Í-su-thiap-kì 7

Í-su-thiap-kì 7 - 現代台語譯本羅馬字版(TTVR)-闽南语

Hap-bān Siū Chhú-sí

1Ông kap Hap-bān lâi hù ông-hō͘ Í-su-thiap ê iàn-se̍k.

2Ông tī tē-jī ji̍t ê chiú-iàn koh mn̄g Í-su-thiap, kóng, “Ông-hō͘ Í-su-thiap, lí ài sím-mi̍h, góa ōe hō͘ lí; lí beh kiû sím-mi̍h, chiū-sī ông-kok ê chi̍t-pòaⁿ, góa mā beh hō͘ lí.”

3Ông-hō͘ Í-su-thiap ìn kóng, “Ông ah, góa nā tit-tio̍h ông ê un-hūi, ông nā khòaⁿ-chòe hó, goān lí ún-chún góa ê chhéng-kiû, kiù góa ê sìⁿ-miā, kiù góa ê chong-cho̍k;

4in-ūi góa kap góa ê tông-pau siū chhut-bōe, lâng beh kā goán châu-bia̍t, kā goán thâi-sí, hō͘ goán oân-choân bia̍t-bông. Goán nā kan-ta hō͘ lâng bōe chòe lô͘-lē, góa mā bô-ōe-kóng; in-ūi goán ê chai-lān bōe chō-sêng ông jōa tōa ê sún-sit. M̄-kú goán beh hō͘ lâng siau-bia̍t lah!”

5 A-hap-sûi-ló͘-ông mn̄g ông-hō͘ Í-su-thiap, “Siáⁿ-lâng káⁿ chòe chit-khoán tāi-chì? Hit-ê lâng tī tó-ūi?”

6 Í-su-thiap ìn kóng, “Pek-hāi goán ê tùi-te̍k chiū-sī chit-ê pháiⁿ-lâng Hap-bān.”

Hap-bān tī ông kap ông-hō͘ ê bīn-chêng kiaⁿ kah phi̍h-phi̍h-chhoah.

7Ông hui-siông siū-khì, lī-khui chiú-iàn, ji̍p-khì ông-kiong ê hoe-hn̂g. Hap-bān khòaⁿ ōe chhut ông koat-tēng beh hō͘ i sí, chiū lâu--teh, kiû ông-hō͘ Í-su-thiap kiù i chi̍t miā.

8Ông tùi ông-kiong ê hoe-hn̂g tò-tńg-lâi chiú-iàn ê só͘-chāi, khòaⁿ-tio̍h Hap-bān phak tī Í-su-thiap ê the-í; ông kóng, “I kèng-jiân káⁿ tī kiong-lāi, tī góa ê bīn-chêng, lêng-jio̍k ông-hō͘!” Ông kóng-liáu, lâng chiū khàm Hap-bān ê bīn.

9Sū-hāu ông ê thài-kàm Hap-pho-ná kóng, “Hap-bān tī in tau chhāi chi̍t ê jī-cha̍p-jī kong-chhioh koân ê chhâ-kè, beh chiong kiù ông iú-kong ê Boa̍t-tí-kái tiàu-sí.”

Ông chiū kóng, “Kā Hap-bān tiàu tī hit téng-bīn.”

10Lâng chiū chiong Hap-bān tiàu tī i beh tiàu Boa̍t-tí-kái ê chhâ-kè téng. Ông ê siū-khì chiah soah.

Í-su-thiap-kì 7 - 現代台語譯本羅馬字版(TTVR)-闽南语

Learn More About Us