Si-phian 38

Si-phian 38 - 現代台語譯本羅馬字版(TTVR)-闽南语

Tāi-pi̍t kì-liām ê si.Siū-khó͘ ê Lâng ê Kî-tó

1Siōng Chú ah, kiû lí m̄-thang siū-khì chek-pī góa,

m̄-thang hoat tōa siū-khì chek-hoa̍t góa.

2Lí ê chìⁿ siā-ji̍p góa ê seng-khu;

lí ê chhiú tāng-tāng chhi̍h góa.

3Lí ê siū-khì hō͘ góa ê seng-khu bô chi̍t ūi kiān-choân;

góa ê chōe-kò hō͘ góa ê kut-thâu bô chi̍t ki hó-hó.

4Góa ê chōe-kò thia̍p--khí-lâi, chhiau-kè góa ê thâu-khak,

chhin-chhiūⁿ tāng-tàⁿ hō͘ góa taⁿ bōe khí.

5Góa in-ūi gû-gōng,

tì-kàu khang-chhùi nōa koh chhàu.

6Góa hō͘ chōe teh kah beh phih--lo̍h-khì,

kui-ji̍t kiâⁿ-lâi-kiâⁿ-khì haiⁿ-haiⁿ-chhan.

7Góa ê io chhin-chhiūⁿ hé teh to̍h;

góa ê seng-khu bô kah chi̍t ūi kiān-choân.

8Góa siū teh-siong, kui seng-khu bâ-pì;

góa ê sim khó͘-thàng, tōa-siaⁿ ai-chhan.

9Chú ah, góa ê sim-goān lí lóng chai;

góa ê thó͘-khùi mā bô tùi lí am-khàm.

10Góa ê sim pho̍k-pho̍k-chhéng, khùi-la̍t soe-bî,

liân góa ê ba̍k-chiu to lóng bô-sîn.

11Góa ê pêng-iú tâng-phōaⁿ in-ūi góa ê pháiⁿ chèng-thâu lóng siám khui;

góa ê chhin-lâng mā khiā-hn̄g-hn̄g.

12Siàu-siūⁿ góa sìⁿ-miā ê lâng siat lô-bāng;

beh hāi góa ê lâng kóng ok-to̍k ê ōe,

kui-ji̍t teh siat-kè khúi-khiat ê im-bô͘.

13Góa chhin-chhiūⁿ chhàu-hī-lâng bōe thiaⁿ--kìⁿ,

chhin-chhiūⁿ é-káu bōe kóng-ōe.

14Góa chhin-chhiūⁿ bô thiaⁿ--kìⁿ ê lâng,

ū chhùi mā bōe-tàng tap-piān.

15Siōng Chú ah, góa gióng-bōng lí;

Chú — góa ê Siōng-tè ah, lí beh ìn-tap góa.

16Góa bat kóng, “Kiû lí m̄-thang hō͘ in tùi góa khoa-kháu;

góa ê kha ta̍h-thu̍t ê sî, m̄-thang hō͘ in tùi góa khoa-iāu.”

17In-ūi góa hiám-hiám-á poa̍h-tó;

góa ê khó͘-thàng put-sî tîⁿ-tè góa.

18Góa beh jīn góa ê chōe-ok,

ūi-tio̍h góa ê chōe iu-būn.

19Góa ê tùi-te̍k kiông koh ióng;

bô-iân-bô-kò͘ oàn-hūn góa ê lâng ke-thiⁿ chin chōe.

20Ēng pháiⁿ pò hó ê lâng kap góa chòe tùi-thâu;

in-ūi góa tui-kiû liông-siān.

21Siōng Chú ah, m̄-thang pàng-sak góa;

góa ê Siōng-tè ah, m̄-thang lī-khui góa hn̄g-hn̄g.

22Chú — góa ê Kiù-chú ah,

kín lâi kiù góa!

Si-phian 38 - 現代台語譯本羅馬字版(TTVR)-闽南语

Learn More About Us