Iâ-lī-bí-su 31

Iâ-lī-bí-su 31 - 現代台語譯本羅馬字版(TTVR)-闽南语

Í-sek-lia̍t-lâng Tò-khì Kò͘-hiong

1“Kàu hit-sî, góa beh chòe Í-sek-lia̍t ta̍k chong-cho̍k ê Siōng-tè, in beh chòe góa ê chú-bîn.” Siōng Chú án-ni soan-pò͘.

2Siōng Chú án-ni kóng, “Thoat-lī to-kiàm chhun--lo̍h-lâi ê chú-bîn, tī khòng-iá tit-tio̍h un-hūi; Í-sek-lia̍t chhē-tio̍h an-hioh ê só͘-chāi.

3Siōng Chú tùi kó͘-chá chiū tùi in piáu-bêng, ‘Góa ēng put-piàn ê thiàⁿ thiàⁿ lí, góa beh éng-oán ēng chû-ài tùi-thāi lí.’

4Só͘ thiàⁿ ê Í-sek-lia̍t ah, góa beh kā lí tiông-kiàn, lí chiū thang koh the̍h lin-long-kó͘ chhut-khì kap hoaⁿ-hí khoài-lo̍k ê lâng chòe-hé thiàu-bú.

5Lí ōe koh tī Sat-má-lī-a ê soaⁿ-téng chai-chèng phû-tô; chai-chèng ê lâng ōe-tàng hióng-siū ké-chí.

6Kàu ū chi̍t ji̍t, siú-bōng ê lâng it-tēng ōe tī Í-hoat-liân ê soaⁿ-téng hoah kóng, ‘Khí--lâi, lán lâi-khì Sek-an tiâu-kìⁿ Siōng Chú — lán ê Siōng-tè!’”

7Siōng Chú koh kóng,

“Tio̍h ūi Ngá-kok hoaⁿ-hí chhiùⁿ-koa,

ūi siōng úi-tāi ê kok-ka hoan-ho͘.

Tio̍h thoân-pò, tio̍h chheng-chàn, kóng,

‘Siōng Chú í-keng kái-kiù I ê chú-bîn,

kái-kiù Í-sek-lia̍t chhun--lo̍h-lâi ê lâng.’

8Khòaⁿ leh, góa beh tùi pak-hng chhōa in tò--lâi,

tùi thiⁿ-piⁿ-hái-kak chiong in tiàu-chi̍p óa--lâi;

sit-bêng--ê, kha-pái--ê, hoâi-īn--ê, teh-beh seng-sán--ê

lóng kui tōa-tīn tâng-chôe tò--lâi.

9In iân-lō͘ khàu--tò-lâi;

góa beh an-ùi in ín-chhōa in,

chhōa in sūn khoe-chúi piⁿ kiâⁿ,

kiâⁿ pîⁿ-tháⁿ ê lō͘ bōe poa̍h-tó;

góa sī Í-sek-lia̍t ê Pē,

Í-hoat-liân sī góa ê tōa-kiáⁿ.

10“Lia̍t-kok ah, tio̍h thiaⁿ Siōng Chú ê ōe,

tio̍h tī chin hn̄g ê hái-tó soan-iông, kóng,

‘Kóaⁿ-sòaⁿ Í-sek-lia̍t Hit-ūi beh tiàu-chi̍p i,

beh khòaⁿ-kò͘ i chhin-chhiūⁿ bo̍k-chiá kò͘-siú iûⁿ-kûn.’

11Góa Siōng Chú í-keng kiù-sio̍k Ngá-kok,

kái-kiù i thoat-lī pí i khah kiông ê lâng ê chhiú-thâu.

12In beh lâi Sek-an koân ê só͘-chāi hoan-ho͘,

ūi-tio̍h Siōng Chú só͘ sù ê hó-mi̍h hoaⁿ-thâu-hí-bīn,

in-ūi Siōng Chú sù in ngó͘-kok, sin-chiú, kap sin-iû,

koh ū iûⁿ-ko kap sòe-chiah gû-á;

in beh chhin-chhiūⁿ ū chúi koàn-ak ê hn̂g,

bōe koh iu-khó͘.

13Hit-sî, cha-bó͘ gín-á beh hoaⁿ-hí thiàu-bú,

siàu-liân-lâng kap lāu-lâng chòe-hé khoài-lo̍k;

góa beh hō͘ in ê pi-siong pìⁿ-chòe hoaⁿ-hí,

beh an-ùi in,

hō͘ in ū hí-lo̍k tāi-thòe pi-ai.

