Bí-ka-su 7

Bí-ka-su 7 - 現代台語譯本羅馬字版(TTVR)-闽南语

Í-sek-lia̍t-lâng ê Hú-pāi

1Góa chhám ah! Góa chhin-chhiūⁿ chi̍t ê lâng,

joa̍h-thiⁿ ê ké-chí siu-sêng liáu,

phû-tô lóng bán-liáu,

chhē bô kui-pha ê phû-tô thang chia̍h,

liân só͘ ài thâu-chúi ê bû-hoa-kó mā chhē bô.

2Tōe-chiūⁿ tiong-si̍t ê lâng lóng siau-sit,

sè-kan bô chèng-ti̍t ê lâng;

só͘-ū ê lâng bâi-ho̍k beh thâi-lâng,

ta̍k-ê ēng lô-bāng tng i ê tông-pau.

3In ê chhiú choan chòe pháiⁿ-tāi,

tāi-sîn kap sím-phòaⁿ-koaⁿ thó hóe-lō͘,

koaⁿ-oân kong-jiân iau-kiû in só͘ ài--ê;

in hō͘-siōng kau-kiat, kè-bô͘ chòe pháiⁿ.

4In tiong-kan siōng-hó--ê, put-kò chhin-chhiūⁿ chhì-phè;

siōng chèng-ti̍t--ê chhin-chhiūⁿ chhì-á lî-pa.

Lí ê siú-bōng-chiá só͘ kéng-kò sím-phòaⁿ ê ji̍t kàu lah,

hūn-loān ê ji̍t kūn lah.

5M̄-thang sìn-jīm chhù-piⁿ, mā m̄-thang óa-khò pêng-iú;

sīm-chì tùi chhin-bi̍t ê bó͘ kóng-ōe mā tio̍h sió-sim.

6Kiáⁿ biáu-sī lāu-pē,

cha-bó͘-kiáⁿ kap lāu-bú choh-tùi,

sin-pū ngó͘-ge̍k ta-ke;

lâng ê tùi-te̍k sī ka-kī ke-lāi ê lâng.

7M̄-kú góa, góa beh gióng-bōng Siōng Chú,

beh thèng-hāu Siōng-tè — góa ê Kiù-chú;

góa ê Siōng-tè ōe thiaⁿ góa ê kî-tó.

Siōng Chú Chín-kiù I ê Chú-bîn

8Góa ê tùi-te̍k ah, bián ūi-tio̍h góa ê cho-gū hoaⁿ-hí;

góa sui-jiân poa̍h-tó, mā ōe koh khí--lâi;

góa chē tī o͘-àm tiong, Siōng Chú chòe góa ê kng.

9Góa tio̍h jím-siū Siōng Chú ê siū-khì,

in-ūi góa ū tek-chōe I.

Góa beh thèng-hāu I ūi-tio̍h góa ê àn-kiāⁿ piān-hō͘,

ūi góa chú-chhî kong-tō.

I ōe chhōa góa chìn-ji̍p kng-bêng,

hō͘ góa khòaⁿ-tio̍h I ê kong-gī.

10Hit-sî góa ê tùi-te̍k khòaⁿ--kìⁿ, it-tēng chin kiàn-siàu;

in bat thí-chhiò góa kóng, “Siōng Chú — lí ê Siōng-tè tī tó-ūi?”

Góa ōe chhin-ba̍k khòaⁿ-kìⁿ tùi-te̍k chhin-chhiūⁿ koe-lō͘ ê thô͘-bê siū thún-ta̍h.

11 Iâ-lō͘-sat-léng ê chū-bîn ah, tiông-kiàn siâⁿ-chhiûⁿ ê ji̍t kàu lah;

hit-ji̍t, lín ōe khok-tián lín ê léng-thó͘.

12Hit-ji̍t, lín ê tông-pau beh tò-tńg--lâi,

tùi A-su̍t kàu Ai-ki̍p,

tùi Ai-ki̍p kàu Iù-hoat-la-tí-hô,

tùi chit-ê hái kàu hit-ê hái,

tùi chit-ê soaⁿ kàu hit-ê soaⁿ,

in lóng beh tò-tńg--lâi.

13M̄-kú chit-ê tōe,

ōe in-ūi chū-bîn ê pháiⁿ hêng-ûi pìⁿ-chòe hong-hòe.

Siōng Chú Lîn-bín I ê Chú-bîn

14Siōng Chú ah, kiû lí ēng lí ê koáiⁿ bo̍k-ióng lí ka-kī ê chú-bîn,

chiū-sī lí ê iûⁿ-kûn, lí ê sán-gia̍p,

hō͘ in tiàm tī ū chhiⁿ-chhùi chháu-tiûⁿ pau-ûi ê chhiū-nâ lāi, bô siū kiáu-chhá,

chhin-chhiūⁿ kó͘-chá tī Pa-san kap Ki-lia̍t án-ni kā in bo̍k-ióng.

15Siōng Chú kóng,

“Góa beh chhin-chhiūⁿ chhōa lín chhut Ai-ki̍p ê ji̍t án-ni,

hián-chhut kî-biāu ê sîn-jiah hō͘ lín khòaⁿ--kìⁿ.”

16Lia̍t-pang khòaⁿ--kìⁿ, ōe in-ūi ka-kī ê khùi-la̍t kiàn-siàu,

ēng chhiú ng-chhùi, hī-khang that--teh.

17In ōe chhin-chhiūⁿ chôa chī thô͘-hún,

chhin-chhiūⁿ teh sô ê tōng-bu̍t

ngia̍uh-ngia̍uh-chhoah tùi bih ê khang chhut--lâi.

In ōe kiaⁿ-kiaⁿ-hiâⁿ-hiâⁿ kui-ǹg Siōng Chú — lán ê Siōng-tè.

18Siōng-tè ah, kiám ū pa̍t-ê sîn-bêng ōe-tàng kap lí pí?

Lí sià-bián chōe-kò,

khoan-sià só͘ chhun ê chú-bîn hoān ê kè-sit.

Lí bô éng-oán khǹg siū-khì,

hoán-tńg ì-ài lîn-bín.

19Lí ōe koh chi̍t piàn lîn-bín goán,

chiong goán ê chōe ta̍h tī kha-tóe,

chiong it-chhè ê chōe-kò hiat-lo̍h chhim-hái.

20Lí it-tēng chiàu lí kó͘-chá tùi goán lia̍t-chó͘ li̍p-sè ê èng-ún,

ēng sìn-si̍t tùi-thāi Ngá-kok,

si-lo̍h chû-ài hō͘ A-pek-la-hán.

Bí-ka-su 7 - 現代台語譯本羅馬字版(TTVR)-闽南语

Learn More About Us