ōe;

lí ê kè-ōe bô lâng ōe-tàng chó͘-tòng.

3Lí mn̄g, “Sím-mi̍h-lâng ēng bû-ti ê ōe hō͘ góa ê chí-ì bū-bū bô-bêng?”

Góa khak-si̍t ū kóng ka-kī bô liáu-kái ê ōe,

chiah-ê tāi-chì chin kî-biāu, góa bô bêng-pe̍k.

4Chhiáⁿ lí thiaⁿ, góa beh kóng;

góa chhéng-būn lí, chhiáⁿ kā góa chí-sī.

5Góa chêng bat thiaⁿ-kìⁿ lí,

taⁿ góa chhin-ba̍k khòaⁿ-tio̍h lí.

6Só͘-í, góa iàm-ò͘ⁿ ka-kī,

chē tī tîn-ai kap hé-hu téng chhàm-hóe.

Kiat-bé

7Siōng Chú tùi Iok-pek kóng chiah-ê ōe liáu-āu, tùi Thê-bān-lâng Í-lī-hoat kóng, “Góa tùi lí kap lí nn̄g ê pêng-iú hoat siū-khì, in-ūi lín gī-lūn góa, bô chhin-chhiūⁿ góa ê po̍k-jîn Iok-pek só͘ kóng--ê hiah ha̍p-lí.

8Taⁿ lín tio̍h khan chhit chiah gû-káng, chhit chiah iûⁿ-káng, khì góa ê po̍k-jîn Iok-pek hia, ūi ka-kī hiàn sio-hòa-chè; góa ê po̍k-jîn Iok-pek ōe thòe lín kî-tó; góa ōe chiap-la̍p i, chiah bián góa chiàu lín ê gû-gōng tùi-thāi lín, in-ūi lín gī-lūn góa, bô chhin-chhiūⁿ góa ê po̍k-jîn Iok-pek só͘ kóng--ê hiah ha̍p-lí.”

9Án-ni, Thê-bān-lâng Í-lī-hoat, Su-a-lâng Pí-le̍k-ta̍t, Ná-má-lâng Só-hoat, chiàu Siōng Chú bēng-lēng in--ê khì chòe; Siōng Chú chiū chiap-la̍p Iok-pek ê kî-tó.

10 Iok-pek thòe i ê pêng-iú kî-tó liáu-āu, Siōng Chú hō͘ i hôe-ho̍k kè-khì ê hoân-êng, chiàu i í-chêng só͘-ū--ê têng-pē hō͘ i.

11Hit-sî i ê hiaⁿ-tī chí-bē, kap í-chêng se̍k-sāi ê lâng lóng lâi khòaⁿ i, tī i ê chhù chòe-hé lim-chia̍h. In ūi-tio̍h Siōng Chú só͘ kàng-lo̍h hō͘ i ê chai-hō pi-siong, koh kā i an-ùi; ta̍k-ê lâng sàng i chi̍t tè gûn, chi̍t ê kim-khoân.

12Án-ni, Siōng Chú sù-hok hō͘ Iok-pek, hō͘ i ê boán-kéng pí i khí-chho͘ khah hó; i ū iûⁿ chi̍t-bān sì-chheng, lo̍k-tô la̍k-chheng, gû chi̍t-chheng tùi, lû-bú chi̍t-chheng.

13I koh ū chhit ê kiáⁿ, saⁿ ê cha-bó͘-kiáⁿ.

14I kā tōa cha-bó͘-kiáⁿ hō-miâ kiò-chòe Iâ-bí-má, tē-jī ê kiò-chòe Ki-sé-a, tē-saⁿ ê kiò-chòe Ki-liân Hap-phok

15Choân-tōe chhē bô chhin-chhiūⁿ Iok-pek ê cha-bó͘-kiáⁿ hiah-ni̍h súi ê lú-chú. Iok-pek hō͘ chiah-ê cha-bó͘-kiáⁿ kap in ê hiaⁿ-tī pîⁿ-pîⁿ tit-tio̍h châi-sán.

16Āu-lâi Iok-pek koh chia̍h chi̍t-pah sì-cha̍p hè, khòaⁿ-tio̍h i ê kiáⁿ, i ê sun, kàu sì tāi.

17Chòe-āu, Iok-pek chia̍h tn̂g-hè-siū, nî-lāu chiah sí.

Iok-pek-kì 42 - 現代台語譯本羅馬字版(TTVR)-闽南语

Learn More About Us