14Góa beh ēng iû-jī hō͘ chè-si pá-chiok,

góa ê chú-bîn beh in-ūi góa ê un-hūi sim-móa-ì-chiok.”

Siōng Chú án-ni soan-pò͘.

15Siōng Chú kóng,

“Tī La-má ū thiaⁿ-tio̍h pi-siong ai-khàu ê siaⁿ;

Lúi-kiat ūi-tio̍h i ê kiáⁿ-jî ai-khàu,

m̄-goān siū an-ùi, in-ūi in lóng bô--khì lah.”

16Siōng Chú koh kóng,

“M̄-thang koh chhut-siaⁿ ai-khàu,

m̄-bián koh lâu ba̍k-sái;

lí ê lô-khó͘ it-tēng ōe tit-tio̍h pò-siúⁿ.

In it-tēng ōe tùi tùi-te̍k ê thó͘-tōe tò--lâi.

Siōng Chú án-ni soan-pò͘.

17Lí ê chiong-lâi chhiong-móa hi-bāng;

lí ê kiáⁿ-jî it-tēng ōe tò-lâi in ka-kī ê hiong-thó͘.”

Siōng Chú án-ni soan-pò͘.

18“Góa chheng-chhó thiaⁿ-tio̍h Í-hoat-liân-lâng ūi-tio̍h ka-kī teh oàn-thàn:

Goán chhin-chhiūⁿ iáu-bē siū hùn-liān ê chhiⁿ-gû-á,

lí kā goán koán-kàu, goán chiū chiap-siū.

Kiû lí chhōa goán tò-tńg--lâi, goán chiū hóe-kái kui-ǹg lí,

in-ūi lí sī Siōng Chú — goán ê Siōng-tè.

19Goán chi̍t-ē pōe-poān lí, chiū hō͘-hóe;

siū lí koán-kàu, goán chiū tûi sim-koaⁿ.

Goán in-ūi siàu-liân ê sî siū ê bú-jio̍k,

bô bīn thang kìⁿ lâng.”

20“Í-hoat-liân-lâng kiám m̄-sī góa thiàⁿ ê kiáⁿ?

Kiám m̄-sī góa ì-ài ê gín-á?

Góa ta̍k-piàn chek-pī i,

iû-goân chhim-chhim su-liām i.

Góa ūi-tio̍h i khan-tn̂g-khòa-tō͘,

góa it-tēng lîn-bín i.

Siōng Chú án-ni soan-pò͘.

21Lí tio̍h ūi ka-kī siat chí-lō͘-pâi,

ūi ka-kī chhāi ín-lō͘-thiāu;

tio̍h liû-sim tì-ì lí kiâⁿ--kè ê tōa-lō͘,

sūn hit-tiâu lō͘ tò-tńg--lâi.

Chāi-sek-lú Í-sek-lia̍t ah,

lí tio̍h tò--lâi,

tò-lâi lí ka-kī ê siâⁿ-tìn.

22Ngó͘-ge̍k ê cha-bó͘-kiáⁿ,

lí sì-kòe liû-lōng beh kàu tī-sî?

Siōng Chú í-keng tī chit-ê tōe-chiūⁿ chhòng-chō chi̍t kiāⁿ sin ê sū,

chiū-sī cha-bó͘-lâng beh pó-hō͘ ta-po͘-lâng.”

Siōng Chú ê Chú-bîn Chiân-tô͘ Kng-bêng

23Siōng Chú — Bān-kun ê Thóng-sòe, Í-sek-lia̍t ê Siōng-tè án-ni kóng, “Góa hō͘ siū-lia̍h ê chú-bîn tò--lâi ê sî, in tī Iû-tāi ê thó͘-tōe kap siâⁿ-tìn ōe koh án-ni kóng, ‘Kong-gī ê chhù, sèng ê soaⁿ ah, goān Siōng Chú sù-hok lí!’

24Choh-sit-lâng kap kò͘-iûⁿ ê lâng lóng ōe chòe-hé tòa tī Iû-tāi ta̍k-ê siâⁿ-tìn.

25Ià-siān ê lâng, góa hō͘ in goân-khì; iu-khó͘ ê lâng, góa hō͘ in boán-chiok.”

26Án-ni, góa khùn-chhíⁿ, hoat-kiàn góa chin hó-khùn.

27Siōng Chú kóng, “Ji̍t-chí teh-beh kàu, góa beh hō͘ Í-sek-lia̍t-ke kap Iû-tāi-ke jîn-kháu ke-thiⁿ, cheng-siⁿ heng-ōng.

