Ai-ko 1

Ai-ko 1 - 現代台語譯本羅馬字版(TTVR)-闽南语

Iâ-lō͘-sat-léng ê Pi-siong

1Ài ah! Chit-ê chá-chêng lâng-khoeh-lâng ê siâⁿ-chhī,

hiān-chāi kèng-jiân pha-hng.

Chá-chêng tī lia̍t-kok siū kèng-tiōng--ê,

hiān-chāi kèng-jiân chhin-chhiūⁿ kóaⁿ-hū.

Chá-chêng tī ta̍k siâⁿ-chhī chòe ông-hō͘--ê,

hiān-chāi kèng-jiân lo̍k-phek kah chòe lô͘-lē.

2I kui-mî ai-khàu, móa-bīn ba̍k-sái.

Chá-chêng ê ài-jîn,

hiān-chāi bô chi̍t ê lâi an-ùi.

I ê pêng-iú chhut-bōe i,

pìⁿ-chòe i ê tùi-te̍k.

3 Iû-tāi liû-bông tī gōa-pang,

siū khó͘, chòe khó͘-kang.

In tòa tī lia̍t-kok,

bōe-tàng an-jiân khiā-khí;

in siū ûi-khùn,

bô lō͘ tô-thoat.

4Thàng kàu Sek-an ê tōa-lō͘ ai-siong,

in-ūi bô lâng lâi kè-choeh;

só͘-ū ê siâⁿ-mn̂g hong-hòe,

chè-si ai-thàn,

siàu-lú pi-siong;

Sek-an ut-chut thòng-khó͘.

5I ê tùi-te̍k pìⁿ-chòe chú-lâng;

i ê siû-jîn hoân-êng sáng-sè.

In-ūi i chi̍t-piàn koh chi̍t-piàn pōe-poān,

Siōng Chú hō͘ i siū-khó͘;

i ê gín-á hō͘ tùi-te̍k lia̍h--khì.

6 Sek-an ê êng-hôa í-keng siau-sit.

I ê léng-siù chhin-chhiūⁿ chhē bô chháu-tiûⁿ ê lo̍k;

in siám-pī tui-jip in ê lâng,

m̄-kú bô-la̍t thang cháu.

7 Iâ-lō͘-sat-léng khùn-khó͘ liû-lōng ê sî,

hôe-sióng i chá-chêng ê êng-hôa.

I ê chū-bîn lo̍h tī tùi-te̍k ê chhiú-thâu,

bô lâng kiù-chō͘ i.

Tùi-te̍k khòaⁿ-kìⁿ i lûn-hām,

hong-chhì thí-chhiò i.

8 Iâ-lō͘-sat-léng hoān tōa-chōe,

chiâⁿ-chòe lâng ê chhiò-pìⁿ.

Chá-chêng chun-tiōng i ê lâng,

khòaⁿ i hiān-chāi chhiah-sin-lō͘-thé, chiū biáu-sī i.

I ka-kī ai-thàn,

kiàn-siàu cháu-khì bih.

9I ê ù-òe kō-tio̍h i ê kûn;

i m̄-bat siūⁿ-tio̍h ka-kī ê kiat-kio̍k.

I ê tūi-lo̍h hō͘ lâng tio̍h-kiaⁿ;

bô lâng an-ùi i.

Siōng Chú ah, kiû lí khòaⁿ góa ê khó͘-lān,

in-ūi góa ê tùi-te̍k teh tùi góa chhàng-chhiu.

10Tùi-te̍k chhun-chhiú chhiúⁿ-toa̍t i choân-pō͘ ê châi-pó;

i khòaⁿ-tio̍h gōa-cho̍k-lâng chhim-ji̍p sèng-tiān,

chiū-sī Siōng Chú kìm-chí in ji̍p--khì ê só͘-chāi.

11Jîn-bîn ai-thàn thó͘-khùi, sì-kòe chhē-chia̍h,

ūi-tio̍h kiù sìⁿ-miā, the̍h châi-pó ōaⁿ chia̍h-mi̍h.

Siōng Chú ah, kiû lí àⁿ-lo̍h khòaⁿ,

khòaⁿ góa pìⁿ-chòe chiah-ni̍h pi-chhám!

