Si-phian 30 - 現代台語譯本羅馬字版(TTVR)-闽南语

Tāi-pi̍t ê si, hiàn sèng-tiān á-sī kiong-tiān ê koa.Kám-un ê Si

1Siōng Chú ah, góa beh chun lí chòe chì-koân,

in-ūi lí ū thê-poa̍t góa, bô hō͘ góa ê tùi-te̍k tùi góa khoa-kháu.

2Siōng Chú — góa ê Siōng-tè ah,

góa kiû-kiò lí, lí ū i-hó góa.

3Siōng Chú ah, lí tùi Im-hú kā góa khiú--chhut-lâi;

lí hō͘ góa oa̍h--teh, bián ji̍p bōng-khòng-khang.

4Siōng Chú sèng ê chú-bîn ah, lín tio̍h chhiùⁿ-koa o-ló I,

chheng-chàn I ê sèng-miâ.

5I ê siū-khì chí-ū chi̍t-sî-á-kú;

I ê un-tián kàu chi̍t-sì-lâng.

Sui-jiân kui-mî ū thî-khàu,

thiⁿ chi̍t-ē kng chiū ū hoaⁿ-hí.

6Tī góa sūn-lī ê sî, góa bat kóng,

“Góa éng-oán bōe tōng-iâu.”

7Siōng Chú ah, lí si-un, hō͘ góa chhin-chhiūⁿ soaⁿ khiā-chāi-chāi;

lí bīn oa̍t-cháu m̄ khòaⁿ góa, góa chiū kiaⁿ-hiâⁿ.

8Siōng Chú ah, góa kiû-kiò lí;

góa tùi Siōng Chú kiû lîn-bín, kóng,

9“Góa sí, ji̍p bōng, ū siáⁿ lī-ek?

Thô͘-hún kiám ōe chheng-chàn lí, kiám ōe pò-iông lí ê sìn-si̍t?”

10Siōng Chú ah, kiû lí thiaⁿ góa, lîn-bín góa;

Siōng Chú ah, kiû lí pang-chān góa.

11Lí ū chiong góa ê thî-khàu pìⁿ-chòe thiàu-bú,

chiong góa ê môa-saⁿ thǹg--khí-lâi, ēng hoaⁿ-hí chòe tòa kā góa hâ.

12Án-ni góa ê sim-sîn chiū bōe tiām-tiām, ōe chhiùⁿ-koa chheng-chàn lí;

Siōng Chú — góa ê Siōng-tè ah, góa beh éng-oán kám-siā lí.

Learn More About Us