28Góa í-chêng liû-sim khòaⁿ in, kā in pu̍ih-chhut, thiah-húi, phò-hoāi, thui-hoan, kap siong-hāi; í-āu góa beh koh liû-sim khòaⁿ in, kā in tiông-kiàn, chai-chèng. Siōng Chú án-ni soan-pò͘.

29Hit-sî lâng bōe koh kóng:

Lāu-pē chia̍h sng phû-tô,

kiáⁿ ê chhùi-khí sng-nńg.

30Taⁿ, chia̍h sng phû-tô--ê, ka-kī ê chhùi-khí beh sng-nńg; ta̍k-ê lâng ōe in-ūi ka-kī ê chōe sí.”

Li̍p Sin ê Iok

31Siōng Chú kóng, “Khòaⁿ leh, ji̍t-chí teh-beh kàu, góa beh kap Í-sek-lia̍t-ke kap Iû-tāi-ke li̍p sin ê iok.

32Chit-ê iok kap góa í-chêng kap in ê chó͘-sian só͘ li̍p ê iok bô kâng-khoán; hit-ê iok sī góa khan in ê chó͘-sian ê chhiú, tùi Ai-ki̍p kā in chhōa--chhut-lâi ê sî kap in li̍p ê iok. Góa sui-jiân choh in ê tiōng-hu, m̄-kú in phò-hoāi hit-ê iok. Siōng Chú án-ni soan-kò.

33Hiah-ê ji̍t-chí í-āu, góa kap choân-thé Í-sek-lia̍t-lâng só͘ beh li̍p ê iok sī án-ni: Góa beh chiong góa ê lu̍t-hoat hē tī in ê sim-lāi, khek tī in ê sim-pán. Góa beh chòe in ê Siōng-tè, in beh chòe góa ê chú-bîn. Siōng Chú án-ni soan-pò͘.

34In m̄-bián koh kàu-tō ka-kī ê chhù-piⁿ kap tông-pau, kóng, ‘Lín tio̍h jīn-bat Siōng Chú.’ In-ūi in tùi tōa kàu sòe lóng ōe jīn-bat góa. Góa beh sià-bián in ê chōe-kò, kā in ê chōe pàng bōe-kì--tit.” Siōng Chú án-ni soan-pò͘.

35Siōng Chú hō͘ ji̍t-thâu tī ji̍t--sî hoat-kng,

hō͘ ge̍h-niû kap chhiⁿ-sîn chiàu tēng-lu̍t chiò-kng àm-mî;

I kiáu-lā tōa-hái, hō͘ hái-chúi giâ tōa-éng.

I ê chheng-ho͘ sī Siōng Chú — Bān-kun ê Thóng-sòe.

I án-ni kóng:

36Chū-jiân-kài ê tēng-lu̍t nā ōe tùi góa ê bīn-chêng hòe-chí,

góa ê chú-bîn Í-sek-lia̍t chiah ōe tī góa ê bīn-chêng toān-choa̍t,

éng-oán bōe koh chiâⁿ-chòe kok-ka.

Siōng Chú án-ni soan-pò͘.

37Thiⁿ nā ōe chhek-liōng--tit,

tōe ê kun-ki nā ōe thàm-cha--tit,

góa chiah ōe in-ūi Í-sek-lia̍t ê hō͘-tāi ê só͘-chòe

kā in khì-sak.

Siōng Chú án-ni soan-pò͘.

38Siōng Chú kóng, “Hiah-ê ji̍t-chí chin-chiàⁿ ōe lâi, Iâ-lō͘-sat-léng chit-chō siâⁿ ōe koh siu-kiàn kui hō͘ Siōng Chú, tùi Hap-lâm-gia̍p-lâu kàu Kak-mn̂g.

39Chhek-liōng ê soh beh chhun chhut-khì kàu Ka-li̍p-soaⁿ, oat-khì Ko-a,

40keng-kè tâi sí-lâng piàⁿ pùn-sò ê soaⁿ-kok, kàu Khip-lûn Khoe-kok, ti̍t-kàu tang-pêng Bé-mn̂g ê oat-kak hit-phiàn ê thó͘-tōe, lóng beh sèng-hòa kui Siōng Chú, éng-oán bōe koh siū pu̍ih-chhut, siū phò-hoāi.”

Iâ-lī-bí-su 31 - 現代台語譯本羅馬字版(TTVR)-闽南语

Learn More About Us