Bîn-sò͘-kì 21

Bîn-sò͘-kì 21 - 現代台語譯本羅馬字版(TTVR)-闽南语

Thâi-iâⁿ Ka-lâm-lâng

1Tòa tī Nî-kek-hu ê Ka-lâm-lâng A-la-tek-ông, thiaⁿ-kìⁿ Í-sek-lia̍t-lâng tùi A-tha-lîm ê lō͘ lâi, chiū kap Í-sek-lia̍t-lâng kau-chiàn, lia̍h in kúi-nā ê lâng.

2Í-sek-lia̍t-lâng tùi Siōng Chú hē-goān kóng, “Lí nā chin-chiàⁿ hō͘ goán thâi-iâⁿ chiah-ê jîn-bîn, goán chiū beh chiong in ê siâⁿ oân-choân húi-bia̍t.”

3Siōng Chú thiaⁿ Í-sek-lia̍t-lâng ê khún-kiû, chiong Ka-lâm-lâng kau tī in ê chhiú, in chiū chiong Ka-lâm-lâng kap in ê siâⁿ thiat-tóe siau-bia̍t; hit-ê só͘-chāi chiū kiò-chòe Hô-ní-má

Tâng Chù ê Chôa

4 Í-sek-lia̍t-lâng tùi Hô-ní-soaⁿ chhut-hoat, se̍h-kè Í-tong ê tōe, ǹg Âng-hái ê lō͘ kiâⁿ; tī lō͘--ni̍h, in ê sim chin hoân,

5chiū bâi-oàn Siōng-tè kap Mô͘-se, kóng, “Lín sī-án-chóaⁿ chhōa goán chhut Ai-ki̍p, hō͘ goán lâi sí tī chit-ê khòng-iá? Chia bô chia̍h-mi̍h, bô chúi, goán mā bô ài koh chia̍h chit-ê pe̍h-chiáⁿ-bô-bī ê mi̍h-kiāⁿ.”

6Siōng Chú chiū phài hé-chôa ji̍p-khì jîn-bîn ê tiong-kan, kā in; Í-sek-lia̍t-lâng sí chin chōe.

7Jîn-bîn chiū khì kā Mô͘-se kóng, “Goán ū hoān-chōe, in-ūi goán kóng-ōe kong-kek Siōng Chú kap lí; chhiáⁿ lí kiû Siōng Chú kā chiah-ê chôa kóaⁿ lī-khui goán.” Mô͘-se chiū ūi jîn-bîn kî-kiû.

8Siōng Chú tùi Mô͘-se kóng, “Lí chù chi̍t bé chôa, tiàu tī kî-koaⁿ téng; só͘-ū hō͘ chôa kā--tio̍h-ê, chi̍t-ē khòaⁿ chiū ōe oa̍h.”

9Mô͘-se chiū chù chi̍t bé tâng-chôa, tiàu tī kî-koaⁿ téng; só͘-ū hō͘ chôa kā--tio̍h-ê, chi̍t-ē khòaⁿ chit-bé tâng-chôa, chiū oa̍h.

Tùi Hô-ní-soaⁿ Kàu Mô͘-ap Khoe-kok

10 Í-sek-lia̍t-lâng chhut-hoat, chat-iâⁿ tī O-pek.

11Koh tùi O-pek chhut-hoat, chat-iâⁿ tī Mô͘-ap tang-pêng khòng-iá lāi-bīn ê Í-iâ A-pa-lîm.

12Tùi hia chhut-hoat, chat-iâⁿ tī Sat-lia̍t ê khoe-kok.

13Tùi hia chhut-hoat, chat-iâⁿ tī Mô͘-ap kap A-mô͘-lī ê kau-kài, sio̍k A-mô͘-lī ê A-lūn khoe-kok hit-pêng hōaⁿ, óa-kūn A-mô͘-lī ê khòng-iá.

14Só͘-í, Siōng Chú ê Chiàn-kì án-ni kì-chài:

So͘-hoat ê Oa-hap-pek,

A-lūn hiah-ê khoe-kok,

15í-ki̍p hiah-ê khoe-kok ê kiā, it-ti̍t kàu A-ní tōe-khu,

óa-kūn Mô͘-ap ê pian-kài.

16 Í-sek-lia̍t-lâng tùi hia khì Pí-ní

; Siōng Chú bat tùi Mô͘-se kóng “Lí chū-chi̍p jîn-bîn, góa beh chúi hō͘ in”, só͘ kóng--ê chiū-sī chit-kháu chíⁿ.

17Hit-sî Í-sek-lia̍t-lâng chhiùⁿ-koa kóng:

Chíⁿ ah, chhèng chúi chhut--lâi!

Lán tio̍h tùi i chhiùⁿ-koa!