12Lín chiah-ê kè-lō͘-lâng, lín kiám lóng bô iàu-kín?

Lín sì-bīn koan-chhat,

kiám ū lâng chhin-chhiūⁿ góa án-ni siū khó͘-chhó͘?

Che sī Siōng Chú tōa siū-khì ê sî hō͘ góa sêng-siū ê thòng-khó͘.

13I tùi téng-bīn kàng-hé

tī góa ê kut-thâu lāi-bīn teh sio.

I siat lô-bāng tîⁿ góa ê kha,

hō͘ góa poa̍h-tó thè-āu.

I pàng góa ko͘-toaⁿ,

hō͘ góa kui-ji̍t pi-chhám.

14I chiong góa chōe-kò ê taⁿ

pa̍k tī góa ê ām-kún,

hō͘ góa cheng-le̍k ta--khì.

Chú chiong góa kau tī góa bô-la̍t tùi-khòng ê tùi-te̍k chhiú-tiong.

15Chú khì-sak góa só͘-ū ê ióng-sū;

I tiàu-chi̍p tāi-kun kong-kek góa,

teh-chhùi góa ê siàu-liân-lâng.

Chú thún-ta̍h góa ê jîn-bîn,

chhin-chhiūⁿ tī chiú-khut ta̍h phû-tô kâng-khoán.

16Góa ūi-tio̍h chiah-ê sū thî-khàu,

góa ê ba̍k-sái ti̍t-ti̍t lâu.

Bô lâng tī sin-piⁿ an-ùi góa;

bô lâng hō͘ góa koh-chài tit-tio̍h khùi-la̍t.

Góa ê jîn-bîn ko͘-khó͘-bû-chō͘,

in-ūi góa ê tùi-te̍k thâi-iâⁿ góa.

17 Sek-an chhun siang-chhiú kî-kiû,

m̄-kú bô lâng an-ùi i.

Kóng-tio̍h Ngá-kok, Siōng Chú í-keng hā-lēng,

hō͘ sì-chiu-ûi ê lâng chiâⁿ-chòe i ê tùi-te̍k;

in chiong Iâ-lō͘-sat-léng khòaⁿ-chòe ù-òe ê mi̍h.

18Siōng Chú kong-gī,

m̄-kú góa ûi-pōe I ê bēng-lēng.

Bān-kok ê jîn-bîn, chhiáⁿ thiaⁿ,

chhiáⁿ khòaⁿ góa só͘ siū ê thòng-khó͘:

Góa ê siàu-lú, góa ê chheng-liân lóng siū lia̍h--khì!

19Góa kā pêng-iú kiû oān-chō͘,

m̄-kú in khi-phiàn góa.

Góa ê chè-si kap tiúⁿ-ló chhē-chia̍h beh kiù sìⁿ-miā,

soah tn̄g-khùi sí tī siâⁿ-lāi.

20Siōng Chú, lí khòaⁿ leh,

góa chiah-ni̍h put-hēng thòng-khó͘!

Góa ê tn̂g-á ká-kún,

góa ê sim-koaⁿ kiat kui-kiû,

in-ūi góa tōa-tōa pōe-ge̍k.

Tī koe-lō͘ ū hiong-sat,

tī chhù-lāi ū sí-bông.

21Lâng thiaⁿ-tio̍h góa haiⁿ-haiⁿ-chhan,

m̄-kú bô lâng an-ùi góa.

Tùi-te̍k thiaⁿ-kìⁿ góa tú--tio̍h ê chai-hō,

lóng in-ūi lí hêng-hoa̍t góa lâi hoaⁿ-hí.

Goān lí soan-kò ê ji̍t-chí lâi kàu,

hō͘ tùi-te̍k kap góa siâng-khoán siū khó͘-lān.

22Goān lí khòaⁿ-kìⁿ in só͘-chòe ê siâ-ok,

kā in hêng-hoa̍t,

chhin-chhiūⁿ lí in-ūi góa ê chōe-kò hêng-hoa̍t góa siâng-khoán.

Góa in-ūi ai-thàn bô-soah,

góa ê sim-sîn soe-lám.

Ai-ko 1 - 現代台語譯本羅馬字版(TTVR)-闽南语

Learn More About Us