Sat-ka-lī-a-su 6

Sat-ka-lī-a-su 6 - 現代台語譯本羅馬字版(TTVR)-闽南语

Chiàn-chhia ê Īⁿ-siōng

1Góa koh gia̍h-thâu khòaⁿ, khòaⁿ-kìⁿ ū sì tâi chiàn-chhia tùi nn̄g chō tâng-soaⁿ ê tiong-kan chhut--lâi.

2Thâu chi̍t tâi sī âng-bé teh thoa, tē-jī tâi o͘-bé,

3tē-saⁿ tâi pe̍h-bé, tē-sì tâi hoe-pan ê bé teh thoa.

4Góa chiū mn̄g kap góa kóng-ōe ê sù-chiá, “Sian-siⁿ, chiah-ê teh piáu-sī sím-mi̍h?”

5Sù-chiá ìn góa kóng, “Chiah-ê teh piáu-sī thiⁿ sì-bīn ê hong; in teh sū-hāu choân-tōe ê Chú, taⁿ tùi hia chhut--lâi.”

6O͘-bé thoa ê chhia ǹg pak-pêng khì; pe̍h-bé ê chhia tè tī āu-bīn; hoe-pan-bé ǹg lâm-pêng khì.

7Chiah-ê ióng ê bé chhut--khì, kip beh kiâⁿ-thàu choân-tōe. Sù-chiá kóng, “Lín khì choân-tōe sûn-lô.” In chiū khì.

8I kiò góa, kā góa kóng, “Lí khòaⁿ, ǹg pak-pêng khì--ê í-keng tī pak-pêng, hō͘ góa ê sim pêng-chēng.”

Ūi Iâ-su-a Tì Lé-koan

9Siōng Chú tùi góa kóng,

10“Lí tio̍h chiong hiah-ê liû-hòng khì Pa-pí-lûn tò-tńg--lâi ê Hek-tāi, To-pí-ngá, kap Iâ-tāi-ngá só͘ hiàn ê kim-gûn, sûi-sî the̍h-khì Se-hoan-ngá ê kiáⁿ Iok-se-a ê chhù,

11ēng hiah-ê kim-gûn chòe lé-koan, tì tī Iok-sat-ta̍t ê kiáⁿ tōa-chè-si Iâ-su-a ê thâu-khak téng;

12tùi i kóng, ‘Siōng Chú — Bān-kun ê Thóng-sòe án-ni kóng: Khòaⁿ leh, ū chi̍t ê chheng-chòe Sin-íⁿ--ê beh tùi i ê pún só͘-chāi puh--chhut-lâi; i beh khí-chō Siōng Chú ê tiān.

13Chiū-sī i, beh khí-chō Siōng Chú ê tiān. I beh ū ông ê chun-êng, chē ông-ūi thóng-tī; koh ōe ū chi̍t ê chè-si tī i ê pó-chō piⁿ. In nn̄g ê lâng tiong-kan ū hô-hâi kiōng-sek.

14Chit-téng lé-koan beh hē tī Siōng Chú ê tiān lâi kì-liām Hek-tāi, To-pí-ngá, Iâ-tāi-ngá, kap Se-hoan-ngá ê kiáⁿ — Iok-se-a.’”

15Tòa tī chin hn̄g ê lâng mā ōe lâi chòe-hé tiông-kiàn Siōng Chú ê tiān. Hit-sî lín chiū ōe chai, sī Siōng Chú — Bān-kun ê Thóng-sòe chhe góa lâi lín chia. Lín nā sêng-sim thiaⁿ-thàn Siōng Chú — lín ê Siōng-tè ê ōe, chit-ê tāi-chì it-tēng si̍t-hiān.

Sat-ka-lī-a-su 6 - 現代台語譯本羅馬字版(TTVR)-闽南语

Learn More About Us