18Che sī kùi-cho̍k ēng chàu-pán khui--ê,

sī bîn-kan ê léng-siù ēng koáiⁿ-á ku̍t--ê.

In tùi khòng-iá khì Má-tha-ná,

19koh tùi Má-tha-ná khì Ná-hap-lia̍t, tùi Ná-hap-lia̍t khì Pa-boa̍t,

20tùi Pa-boa̍t kàu Mô͘-ap tōe-khu ê soaⁿ-kok; tùi chia khòaⁿ--lo̍h-khì, ōe-tàng khòaⁿ-tio̍h khòng-iá ê Pí-su-ka-soaⁿ ê soaⁿ-chiam.

Thâi-iâⁿ A-mô͘-lī-ông kap Pa-san-ông(Sin 2.26-3.11)

21 Í-sek-lia̍t-lâng phài sù-chiá khì kìⁿ A-mô͘-lī-lâng ê ông Se-hông, kóng,

22“Chhiáⁿ ún-chún goán keng-kè lí ê tōe. Goán bōe oat ji̍p-khì chhân-hn̂g kap phû-tô-hn̂g, mā bōe lim chíⁿ-chúi; chí-ū kiâⁿ tōa-lō͘, it-ti̍t kàu kè lí ê pian-kài.”

23Se-hông m̄-chún Í-sek-lia̍t-lâng keng-kè i ê tōe, chiū chū-chi̍p i ê jîn-bîn chhut-lâi khòng-iá, beh kong-kek Í-sek-lia̍t-lâng; tī Ngá-cha̍p kap Í-sek-lia̍t-lâng kau-chiàn.

24Í-sek-lia̍t-lâng ēng to thâi in, chiàm A-lūn-hô kap Ngá-phok-hô tiong-kan ê tōe, ti̍t-ti̍t kàu A-bûn-lâng hia; in-ūi A-bûn-lâng ê pian-kài hông-siú giâm-bi̍t.

25Í-sek-lia̍t-lâng chiàm-léng A-mô͘-lī-lâng só͘-ū ê siâⁿ, pau-koat Hi-si̍t-pún kap chiu-ûi ê chng-siā.

26Hi-si̍t-pún sī A-mô͘-lī-ông Se-hông ê siâⁿ; Se-hông bat kong-táⁿ í-chêng ê Mô͘-ap-ông, chiàm-léng i só͘-ū ê thó͘-tōe, ti̍t-kàu A-lūn-hô.

27Só͘-í si-jîn liām-si, kóng:

Tio̍h lâi Hi-si̍t-pún;

goān Se-hông ê siâⁿ tiông-kiàn koh kian-kò͘.

28Ū hé tùi Hi-si̍t-pún hoat,

ū hé-iām tùi Se-hông ê siâⁿ chhut,

sio-húi Mô͘-ap ê A-ní,

sio-bia̍t A-lūn-hô ê soaⁿ-thâu-tôaⁿ.

29 Mô͘-ap ah, lí ū chai-hō lah!

Pài Ki-boat sîn-bêng ê lâng ah, lín bia̍t-bông lah!

Ki-boat hāi i ê ta-po͘-lâng tô-bông,

hāi i ê cha-bó͘-lâng hō͘ A-mô͘-lī-ông Se-hông lia̍h--khì.

30Goán tùi Hi-si̍t-pún kàu Tí-pún kā in oân-choân siau-bia̍t;

goán hō͘ tōe hong-hòe, ti̍t-kàu Lô-hoat,

koh kàu Bí-tí-pa.

31Án-ni, Í-sek-lia̍t-lâng chiū tòa tī A-mô͘-lī-lâng ê tōe.

32Mô͘-se phài lâng khì thàm-cha Ngá-siā; in chiàm hiah-ê chng-siā, chiong hiah-ê A-mô͘-lī-lâng kóaⁿ-cháu.

33 Í-sek-lia̍t-lâng chiū oat tùi ǹg Pa-san ê hong-hiòng khì; Pa-san-ông Go̍k kap i ê kun-peng chhut-lâi tī Í-tek-lâi kap in kau-chiàn.

34Siōng Chú tùi Mô͘-se kóng, “M̄-bián kiaⁿ i, in-ūi góa í-keng chiong i kap i ê kun-peng, í-ki̍p i ê thó͘-tōe lóng kau tī lí ê chhiú; lí tio̍h chhin-chhiūⁿ tùi-hù tòa tī Hi-si̍t-pún ê A-mô͘-lī-ông Se-hông án-ni tùi-hù i.”

35Í-sek-lia̍t-lâng chiū thâi-sí Go̍k kap i ê kiáⁿ-jî, í-ki̍p i ê jîn-bîn, liân chi̍t ê to bô lâu--teh, koh chiàm-léng i ê tōe.

Bîn-sò͘-kì 21 - 現代台語譯本羅馬字版(TTVR)-闽南语

Learn More About Us