Sū-su-kì 14

Sū-su-kì 14 - 現代台語譯本羅馬字版(TTVR)-闽南语

Chham-sun kap Têng-ná ê Lú-chú

1 Chham-sun lo̍h-khì Têng-ná, tī hia khòaⁿ-tio̍h chi̍t ê lú-chú, sī Hui-lī-sū ê cha-bó͘ gín-á.

2Chham-sun tò-khì kā in lāu-pē lāu-bú kóng, “Góa tī Têng-ná khòaⁿ-tio̍h chi̍t ê lú-chú, sī Hui-lī-sū ê cha-bó͘ gín-á; chhiáⁿ hō͘ góa chhōa i choh-bó͘.”

3I ê pē-bú kā i kóng, “Tī lán ê chong-cho̍k kap tông-pau ê tiong-kan, kiám bô cha-bó͘ gín-á? Lí ná beh chhōa bô siū kat-lé ê Hui-lī-sū-lâng ê cha-bó͘ gín-á?”

Chham-sun kā i ê lāu-pē kóng, “Góa kah-ì i, góa beh chhōa i.”

4I ê pē-bú m̄ chai chit-ê tāi-chì chhut tī Siōng Chú, in-ūi Siōng Chú chhē ki-hōe beh kong-kek Hui-lī-sū-lâng. Hit-sî, Hui-lī-sū-lâng koán-hat Í-sek-lia̍t-lâng.

5Chham-sun kap i ê pē-bú lo̍h-khì Têng-ná.

Chham-sun kàu Têng-ná ê phû-tô-hn̂g ê sî, hut-jiân tú-tio̍h chi̍t chiah siàu-chòng ê sai tùi i tōa-siaⁿ háu.

6Siōng Chú ê sîn tōa-tōa chhiong-móa Chham-sun; i khang-chhiú kā sai thiah-li̍h, chhin-chhiūⁿ teh thiah-li̍h soaⁿ-iûⁿ-á. Chit-hāng tāi-chì Chham-sun bô kā i ê pē-bú kóng.

7 Chham-sun lo̍h-khì kap hit-ê lú-chú kóng-ōe, chin kah-ì i.

8Kè chi̍t tōaⁿ sî-kan, i tò-khì beh chhōa hit-ê lú-chú chòe bó͘; i oat tùi lō͘-piⁿ beh khòaⁿ hit-chiah i phah-sí ê sai, khòaⁿ-tio̍h ū chi̍t siū phang kap bi̍t tī sai ê sin-si lāi-bīn.

9I óe bi̍t hē tī chhiú--ni̍h, ná kiâⁿ ná chia̍h; lâi kàu i ê pē-bú hia, pun hō͘ in chia̍h, m̄-kú bô kā in kóng bi̍t sī tùi sai ê sin-si óe--lâi-ê.

10I ê lāu-pē lo̍h-khì hit-ê lú-chú hia. Chham-sun chiàu hit só͘-chāi choh sin-lông ê koàn-lē, tī hia pān-toh chhiáⁿ lâng-kheh.

11Hui-lī-sū-lâng khòaⁿ-tio̍h Chham-sun lâi, chiū chhōa saⁿ-cha̍p ê lâng lâi pôe-phōaⁿ i.

12Chham-sun kā in kóng, “Góa hiān-chāi beh chhut chi̍t ê bī-chhai hō͘ lín; lín tī iàn-se̍k ê chhit ji̍t lāi nā chhai ōe chhut, góa chiū beh hō͘ lín saⁿ-cha̍p niá iù-môa-pò͘ ê lāi-saⁿ, saⁿ-cha̍p thò lé-ho̍k;

13lín nā ioh bōe chhut--lâi, lín tio̍h hō͘ góa saⁿ-cha̍p niá iù-môa-pò͘ ê lāi-saⁿ, saⁿ-cha̍p thò lé-ho̍k.”

In kóng, “Chhiáⁿ kóng lí ê bī-chhai hō͘ goán ioh.”

14 Chham-sun chiū kóng,

“Chia̍h-mi̍h tùi thun-chia̍h--ê chhut;

tiⁿ-mi̍h tùi kiông-béng--ê chhut.”

In saⁿ ji̍t kú ioh bōe chhut.

15Kàu tē-sì ji̍t, in kā Chham-sun ê bó͘ kóng, “Lí tio̍h kā lí ê tiōng-hu làu-ōe, hō͘ goán chai bī-chhai ê ì-sù; nā bô, goán beh pàng-hé sio lí kap lín lāu-pē ê chhù. Lín chhiáⁿ goán lâi, sī beh chhiúⁿ goán sī--bô?”

16 Chham-sun ê bó͘ phak tī i ê keng-thâu téng thî-khàu kóng, “Lí sī oàn-hūn góa, m̄-sī thiàⁿ góa; in-ūi lí chhut bī-chhai hō͘ goán pún-cho̍k ê lâng, khiok bô kā góa kóng tap-àn.”

I ìn kóng, “Góa liân pē-bú to bô kā in kóng, ná thang kā lí kóng?”

17Chham-sun ê bó͘ tī i ê bīn-chêng thî-thî-khàu-khàu kàu iàn-se̍k ê tē-chhit ji̍t, Chham-sun bōe-kham-tit i pek, chiū kā i kóng; i ê bó͘ chiū chiong tap-àn kā i pún-cho̍k ê lâng kóng.

18Kàu tē-chhit ji̍t, ji̍t lo̍h í-chêng, siâⁿ-lāi ê lâng lâi kā Chham-sun kóng,

“Ū sím-mi̍h pí bi̍t khah tiⁿ?

Ū sím-mi̍h pí sai khah kiông?”

Chham-sun kā in hôe-tap kóng,

“Nā bô ēng góa ê sòe-chiah gû-bú lôe-chhân,

lín choa̍t-tùi ioh bōe chhut tap-àn.”

19Siōng Chú ê sîn tōa-tōa chhiong-móa Chham-sun, i chiū lo̍h-khì A-si̍t-ki-lûn, thâi-sí saⁿ-cha̍p lâng, chhiúⁿ in ê saⁿ, the̍h hō͘ ioh-tio̍h bī-chhai ê lâng. Chham-sun khì-phut-phut, tò-khì in lāu-pē hia.

20Chham-sun ê bó͘ soah kè hō͘ i ê phōaⁿ-chhōa--ê tiong-kan ê chi̍t ê.

Sū-su-kì 14 - 現代台語譯本羅馬字版(TTVR)-闽南语

Learn More About Us